1 Gawˇliˬtu 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Oermr Bar-eu Garkawv

¹ Nawmaf nae ngaq-anr sanqbof bofnaeq lef-euq garkawv-anr tafler-awr nae ngar heulof-aer aer-eu ma, “Zaqyo aqli-aq, zaqmiq aqbur-anr maq toeqcivni jawrnya nar-aq yawmuiq mae.”

² Aerkhawf, banq-awr khaqmiq sheu-eu jeq javluf-eu mirnae, zaqyo aqli yawqghaq navluf miqzaq sheuq-awr, zaqmiq aqbur yawqghaq navluf khawf khaqdzerzaq baw-eu tsaq mae.

³ Khaqdzerzaq-aq, yawqha-euq miqzaq-anr ghoer-awr mrnaeq paq-aer ghae-eu lof-aer tsaqtsaqni mrnaeq-awq. Miqzaq ghaq khawf yawqha-euq khaqdzerzaq-anr khoerlof-aer mrnaeq-awq.

⁴ Miqzaq ghaq-euq mawrdo-aq, miqzaq ghaq-euq navni maqjav-aer, khaqdzerzaq ghaq-euq navni jav-eu mae. Khoergar durni, khaqdzerzaq ghaq-euq mawrdo khawf, khaqdzerzaq ghaq-euq navni maqjav-aer, miqzaq ghaq-euq navni jav-eu mae.

⁵ Dzardzaq sheuq-awr guiqlanq shar-eu gharduq, nyiq ghaqluf nuima tsaq-awr tiqkhaeq lafkhoer, maq yuftaf-eu laer maqngeur nar-aq, miqzaq yozaq-euq yawkaq maq yuftaf laer aer-eu maqtsaq-a. Khoer dzeur-euq nar-aq par yuftaf-awq. Heu-aq, nawmaf, yawqha-euq nuima-anr maq ghaqler-aer jawr ngae, naef Saqdaq, nawmaf-anr maqbi murni khmq-eu jeq pyeuf-eu mae.

⁶ Aerkhawf, ngar heulof-aer aer-eu-aq, nawmaf-anr dawq bif-eu maqngeur, nawmaf-anr arnmq bif-eu ma.

⁷ Tsawrhaq yawqghaq navluf ngar lof-aer bi pyeufmawf mir-a. Aerkhawf, Miqyaer nae tiqghaq-anr tiqjeq-aer biftaq-euq lafsawq maq durler-a. Tiq ghaq heujeq za-awr, tiq ghaq khoerjeq za-euq mae.

⁸ Ngar lof-aer jawrnya nar-aq muiq taef-a laer, oermr maqbar-euq tsawrhaq hawr-eu miqcoeq miqma deuq-anr ngar aer-eu ma.

⁹ Aerkhawf, yawqha-euq nuima-anr maq ghaqler nar-aq, oermr bar-eu tsaq mae. Aqjeq mirnae aernar-aq, yuftaf jawrtaf mawf-eu nuikhanr nae bipuiv-eu navmaqtser, oermr bar-eu-aq muiqdzaeq-eu mae.

Oermr Bar-euq Sarjax-anr Zif-awq

¹⁰ Ngar, oermr bar-euq deuq-anr dawq bif-eu ma. Aqdir aernar-aq, ngaq-euq dawq maqngeur, Sanqpaq Miqyaer-euq dawq mae. Miqzaq-aq, yawqha-euq khaqdzerzaq-anr nae taqghawq-ir.

¹¹ Ghawq-euq ngeur nar-aq, yawqzanryawq taqir. Maqngeur nar-aq, yawqha-euq khaqdzerzaq naeq-aer par danqdzaq khof-awq. Khaqdzerzaq khawf yawqha-euq miqzaq-anr maqya khof-a.

¹² Ngar nuideuq-anr heulof-aer aer-eu ma. Sanqpaq Miqyaer-euq dawq maqngeur-a. Kalizaq tiq ghaq, yawqha-euq miqzaq maqjan-eu khawf, aqyawf-euq miqzaq, aqyawf naeq-aer jawrmawf nar-aq maqya khof-a.

¹³ Kalizaq tiq ghaq, yawqha-euq khaqdzerzaq maqjan-eu khawf, aqyawf-euq khaqdzerzaq, aqyawf naeq-aer jawrmawf nar-aq maqya ghawq-a.

¹⁴ Aqjeq mirnae aernar-aq, maqjan-eu khaqdzerzaq, yawqha-euq miqzaq-euq baqda’nae lavshawr ghaq-euq mae. Maqjan-eu miqzaq khawf, yawqha-euq khaqdzerzaq-euq baqda’nae lavshawr ghaq-euq mae. Khoerlof-aer maqngeur nar-aq, nawmaf-euq zaq maqshawr-a. Aerkhawf, nymq-mr-aq, aqyawfmaf yawshawr mae.

¹⁵ Maqjan-eu miqzaq hawr-eu khaqdzerzaq ghaq ghawqmawf nar-aq ghawq luf-ur. Khoerlof-aer ghawq nar-aq, Kalizaq pyeuf-eu khaqdzerzaq hawr-eu miqzaq, aqyawf-anr ghawq-euq khoerghaq-euq zaqkhav maqpar ngeur-eu mae. Aerkhawf, Miqyaer, aqdui-anr bitsaq bi dzoerler-eu gharduq kur-euq mae.

¹⁶ Miqzaq deuq-or! Nawq-euq khaqdzerzaq-anr maqbi buq-ir nya-a laer nawr aqjox-aer siqnya-eu? Khaqdzerzaq deuq-or! Nawq-euq miqzaq-anr maqbi buq-ir nya-a laer, nawr aqjox-aer siqnya-eu?

Pyeufyaf-euq Lof-aer Pyeuf-awq

¹⁷ Sanqpaq Miqyaer nae tiqghaq sair tiqghaq-anr birnaeq taq-euq lof-aer daef-awr, Miqyaer nae tiqghaq sair tiqghaq-anr kur ngae, kharpyeuf-eu lof-aer daefghae-awq. Ngar, Kalizaq armur yawqmur navluf-anr khoerlof-aer khaerluf-eu ma.

¹⁸ Miqyaer, tsawrhaq tiqghaq nav-anr kur ngae, bawkhov maeqdzaq yaeqdzeur-euq ngeur nar-aq, maqyaeq-euq taq janrgeuf. Tsawrhaq tiqghaq nav-anr kur ngae, bawkhov maeqdzaq maqyaeq-euq ngeur nar-aq, maqya yaeq-ar.

¹⁹ Bawkhov maeqdzaq yaeq-euq khawf, maqyaeq-euq khawf tiqjeq-iq gardanr tsoeq-eu maqngeur-a. Miqyaer-euq zanrdawq khofdawq-anr mrcaw-eu taef-aer gardanr tsoeq-eu mae.

²⁰ Miqyaer tiqghaq sair tiqghaq-anr kur ngae, kharpyeuf-euq lof-aer pyeuf-eu tsaq mae.

²¹ Miqyaer, nawq-anr kur ngae, nawr zaqkhav geufluf-eu le lor? Khoer-anr khanq taqlanr. Aerkhawf, buq-ir nya nar-aq, buq-ir-eu muiqdzaeq taef-a.

²² Aqjeq mirnae aernar-aq, zaqkhav geufluf ngae, Sanqpaq Miqyaer kur-euq tsawrhaq-aq, Sanqpaq Miqyaer-euq buq-ir-euq tsawrhaq pyeuf-eu mae. Khoerlof-aer durni, buq-ir-euq tsawrhaq pyeufluf ngae, Sanqpaq Miqyaer kur-euq tsawrhaq-aq, Kali-euq zaqkhav pyeuflar-euq mae.

²³ Arpoeq bif-awr nawmaf-anr zeurtsaev taq-euq mirnae, tsawrhaq-euq zaqkhav taqgeuf.

²⁴ Aqyuif aqnyir deuq-or! Miqyaer, nawmaf tiqghaq sair tiqghaq-anr kur ngae, kharpyeuf-euq lof-aer Miqyaer naeq-aer khoerlof-aer daef-awq.

Zaqguq Hawr-eu Miqcoeq Miqma

²⁵ Zaqguq deuq-euq garkawv-anr tafler-awr Sanqpaq Miqyaer nae bif-euq dawq ngar maqza-aq. Aerkhawf, Sanqpaq Miqyaer, ngaq-anr ghawqshaq gaq-eu mirnae, ngaq-anr jancoer paq-aer ghae-eu tsawrhaq bi pyeuflar naeqlaf-euq lof-aer, ngaq-euq nuinoeq nawmaf-anr ja’naeq nyar.

²⁶ Nymq-mr-aq, zawr shaq-eu aryamq pyeuf-eu mirnae, tsawrhaq yawqghaq navluf yawqha khar pyeufluf-eu lof-aer daefghae-eu tsaq taef-a laer ngar noeq mir-a.

²⁷ Nawr, miqzaq baw-eu ngeur nar-aq, khof-eu garma taqpov. Nawr, miqzaq maqbaw-eu ngeur nar-aq taqsheuq.

²⁸ Nawr, miqzaq sheuq-eu law-awr khawf iqbax mr-eu maqngeur-a. Miqdaf dafshawr danqdzaq-ir-eu khawf iqbax mr-eu maqngeur-a. Aerkhawf, khoerlof-aer mr-eu tsawrhaq-aq, shiqshaq paw yashaq yazanq taef-a. Ngar, nawmaf-anr khoerdeuq maqbi daqmawf nya.

²⁹ Aqyuif aqnyir deuq-or! Ngar, nawmaf-anr heulof-aer aernaeqmawf mir-a. Ghawqmyanrni maqpar ca-eu mae. Nymq-mr nae nar-aq, miqzaq baw-eu tsawrhaq, miqzaq maqbaw-eu lof-aer daef-awq.

³⁰ Tsawrngoer ngoerluf-eu tsawrhaq, maqngoer-eu lof-aer daef-awr, laqkhaq caer-eu tsawrhaq, laqkhaq maqcaer-eu lof-aer daef-eu uqtaf, myawq zeur-eu tsawrhaq, myawq maqjav-eu lof-aer daef-awq.

³¹ Mirtsaq-anr tafler-eu jeq zmq-eu deuq, maq zmqbanqni daef-awq. Aqjeq mirnae aernar-aq, mirtsaq heu-anr taf-eu deuq byov-ir luf-eu mae.

³² Ngar, nawmaf-anr khanq maqbi lanrmawf nya. Miqzaq maqbaw-eu tsawrhaq-aq, Sanqpaq Miqyaer nuima tsaqni, Sanqpaq Miqyaer-euq gar aqjox-aer mr-eu paq nga laer sharnoeq-eu mae.

³³ Aerkhawf, miqzaq baw-eu tsawrhaq-aq, aqjox-aer ghae-awr yawqha-euq miqzaq nuikhanr bishir-eu paq nga laer mirtsaq-anr taf-eu jeq-anr khanqlanr-eu mae.

³⁴ Khaqdzerzaq baw-eu zaqmiq aqbur hawr-eu miqdaf dafshawr yawkaq beugar-eu jeq jav-eu mae. Maq danqdzaq-ir-euq zaqmiq aqbur-aq, Sanqpaq Miqyaer-anr taf-eu jeq-anr taef-aer sharnoeq-awr, aqyawf-euq mawrdo hawr-eu saflar yawshawr shawr-aer daefnya-eu mae. Aerkhawf, danqdzaq-ir-euq zaqmiqzaq deuq-aq, aqjox-aer ghae-awr yawqha-euq khaqdzerzaq nuikhanr bishir-eu paq nga laer mirtsaq-anr taf-eu jeq-anr khanqlanr-eu mae.

³⁵ Ngar heulof-aer aer-eu-aq, nawmaf-anr gardanr bitsoeqni aer-eu ma. Ngar, nawmaf-anr paftawf-eu maqngeur-eu, nawmaf-anr lavbanq lar-eu jeq maqbi jav-aer, mr paq-aer ghae-eu lof-aer Sanqpaq Miqyaer-euq gharduq yawmuiq-aer bi mrnya-eu gharduq aer-eu ma.

³⁶ Aqda tiq ghaq, aqyawf-euq zaqmiq danqdzaq-ir yamq dzeur-euq mirnae, aqyawf mrlaeq-euq mir-a laer noeq nar-aq, aqyawf mrmawf-eu lof-aer mr-eu tsaq mae. Aqyawf, aqyawf-euq zaqmiq-anr bi danqdzaq-ir nya taef-a. Khoerlof-aer janr-eu-aq, iqbax mr-eu maqngeur-a.

³⁷ Aerkhawf, aqda ghaq nuima zif-awr, yawmawf maqjav-eu uqtaf, yawqha-euq nuikhanr-anr uvlanr nya-awr, aqyawf-euq zaqmiq-anr maqbi danqdzaq-ir laer nuima-euq lafkhoer noeqtsaev taq-euq khoer-aq, yawmuiq jeq mr-eu jeq pyeuf-eu mae.

³⁸ Khoermirnae, yawqha-euq zaqmiq-anr bi danqdzaq-ir-eu-aq yawmuiq mae. Aerkhawf, aqyawf-anr maqbi danqdzaq-ir-eu-aq par muiqdzaeq-eu mae.

³⁹ Zanr jav-eu lof-aer nar-aq, zaqmiqzaq-aq, yawqha-euq khaqdzerzaq khardaef-eu khoerkeuvni, yawqha-euq khaqdzerzaq naeq-aer ganrdzanq taq-euq mae. Khaqdzerzaq shir-euq nar-aq, danqdzaq-ir mawf-eu ghaq-anr danqdzaq-ir nya taef-a. Aerkhawf, Sanqpaq Miqyaer-euq lafkhoer jawr-eu tsawrhaq-anr taef-aer ya danqdzaq-ir-eu mae.

⁴⁰ Maq danqdzaq-ir ni jawrnya nar-aq, aqyawf-euq gharduq laqkhaq caerdzaeq taef-a laer ngar noeq mir-a. Ngar heulof-aer aer-eu-aq, Miqyaer-euq Saflar khawf nuima tsaq taef-a laer ngar noeq-eu ma.