1 Gawˇliˬtu 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tanqpanq Aqma Mawrkawr-euq Lawrdzar

¹ Tanqpanq aqma mawrkawr-anr lawrnaeq-euq dzaqdzaq dawrdawr-euq garkawv-aq heulof-aer mae. Aqdui yawqghaq navluf siqnya-eu tsawrganr anr-eu ma laer siqnya ma. Aerkhawf, siqnya-eu tsawrganr-aq, tsawrhaq-anr nuima bi huiqlar-awr, gaq-eu jeq-aq, tsawrhaq-anr bihuiq bi manrlar-eu mae.

² Tsawrhaq tiq ghaq, yawqha tiqjeqpaq siqnya ma laer noeq nar-aq, aqyawf siqnya paq-aer ghae-eu jeq, tiqjeq-iq maq siqnya-a siq.

³ Aerkhawf, tsawrhaq tiq ghaq, Miqyaer-anr gaq nar-aq, Miqyaer, aqyawf-anr siqnya mae.

⁴ Tanqpanq aqma mawrkawr-anr lawrnaeq-euq dzaqdzaq dawrdawr dzaq-awr dawr-eu garkawv-aq heulof-aer mae. Mirtsaq-euq khoertav jav-eu tanqpanq aqma mawrkawr-aq, tiqjeq-iq gardanr maqtsoeq-eu mrmyawq mae laer aqdui siqnya-eu ma. Miqyaer tiq ghaq taef-aer jawr-awr, miqyaer nuighaq maqjawr-a laer khawf aqdui siqnya ma.

⁵ Mq-euq khoertav hawr-eu mirtsaq-euq khoertav, aqcawq, miqyaer laer kurluf-eu miqyaer ghawqmya ghaq jawr-awr, yawsanr deuq khawf ghawqmya’ni jawr-eu mae.

⁶ Aerkhawf, aqdui-euq gharduq-aq, Miqyaer tiq ghaq taef-aer jawr-awr, aqyawf-aq, aqdui-euq Aqda mae. Yawqjeq navluf aqyawf-anr nae dovle-awr, aqdui khawf aqyawf-euq gharduq daefluf-eu ma. Aqdui-euq Sanqpaq khawf tiq ghaq jawr-eu taef ma. Aqyawf-aq, Sanqpaq Yeqsur Kali mae. Aqyawf-euq baqda’nae yawqjeq navluf javluf-awr, aqdui khawf, aqyawf-euq baqda’nae daefluf-eu ma.

⁷ Aerkhawf, tsawrhaq dawqtawvluf khoerlof-aer siqnya-eu tsawrganr anr-eu maqngeur-a. Tsawrhaq tiqpavnav deuq iqnan keuvni, tanqpanq aqma mawrkawr-anr ghoesheuv taq-euq mirnae, dzaqdzaq dawrdawr heu, tanqpanq aqma mawrkawr-anr lawrnaeq-euq ma laer sawx-awr dzaq-eu mae. Aqyawf maf-euq zaqsiq nuisiq ghaq baq-eu mirnae, yawqha-anr maqshawrni bipyeuf-ir nya-eu mae.

⁸ Aerkhawf, dzaqdzaq dawrdawr-euq baqda’nae, aqdui, Miqyaer-euq maeqshi myavpyawq narmaer za-eu maqngeur-a. Aqdui dzaq nar-aq muiqdzaeq lar-eu maqngeur-aer, maqdzaq nar-aq doerdzaeq-ir-eu laer khawf maqngeur-a.

⁹ Aerkhawf, nawmaf mrkhmq mae laer mr-eu baqda’nae, ghaq baq-eu tsawrhaq-euq gharduq sanqtif tifduq maqya pyeuf-ir ni yanr-awq.

¹⁰ Nawr khoerlof-aer ghae-eu jeq-anr siqnya-eu tsawrganr anr-eu tsawrhaq gar nae, tanqpanq aqma mawrkawr jav-eu nymr-euq lafkhoer nuir-awr dzaqluf-eu gar, zaqsiq nuisiq ghaq baq-eu tiq ghaq mawr-euq nar-aq, aqyawf nuima khaqlar-awr, tanqpanq aqma mawrkawr-anr lawrnaeq-euq dzaqdzaq dawrdawr-anr dzaq-eu maqngeur-a lor?

¹¹ Nawr khoerlof-aer janr nar-aq, nawq-euq siqnya-eu tsawrganr khoer-euq baqda’nae, Kali nae shirdan-euq ghaq baq-eu tsawrhaq tiq ghaq cawv-ir-eu tsaq taef-a lor?

¹² Nawmaf, aqyuif aqnyir deuq-anr khoerlof-aer mrbanq-awr, aqyawf maf-euq ghaq baq-eu zaqsiq nuisiq-anr lavnar naeq-eu-aq, Kali-anr mrbanq-eu jeq pyeuf-eu mae.

¹³ Khoermirnae, dzaqdzaq dawrdawr-euq baqda’nae, ngar, ngaq-euq aqyuif aqnyir-anr sanqtif bitif-ir nar-aq, ngaq-euq aqyuif aqnyir sanqtif maqya tifni, aqkar nar-aq, ngar shaqjir tiqjawr-iq maqpar dzaq ma.