1 Tiˆmoˇseˬ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Hawlanr-eu Tsawrhaq Deuq

¹ Kalizaq armur-anr hawlanr-eu gar mrmawf-eu tsawrhaq-aq, gar yawmuiq tiqjeq-anr mrmawf-eu tsawrhaq mae laer aertaq-euq dawq khoerdawq-aq, jancoer paq-aer ghae-eu dawq mae.

² Kalizaq armur-anr hawlanr-eu tsawrhaq-aq, aerkhar maqza-eu, miqzaq tiq ghaq taef-aer baw-eu, kharnoeq kharlov-eu lof-aer maqdzaq maqdawr-eu, yawqha-euq nuima-anr ghaqler-eu, yawzeu bawlar paq-aer ghae-eu, daqyan-anr ha’nya-eu hawr-eu maeqnaeq tsovnaeq nya-eu tsawrhaq yapyeuf-eu mae.

³ Khoeruqtaf, jirbaq maq dawryaef-eu, iqdaeq iqcae maqmr-eu, kharngeur-eu jeq-anr maerjuir maqjuir-eu, nuima nanqyuni ghae-awr, aqcawq-anr tsawrpyaer maqpyaer-eu uqtaf, pyur-anr maerjuir maqjuir-eu tsawrhaq yapyeuf-eu mae.

⁴ Yawqha-euq nymrjir-anr yawmuiq paq-aer uvlanr nya-awr, zaqdeuq aerdawq narhaq-awr, yawqjeq navluf-euq lafkhoer, yawzeu baw-eu tsawrhaq yapyeuf-eu mae.

⁵ Yawqha-euq nymrjir-anr maq uvlanr nya-eu tsawrhaq-aq, Miqyaer-euq Kalizaq armur-anr aqjox-aer bosav nya-eu?

⁶ Janlar-euq yawshuif tiq ghaq maqya bigeuf-a. Bigeuf nar-aq, nuima huiqlar-awr, naef sanqpaq yarkhaq dar-eu jeq-anr yadaq-eu lof-aer yadaq-eu baw-mr.

⁷ Aqyawf-aq, lafnyir paw tsawrmyanr muiq-eu tsawrhaq yapyeuf-eu mae. Maqngeur nar-aq, aqcawq jabu jadoer-eu gar yadaq-awr, naef sanqpaq nae lanrju khmrtaq-euq gar pafler-eu baw-mr.

Cawba-eu Tsawrhaq

⁸ Khoerlof-aer durni, cawba-eu deuq khawf, aqcawq yawzeu baw-eu tsawrhaq yapyeuf-eu mae. Maeqlar lardzaeq tsof-awr, aqgaf dzaruir ardzaeq-aer dawrdzeur-eu uqtaf, pyurshuir myawqganq-anr maerjuir juir-eu tsawrhaq maqya pyeuf-a.

⁹ Shawrjaevni ghae-eu zaqsiq nuisiq anr-awr, jan-eu jeq-anr tafler-eu zaftaq-euq deuq-anr zifdanni tuvtaeq taq-euq tsawrhaq yapyeuf-eu mae.

¹⁰ Aqyawf maf-anr khawf jeqhu tsermr haw-awr, aerkhar maqza nar-aq, aqyawf maf-anr cawba-eu tsawrhaq bigeuf-awq.

¹¹ Khoerlof-aer durni, zaqmiq aqbur deuq khawf, aqcawq yawzeu baw-eu tsawrhaq yapyeuf-awr, aqcawq-anr jabu jadoer-eu tsawrhaq maqya pyeuf-a. Yawha-euq nuima-anr ghaqler-awr, yawqjeq navluf-anr sarjax zif-eu tsawrhaq yapyeuf-eu mae.

¹² Cawba-eu tsawrhaq-aq, miqzaq tiq ghaq taef-aer yabaw-eu mae. Yawqha-euq nymrjir hawr-eu zaqdeuq-anr yawmuiq-aer uvlanr nya-eu tsawrhaq yapyeuf-eu mae.

¹³ Aqjeq mirnae aernar-aq, cawba-eu gar-anr yawmuiq-aer mr-eu tsawrhaq-aq, aqcawq taqhuiq naeqlaf-eu uqtaf, Yeqsur Kali-anr jan-eu lafkhoer, nuima khaqduqni ghae-eu jeq khawf anrlar taef-a.

Huiq-eu Zaftaq-euq Jeq

¹⁴ Ghawqmyanr maqghae-aer ngar, nawr jawr-eu gar oe ma laer noeqtmq luf-eu ma. Aerkhawf, ngar yawkawr-aer maq oenya nar-aq,

¹⁵ Miqyaer-euq nymrkhanq-euq lafkhoer aqjox-aer mr paq-aer ghae-eu deuq nawr yasiqni, garkawv heudeuq ngar, nawq-anr bofanr lef-euq ma. Nymrkhanq khoer-aq, daefluf-eu Miqyaer-euq Kalizaq armur pyeuf-awr, yawtsaq yawdawr jeq-euq zeurma hawr-eu dawqpaeq mae.

¹⁶ Aqdui uqduq tanq-eu zanr-euq lafkhoer zaftaq-euq jeq arnavni huiq-eu la laer aqdui siqnya-eu ma: Miqyaer shiqshaq pi-awr daefle-euq gar bimawr naeqlaf-euq mae. Muiq-eu Saflar khawf aqyawf-aq, dawr-awr tsaq-eu mae laer sarkir kamq-eu mae. Mqtav ghaqkhaer, aqyawf-anr ya’mawr-euq mae. Aqyawf-euq garkawv aqcawq tsawrjeuq tsawrca-anr gaqdoe-ir-awr, Mirtsaqzaq, aqyawf-anr jan-eu mae. Aqyawf-aq, yawshaef khanqsaer-euq lafkhoer bi sheuqdav lef-euq mae.