1 Gawˇliˬtu 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaqkhaer Deuq Nae Mr-euq Gardeuq

¹ Nga’maf-aq, Kali-euq ghaqzaq ghaqkhaer pyeuf-awr, Miqyaer nae zaftaq-euq deuq-anr hawpir-eu tsawrhaq nga laer tsawrhaqzaq sawxnaeq laf-eu tsaq taef-a.

² Khoeruqtaf, hawpir-eu tsawrhaq geuf-eu deuq-aq, sarjax zif-eu tsawrhaq yapyeuf-eu mae.

³ Nawmaf maqngeur nar-aq, yarkhaq darnymr-euq tsawrhaq deuq, ngaq-anr yarkhaq darlar-eu-aq, huiq-eu garkawv maqngeur-a. Khoeruqtaf, ngar, yawqhar yawqha khawf yarkhaq maqdar.

⁴ Ngar, yawqha-euq yawlaeq tiqjeq-iq maq noeqdovnya nya. Aerkhawf, ngar khoerlof-aer maq noeqdov nya-eu mirnae, ngar mrshawr-euq tsawrhaq pyeuflar-euq maqngeur. Aqjeq mirnae aernar-aq, ngaq-anr yarkhaq dar-eu ghaq-aq, Sanqpaq Miqyaer mae.

⁵ Khoermirnae, aryamq maq keuvlar-euq minav-aer, Sanqpaq Miqyaer maqoe-euq nmrkaq, tiqjeq-anr-iq yarkhaq taqdar siq. Aqyawf oekeuv ngae, yawzanr-euq lafkhoer zaftaq-euq deuq yawbya-anr bi dovlar-awr, tsawrhaq-euq nuima khawf aqyawf panmawrnaeq taef-a. Khoerngae, Miqyaer, tsawrhaq yawqghaq navluf-anr geux-eu lof-aer jaceuqnaeq taef-a.

Kali-euq Gharduq Aqdzawq Argan Pyeuf-eu

⁶ Aqyuif aqnyir deuq-or! Nawmaf tiqghaq-iq nuima huiq-awr, tiq ghaq-anr muiq-awr tiq ghaq-anr doer-eu jeq maqya mr-aer, Yaerbof-anr boftaq-euq taf-aer maqbi mrdzaeq-eu gharduq, Aqpawrluv hawr-eu ngaq-anr dzawgeufni, nga’nyaf-euq garkawv sheucaev-awr bofanr lef-euq ma.

⁷ Aqsur ghaq nae nawmaf-anr bi beugar lar-euq la? Nawr bifnaeq laf-eu gar za-euq maqngeur-eu aqjeq jav-eu le? Nawr aqdir bifnaeq laf-eu gar za-euq ngeur nar-aq, maqngeur-eu lof-aer aqjeq mirnae nuima huiqluf-eu le?

⁸ Nawmaf yawqjeq navluf javlar-euq ngar-a! Smrmuiq khawf muiqlar-euq ngar-a. Nga’maf maqjawr khawf, nawmaf sanqpaq geuf-awr uvlanrnya lar-euq ngar-a. Nawmaf aqdir uvlanr-eu gar ngar geufmawf mir-a. Khoerlof-aer nar-aq, nga’maf khawf nawmaf naeq-aer tiqkawv lof-aer ya uvlanr taef-a.

⁹ Miqyaer-aq, ghaqkhaer pyeuf-eu nga’maf-anr, saef-awq laer yarkhaq dartsaev taq-euq tsawrhaq lof-aer, aqcawq-euq jeqnan nansaq bijawr naeqlaf-euq mae laer ngar noeq-eu ma. Khoermirnae, nga’maf-aq, mirtsaq-euq khoertav, mqtav ghaqkhaer hawr-eu tsawrhaqzaq hawnirghaduq pyeuflar-euq mae.

¹⁰ Nga’maf, Kali-euq gharduq aqdzawq argan pyeuf-eu khawf, nawmaf-aq, Kali-euq lafkhoer tsawrganr anr-eu tsawrhaq ngar-a! Nga’maf ghaq baq-eu khawf, nawmaf ghaq khav-eu ngar-a! Nga’maf-aq, hawteq hawdoer-eu gar yadaq-eu khawf, nawmaf-aq, myavpyawq narmaer jav-eu ngar-a!

¹¹ Nymq-mr keuvni, nga’maf hawq maef-awr ircuf maefluf-eu ma. Dmghaq dmlmr maqlof-aer, diqlar khovlar-eu gar daqluf-eu uqtaf, jawrduq maqjav-aer shaqluf-eu ma.

¹² Nga’maf, yawqha-euq aqlaf nae gar yawkhav-aer mrluf-eu ma. Aqcawq, nga’maf-anr yaqkhaer yaqlar-eu gar dawq ngaeqghae naeq-awr, aqcawq, nga’maf-anr khaeq-awr khavlar-eu gar nga’maf or-awr daqluf-eu ma.

¹³ Aqcawq, nga’maf-anr yaeqbawq-aer jadoer lar-eu gar dawq yawmuiq-aer ngaeqkhof naeq-euq ma. Nymq-mr keuvni, aqcawq, nga’maf-anr mirtsaq-euq yawjawf jeq hawr-eu yavdzae taq-euq yawqjeq navluf-euq javguv javmeuq lof-aer hawluf-eu mae.

Pawrluv, Kalizaq-anr Aqda Da’naeq-eu

¹⁴ Ngar heulof-aer bof-eu-aq, nawmaf bi shafdawr-ir-eu laer maqngeur. Ngar zawr gaq-eu zaq lof-aer sawx-awr bi yanrnya lar-eu laer bof-eu ma.

¹⁵ Kali-euq garkawv nawmaf-anr maeqnaeq-eu 10,000 ghaq jawr-eu khawf, aqda ghawqmya ghaq jawr-eu maqngeur-a. Aqjeq mirnae aernar-aq, ngar guiqlanqdawq maeq-awr, Yeqsur Kali-euq lafkhoer nawmaf-anr ngaq-euq zaq bi pyeuflar-euq ma.

¹⁶ Khoermirnae, ngaq-anr mrcaw-awq laer ngar, nawmaf-anr shar-eu ma.

¹⁷ Khoer baqda’nae, Sanqpaq Miqyaer-euq lafkhoer sarjax zif-awr, ngar zawr gaq-eu zaqyo Tivmorseq-anr nawmaf jawr-eu gar bilar-euq ma. Ngar, yawqgar navluf jawr-eu Kalizaq armur dawqtawv luf-anr maeqnaeq tsovnaeq-eu lof-aer, ngar, Kali-anr ghoe-awr mr-eu mrjeq sharkawv aqyawf, nawmaf-anr ja’noeq naeqlaf taef-a.

¹⁸ Tsawrhaq tiqpavnav deuq, ngar, nawmaf jawr-eu gar maqlar-ar laer noeq-awr nuima huiqluf-eu mae.

¹⁹ Aerkhawf, Sanqpaq Miqyaer nuima tsaq nar-aq, ghawqmyanr maqghae-aer, ngar, nawmaf jawr-eu gar lar ma. Khoerngae, ngar, nuima huiq-eu khoerdeuq dawq ngaeq-eu gar maqngeur-eu, aqyawf maf-euq baoq-anr haw ma.

²⁰ Aqjeq mirnae aernar-aq, Miqyaer uvlanr-eu jeq-aq, dawq ngaeq-eu gar taf-eu maqngeur-a, baoq-anr taf-eu mae.

²¹ Nawmaf aqjox-aer geufmawf-eu nya? Ngar, nawmaf jawr-eu gar darcuir yur-awr bi larmawf-eu nya lor? Maqngeur nar-aq, gaq-eu lafkhoer nuima nanqyuni bi larmawf-eu nya laq?