1 Gawˇliˬtu 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaqkhaer Deuq Za-eu Geux-eu Jeq

¹ Ngar, ghaqkhaer maqngeur-a lor? Ngar buq-ir-euq tsawrhaq maqngeur-a laq? Ngar, aqdui-euq Sanqpaq Yeqsur Kali-anr ya’mawr-euq maqngeur-a lor? Nawmaf-aq, Sanqpaq Miqyaer-euq lafkhoer ngaq nae mrtaq-euq gar maqngeur le laq?

² Ngar, aqcawq-euq gharduq ghaqkhaer maqngeur-eu law-awr khawf, nawmaf-euq gharduq ghaqkhaer ma. Aqjeq mirnae aernar-aq, ngar, Sanqpaq Miqyaer-euq ghaqkhaer pyeuf-eu jmq-aq nawmaf mae.

³ Ngaq-anr povtser lar-eu tsawrhaq-anr ngar heulof-aer jashawnaeq ma.

⁴ Nga’maf dzaq-awr dawr-eu maqgeux-a lor?

⁵ Ghaqkhaer nuideuq, Sanqpaq Yeqsur-euq aqnyir hawr-eu, Geqpar aqha’maf, yawqha-euq miqzaq sheuqsheuq-aer can-eu lof-aer, nga’maf khawf Kali-anr jan-eu zaqmiq aqbur-anr sheuqdanq dzaq-awr, sheuqsheuq-aer maq cannya-a laq?

⁶ Maqngeur nar-aq, Baqnaqbar, nga’nyaf taef-aer gar maqmr-aer maq ghaenya-a lor?

⁷ Yawqha-euq pyurshuir myawqganq zmqzmq-aer guirdeuv deuv-ir-eu aqsur ghaq jawr-eu la? Aqgaf yarkmr mrtaq-euq gar nae, yarkmr-euq lafkhoer-euq arsiq maq pyavdzaq-eu aqsur ghaq jawr-eu la? Maqngeur nar-aq, aqcoer nyaefdawr nya-eu jeqzaq cutaq-euq gar nae, aqcoer maq nyaefdawr-eu aqsur ghaq jawr-eu la?

⁸ Ngar heulof-aer aer-eu-aq, tsawrhaq-euq nuinoeq aer-eu taef nga lor? Zanrdawq khawf heulof-aer aertaq-euq maqngeur-a laq?

⁹ Morseq-euq zanrdawq-euq lafkhoer boftaq-euq, “Mawrner, caer nawq ngae, maeqtsanq taqtsanq.” (Dm 25:4) Miqyaer, mawrner-euq gharduq taef-aer sharnoeq-awr khoerlof-aer aer-eu la lor?

¹⁰ Heu dawqtawvluf aqdui-euq gharduq sharnoeq-awr aer-eu maqngeur-a laq? Ngeur mae, aqdui-euq gharduq aertaq-euq mae. Aqjeq mirnae aernar-aq, daeyar tsaeq-eu tsawrhaq noeqtmq-awr tsaeq-eu tsaq mae. Caer diq-eu tsawrhaq khawf caer za’ni noeqtmq-awr diq-eu tsaq mae.

¹¹ Nga’maf, nawmaf-euq lafkhoer saflar paw-euq siqyoeq saeq-awr, shiqshaq-anr taf-eu jeq yaeqdzaq nar-aq, ardzaeq dzeur-eu la lor?

¹² Aqcawq, nawmaf nae bif-euq gar za-eu geux nar-aq, nga’maf ngeurdzaeq, aqcawq navmaqtser za-eu geux-eu maqngeur-a laq? Nga’maf za-eu geux-eu khawf khoerlof-aer maqjanr-aq. Aqjeq mirnae aernar-aq, Kali-euq guiqlanq dawq-anr maqya lavtsoeqni, nga’maf yawqjeq navluf-anr daq-eu ma.

¹³ Yawshawr jeq-anr taf-eu gar mr-eu deuq-aq, uqduq tanqnymr nymrma-euq lafkhoer jav-eu dzaqdzaq dawrdawr yadzaq-awr, lawrduq-anr gar mr-eu deuq khawf, lawrnaeq taq-euq jeq ya birdzaq-eu mae laer nawmaf maq siqnya-eu le laq?

¹⁴ Khoerlof-aer durni, guiqlanqdawq maeq-eu deuq khawf, guiqlanqdawq maeq-eu gar ghoe-awr yadzaq yadawr-eu mae laer Sanqpaq Miqyaer dawq biftaq-euq mae.

¹⁵ Ngar khoerlof-aer za-eu geux-eu khawf, tiqjeq-iq maqjanr-aq. Nawmaf, ngaq-anr khoerlof-aer bi janrnaeq mawf-eu mirnae, ngar nuima huiqkhar za-eu heu yawqngaef pyeuf-ir-eu ngaetu-aq, ngar shir-eu muiqdzaeq taef-a.

¹⁶ Ngar guiqlanqdawq maeq-eu-aq, nuima huiqkhar maqza. Aqjeq mirnae aernar-aq, ngar guiqlanqdawq maqmaeq-aer maq jawrnya nya. Guiqlanqdawq maqmaeq nar-aq, ngar ghawqshar shaq-aer yaghae saef-eu mae.

¹⁷ Ngar nuima keuv-awr guiqlanqdawq maeq nar-aq, mrpoeq lafsawq za taef-a. Ngar maq maeqmawf-eu law-awr khawf, ya’maeq-eu gar heu-anr yawmuiq-aer ya hawpir-eu mae.

¹⁸ Tox-aer ngeur nar-aq, ngar mrpoeq lafsawq aqjeq za-eu la? Ngar, guiqlanq dawq-euq aryaq maqya zmqbanqni, Kali-euq guiqlanqdawq maeq ngae, arpoeq maqyur-aer maeq-eu ma.

Yawqghaq Navluf-euq Kuirlaf Zaqkhav Pyeuf-eu

¹⁹ Ngar, tsawrhaq tiqghaq-iq-euq zaqkhav maqngeur-eu khawf, tsawrhaq ghawqmya ghaq, Kalizaq bi pyeuflarni, tsawrhaq dawqtawv luf-euq kuirlaf zaqkhav geufluf-eu ma.

²⁰ Yurdav tsawrhaq, Kalizaq bi pyeuflarni, ngar, Yurdav tsawrhaq-euq gharduq Yurdav tsawrhaq lof-aer pyeuf-eu ma. Ngar, zanrdawq-euq uqmov maqjawr-eu khawf, zanrdawq-euq uqmov jawr-eu tsawrhaq, Kalizaq bi pyeuflarni, ngar, aqyawf maf-euq gharduq zanrdawq-euq uqmov jawr-eu tsawrhaq pyeuf-eu ma.

²¹ Zanrdawq maqjav-eu tsawrhaq, Kalizaq bi pyeuflarni, ngar, aqyawf maf-euq gharduq zanrdawq maqjav-eu tsawrhaq lof-aer pyeuf-eu ma. Aqdir aernar-aq, Miqyaer-euq maeqshi ngar zanrdawq maqjav-eu maqngeur. Ngar, Kali-euq zanr-euq uqmov daefluf ma.

²² Ghaq baq-eu tsawrhaq, Kalizaq bi pyeuflarni, ngar, aqyawf maf-euq gharduq ghaq baq-eu tsawrhaq lof-aer pyeuf-eu ma. Aqjox-aer ghae-awr nae khawf, tsawrhaq tiqpavnav deuq kakhof-eu jeq bi za’ni, ngar, yawqghaq navluf-euq gharduq, yawqjeq navluf pyeuf-eu ma.

²³ Ngar khawf, aqcawq lof-aer guiqlanq dawq-anr taf-eu guiqlanq za’ni, guiqlanq dawq-euq gharduq heudeuq dawqtawvluf mrluf-eu ma.

Ghaqler-euq Uqdzanq Za’ni Laejae-eu

²⁴ Caevcae cae ngae, yawqghaq navluf caev-eu khawf, tiq ghaq taef-aer lafsawq za-eu mae laer nawmaf maq siqnya-eu le lor? Nawmaf khawf, lafsawq khoer-anr za’ni caevcae cae-awq.

²⁵ Caevcae cae-eu tsawrhaq yawqghaq navluf, cawv-ir nya-eu ghaqler-euq uqdzanq za’ni, aqyawfmaf yawqdzer dzaq-anr navluf yawqha-euq nuima-anr ghaqler-eu lafkhoer, laejae-awr caevdzaw-eu mae. Aerkhawf, aqdui-aq, maqcawv-ir nya-eu ghaqler-euq uqdzanq za’ni laejae luf-eu ma.

²⁶ Khoermirnae, ngar arpyar maqjav-aer caevluf-eu maqngeur. Ngar tanqcae cae-eu-aq, tiqjeq-anr-iq maq tanqzawni jaqlaer-anr taef-aer tanq-eu maqngeur.

²⁷ Ngar, aqcawq-anr dawqmaeq maeq-eu khawf, yawqha ghaq-aq, maq zmqnya-eu tsawrhaq maqya pyeuf-ir ni, ngar, ngaq-euq mawrdo-anr nyaeftaeq nya’ni, yawqha-euq mawrdo-anr yawqkhav-aer dzawpar luf-eu ma.