1 Tiˆmoˇseˬ 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaqkhav Geuf-eu Deuq

¹ Miqyaer-euq tsawrmyanr hawr-eu aqyawf-euq dawqmaeq dawqtsov-anr aqcawq yaeqbawq saerlu-aer maqya aerni, aqcawq-euq zaqkhav khar geufluf-eu tsawrhaq yawqghaq navluf yawqjeq navluf-euq lafkhoer, yawqha-euq yawsanr ghaq-anr yawzeubaw paq-aer ghae-eu mae.

² Kalizaq pyeuf-eu yawsanr deuq-euq zaqkhav geufluf-eu deuq-aq, yawqha-euq yawsanr ghaq-euq aqyuif aqnyir pyeuflar-euq mirnae, yawqha-euq yawsanr ghaq-anr yaeqbawq saerlu-aer maqya ghae-a. Aqyawf maf-euq gharduq ngeurdzaeq laejae-awr gar mrnaeq paq-aer ghae-eu mae. Aqjeq mirnae aernar-aq, aqyawfmaf khoerlof-aer mr ngae, gaq-eu aqyuif aqnyir deuq hawr-eu jan-eu tsawrhaq deuq guiqlanq za-eu mae. Nawr, garkawv heudeuq maeqnaeq tsovnaeq-awr ghaq bif-awq.

Maeqbanq-eu Tsawrhaq Deuq

³ Tsawrhaq tiqghaqnav, aqdui-euq Sanqpaq Yeqsur Kali-euq dawq hawr-eu Miqyaer-anr yawzeu baw-eu dawqmaeq dawqtsov-anr maq tsaqler-eu, beugar-eu jeq maeq nar-aq,

⁴ aqyawf-aq, nuima huiq-awr, tiqjeq-iq maq siqnya-eu khawf, dawqdeuq-euq garkawv tsawrpyaer pyaer-awr, jadzaq mawf-eu nuima anr-eu taef mae. Khoermirnae, myavnav nav-eu, caedzaq-eu, jabu jadoer-eu, aqcawq-euq garkawv yawdoer jeq sharnoeq-eu, heudeuq bi dovlar-eu mae.

⁵ Khoeruqtaf, sharnoeq sharsawx nya-eu nuima cawv-ir-awr, yawtsaq yawdawr jeq maqpar anr-eu tsawrhaq deuq-euq yawkaq, tsawrpyaer pyaer-eu jeq bi dovlar-eu mae. Aqyawfmaf, Miqyaer-anr yawzeu baw-eu jeq-aq, jirjeuq jeuqlar taef-a laer noeqtaq-euq mae. Nawr khoerlof-aer ghae-eu tsawrhaq-anr garjaw jaw-awq.

⁶ Miqyaer-anr yawzeu baw-awr, yawqha kharjav-eu jeq-anr nuikhanr shir-eu-aq, zawr myaq-eu jirjeuq pyeuf-eu mae.

⁷ Aqjeq mirnae aernar-aq, aqdui mirtsaq-euq khoertav daefle ngae, tiqjeq-iq maq yurlef-aer, shir ngae khawf tiqjeq-iq maq yurlef nya-eu yawduq baw-eu mae.

⁸ Khoermirnae, aqdui, dzaqdzaq dawrdawr hawr-eu dmghaq dmlmr jav nar-aq, nuikhanr shir-eu tsaq mae.

⁹ Aerkhawf, smrmuiq muiqlar mawf-eu deuq-aq, murjur jur-eu jeq-euq lafkhoer ga’anr-awr, lafpeu-anr pafler-eu uqtaf, aqdzawq argan pyeuf-ir-awr, guvlar paq-aer ghae-eu maerjuir juir-eu ghawqmya jeq-euq lafkhoer ga’anr-ir-eu mae. Khoer-aq, aqyawf maf-anr lavcawv-awr lavbyovjir nya-eu mae.

¹⁰ Pyur-anr maerjuir juir-eu jeq-aq, yawdoer dawqtawv luf-euq dawqpaeq duqpur mae. Tsawrhaq tiqpavnav deuq, pyur-anr maerjuir juir-eu mirnae, Kali-anr jan-eu jeq-anr byaerdzae-awr, yawqha-euq nuima-anr micaer nae tsawv-euq lof-aer noeqshaq noeqzanq-eu ghawqmya jeq-anr yadaq-eu mae.

Muiq Duidui-eu Guirdeuv Deuv-awq

¹¹ Aerkhawf, Miqyaer-euq tsawrhaq pyeuf-eu nawr ghaq-aq, khoerdeuq-anr caevdzeur-awq. Tsaq-awr dawr-eu jeq, Miqyaer-anr yawzeu baw-eu jeq, jan-eu jeq, gaq-eu jeq, daqcoer orcoer-eu jeq hawr-eu nuinanq nuiyu anr-eu jeq, heudeuq-anr taemir nya’ni laejae-awq.

¹² Jan-eu jeq-euq gharduq guirdeuv yawmuiq-aer deuv-awq. Mqmaq maqbyav yarzir daef-eu jeq-anr nyaefza-awq. Nawr khoerjeq-anr za’ni Miqyaer, nawq-anr kur-euq mae. Sarkir kamq-eu ghawqmya ghaq-euq maeqshi, nawr, Kali-anr jan-eu ma laer muiq-eu sarkir kamq-euq mae.

¹³ Yawqjeq navluf-anr daef-eu jeq bif-eu Miqyaer-euq maeqshi hawr-eu Boqtiv Pirlav-euq maeqshi muiq-eu sarkir kamq-euq Yeqsur Kali-euq maeqshi, ngar, nawq-anr dawq heulof-aer bif-eu ma.

¹⁴ Aqdui-euq Sanqpaq Yeqsur Kali dovle ngae keuvni, shawrjaevni aerkhar maqza’ni, biftaq-euq dawq khoerdawq-anr nawr nyaeftaeq taq-awq.

¹⁵ Aryamq tsaqlar ngae, aqyawf-anr bi dovle taef-a. Miqyaer-aq, guiqlanq byan-awr, aqyawf tiq ghaq taef-aer baoq huiq duidui-eu, sanqpaq deuq-euq Sanqpaq, yawsanr deuq-euq Yawsanr mae.

¹⁶ Aqyawf tiq ghaq taef-aer shir-eu maqbaw-aer tiqghaq-iq maq lepae nya-eu yawshaef-euq lafkhoer jawr-eu mae. Tsawrhaq tiqghaq-iq aqyawf-anr maq mawrhaw-aer, mawr khawf maq mawrnya-a. Taqhuiq taqmanr-eu jeq hawr-eu li-eu maqbawni baoq huiq-eu jeq aqyawf-anr of luf-ur. Aqmeq.

¹⁷ Nawr, heuzir-euq lafkhoer smrmuiq muiq-eu deuq-anr, dawq heulof-aer bif-awq. “Nawmaf nuima taqhuiq. Yawduq maqbaw-eu pyurshuir myawqganq-anr maq noeqtmq-aer, aqdui laqkhaq caerni yawqjeq navluf tiqbyan tiqlof bifnaeq laf-eu, daefluf-eu Miqyaer-anr taef-aer noeqtmq-awq.

¹⁸ Yawmuiq jeq mr-awr, muiq-eu gar ghawqmya jeq mr-eu uqtaf, nuima keuv-awr bif-eu taef-aer maqngeur-eu, tsawrtsir maqtsirni cawba naeq-awq.”

¹⁹ Heulof-aer janr-eu-aq, aqyawfmaf mqmaq maqbyav yarzir daef-eu jeq-anr nyaefza’ni, aqkar karzir-euq gharduq muiq-eu dawqpaeq pyeuf-eu, pyurshuir myawqganq povuiq taq-eu jeq pyeuf-eu mae.

Arsaq Saq-eu Dawq

²⁰ Tivmorseq-or! Nawq-anr a’naeq taq-euq jeq-anr yawmuiq-aer jeqhmq-awr hawpir-awq. Miqyaer-anr yawzeu maqbaw-aer gardanr maqtsoeq-eu dawq ngaeq-awr tmr-eu jeq hawr-eu, “Zaqsiq tsawrganr” laer kurlaeq taq-euq tsawrpyaer pyaer-eu jeq-anr garjaw jaw-awq.

²¹ Tsawrhaq tiqghaqnav, “Ngar zaqsiq tsawrganr khoer anr ma” laer aer-awr jan-eu jeq-anr nae garbanq banq-euq mae. Nawq-euq khoertav guiqlanq yawdzanr jav luf-ur. Aqmeq.