1 Gawˇliˬtu 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Maq Mrkhmq-eu Jeq Mrluf-eu

¹ Nawmaf-euq lafkhoer, aqcawq tsawrjeuq tsawrca deuq ngaeq-eu taef-aer khawf maq ngaeqkeuv shaf-eu, banq-awr khaqmiq sheu-eu garkawv javluf-eu mae laer, ngar aqdir yagaq-euq ma. Khoer-aq, tsawrhaq tiq ghaq, aqyawf-euq aqma ma’nyir naeq-aer banq-awr joe-eu garkawv mae.

² Khoerlof-aer mrluf-eu tsawrhaq-anr nawmaf-euq lafkhoer nae taedov-eu gharduq, dawqkawq kawqkawq-aer tsawrngoer ngoer paq-aer ghae-eu khawf, nawmaf nuima huiqhuiq-aer parjawr nya-eu nga.

³ Ngaq-euq mawrdo nawmaf naeq-aer maqjawr-eu khawf, ngaq-euq nuima nawmaf jawr-eu gar javluf ma. Ngar, nawmaf naeq-aer jawr-eu lof-aer, khoerlof-aer mr-eu tsawrhaq-anr yarkhaq darnaeq dzeur-euq ma.

⁴ Nawmaf uiqler ngae, ngaq-euq nuima khawf nawmaf naeq-aer jav-eu ma. Aqdui-euq Sanqpaq Yeqsur Kali-euq tsawrmyanr-euq uqmov, aqdui-euq Sanqpaq Yeqsur Kali-euq baoq-anr ghoe-awr,

⁵ khoerlof-aer mrluf-eu tsawrhaq shiqshaq paw cawv-ir ni, naef Saqdaq-euq aqlaf-euq lafkhoer a’naeq-awq. Khoerlof-aer janr-euq nar-aq, Sanqpaq Yeqsur-euq arnan-anr, Miqyaer, aqyawf-euq saflar-anr bibuq-ir taef-a.

⁶ Nawmaf khanqsaer jaev-eu maqtsaq-a. Daeqtseq uicuiv taef khawf, kaqmur tiq siq siqlanni-anr bi poqlar nya-eu mae laer nawmaf maq siqnya-eu le lor?

⁷ Nawmaf daeqtseq maqanr-eu kaqmur yawshuif tiq siq pyeuflarni, daeqtseq yawoer yurdov dzae-awq. Aqjeq mirnae aernar-aq, Kali, aqdui-euq gharduq lawrdan dzeur-euq, aqdui-euq Baqsaqkaq yawrzaq pyeuf-eu mae.

⁸ Khoermirnae, aqdui Baqsaqkaq yawbuibui ngae, daeqtseq yawoer maqdawvni, yawdoer jeq hawr-eu yawcawv jeq-anr taf-eu daeqtseq khawf maqdawv-aer, daeqtseq maqdawv-aer shawrjaevni ghae-eu nuima hawr-eu, yawtsaq yawdawr nae janr-euq kaqmur nae yawbuibui kar-eur.

⁹ Ngar, nawmaf-anr sanqbof bofanr lef-awr, maqtsaq-eu lafkhoer banq-awr joe-eu tsawrhaq naeq-aer cawq taq cawqtaf laer aernaeq-euq ma.

¹⁰ Ngar khoerlof-aer aer-euq-aq, mirtsaq-anr taf-eu, maqtsaq-eu lafkhoer banq-awr joe-eu deuq, aqcawq-euq myawq-anr maerjuir juir-eu deuq, aqcawq-euq myawq-anr khaeqgeuf khavgeuf-eu deuq hawr-eu, tanqpanq aqma mawrkawr-anr uqduq tanq-eu deuq-anr aermawf-eu maqngeur. Heudeuq naeq-aer cawq taq cawqtaf laer aer-eu ngeur-eu law nar-aq, nawmaf, mirtsaq heu-anr nae yadov-ir-eu mae.

¹¹ Aerkhawf, nymq-mr ngar, nawmaf-anr bofanr lef-euq heu-aq, aqyuif aqnyir Kalizaq ma laer aer-eu gar nae, maqtsaq-eu lafkhoer banq-awr joe-eu, aqcawq-euq myawq-anr maerjuir juir-eu, tanqpanq aqma mawrkawr-anr uqduq tanq-eu, jabu jadoer-eu, jirbaq dawryaef-eu hawr-eu, aqcawq-euq myawq-anr khaeqgeuf khavgeuf-eu tsawrhaq naeq-aer cawq taq cawqtaf, aqyawfmaf naeq-aer dzaq khawf taq dzaqtaf laer bofanr lef-euq ma.

¹² Lafnyir paw jawr-eu tsawrhaq-anr yarkhaq dar-eu, ngaq-anr aqjeq taf-eu la? Nawmaf, lafkhoer paw jawr-eu tsawrhaq-anr yarkhaq yadar-eu maqngeur-a lor?

¹³ Aerkhawf, lafnyir paw jawr-eu deuq-anr-aq, Miqyaer yarkhaqdar taef-a. Khoermirnae, “Nawmaf-euq lafkhoer nae tsawrdoer-anr taedzae-awq.” (Dm 17:7)