1 Tiˆmoˇseˬ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq Shar-eu Garkawv

¹ Yawbae jeq-aq, ngar, nawq-anr ghaq heulof-aer bifmawf mir-a. Tsawrhaq yawqghaq navluf-euq gharduq Miqyaer-anr tanqshar-awr, guiqlanq shar-eu lafkhoer sharcaw duidui-awr, Miqyaer-anr jaceuq-awq.

² Sanqpaq deuq hawr-eu aryaq jav-eu yawqghaq navluf-euq gharduq khawf khoerlof-aer shar-awq. Khoerlof-aer shar nar-aq, aqdui nuisar of-awr, cofngaerni Miqyaer-anr yawzeu bawbaw-aer, yawtsaq yawdawr-euq lafkhoer daefnya taef-a.

³ Khoerlof-aer shar-eu-aq, aqdui-euq Kakhof-eu ghaq pyeuf-eu Miqyaer khawf nuima tsaq-awr yawmuiq jeq pyeuf-eu mae.

⁴ Tsawrhaq yawqghaq navluf kakhof-eu jeq za-awr, yawtsaq yawdawr jeq-anr siqnya lar-eu gar Miqyaer geufmawf-eu mae.

⁵ Aqjeq mirnae aernar-aq, Miqyaer tiq ghaq jawr-eu taef mae. Miqyaer hawr-eu tsawrhaq-euq yawkaq-anr khawf, tsawrkaq tiq ghaq jawr-eu taef mae. Tsawrkaq khoerghaq-aq, tsawrhaq pyeuf-eu Yeqsur Kali mae.

⁶ Aqyawf-aq, tsawrhaq yawqghaq navluf-anr zeurkhof-eu laer aqyawf-euq mawrdo lawrnaeq-euq mae. Aryamq tsaqlar ngae, garkawv khoer bisiq bimawr laf-euq mae.

⁷ Khoer-euq gharduq, ngar-aq, dawqmaeq maeq-eu ghaq hawr-eu ghaqkhaer pyeuflarni khawf, jan-eu jeq hawr-eu yawtsaq yawdawr jeq-euq garkawv aqcawq tsawrjeuq tsawrca-anr maeqnaeq tsovnaeq-ir-eu maeqzaq pyeuflarni khawf, Miqyaer, ngaq-anr tserdov naeqlaf-euq mae. Ngar heulof-aer aer-eu-aq, jaqmyawf myawf-eu maqngeur, Kali-euq lafkhoer yawtsaq yawdawr dawq ngaeq-eu ma.

⁸ Khoermirnae, zaqyo aqli deuq aqgar jawr ngae maqkaq, nuima maqpaer-aer, tsawrpyaer maqpyaerni, shawr-eu aqlaf bafdir-awr guiqlanq shar-eu gar ngar geufmawf mir-a.

⁹ Zaqmiq aqbur deuq khawf, nuima nanqyuni ghae-eu uqtaf, nuima taqnya-eu lafkhoer, maeqtsoeq dm paq-aer ghae-eu lof-aer tsaqtsaqni dmmuiq-eu gar ngar geufmawf mir-a. Tsaerkanr pyaef-eu, shuir myawqgur geuf-eu, arcar carkhawf-euq saer geuf-eu hawr-eu, arpoeq khav-eu maeqtsoeq dmdm-aer janrghae-eu gar ngar maq geufmawf nya.

¹⁰ Aerkhawf, Miqyaer-anr yawzeu baw-eu zaqmiq aqbur tiq ghaq ma laer aer-eu lof-aer geuxni, yawmuiq jeq mrdov laf-awr bimawr-awq.

¹¹ Zaqmiq aqbur deuq-aq, ciqcurni jawr-awr, aqcawq maeq-eu gar yawzeubaw duidui-eu lafkhoer dzawgeuf-awq.

¹² Ngar, zaqmiq aqbur-anr maeq-awr tsov-eu hawr-eu zaqyo aqli-anr uvlanr-eu gar maqbi mrmawf nya. Ciqcurni jawr nar-aq ghaq-ar.

¹³ Aqjeq mirnae aernar-aq, Aqdaq-anr jeqhu baeghaq-awr nae taef-aer Erbav-anr bae-euq mae.

¹⁴ Khoeruqtaf, maershuir bi shuirtawv-euq ghaq-aq, Aqdaq maqngeur-a, zaqmiq aqbur khoerghaq maershuir bi shuirtawv-awr, mrbanq mrlaeq-euq mae.

¹⁵ Aerkhawf, zaqmiq aqbur deuq-aq, jan-eu, gaq-eu, yawshawr shawr-aer daef-eu hawr-eu yawqha-euq nuima-anr ghaqler-eu, heudeuq-euq lafkhoer zifluf nar-aq, zaqciq zaqcu mr ngae yabuq-ir taef-a.