1 Gawˇliˬtu 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kali Shirdan-euq Garkawv

¹ Aqyuif aqnyir deuq-or! Arhu ngar, nawmaf jawr-eu gar oe-awr, Miqyaer-euq sarkir garkawv maeqle ngae, narhaq muiq-eu artiv yawgor-euq dawq hawr-eu zaqsiq tsawrganr anr-eu dawq ngaeqngaeq-aer maeq-euq maqngeur.

² Ngar, nawmaf naeq-aer jawr ngae, Yeqsur Kali-euq garkawv hawr-eu, aqyawf, lafyaq-euq khoertav bi tafsaef-euq garkawv maqngeur nar-aq, nuijeq tiqjeq-iq siqnya-eu maqgeuf laer ngar noeqtsaev taq-euq ma.

³ Ngar, nawmaf naeq-aer jawr ngae, ghaq tiqpawf-iq maqanr-aer, guv duidui-eu lafkhoer yawdzuq gan’gan-aer jawr-euq ma.

⁴ Ngar dawq ngaeq-eu khawf, dawqmaeq maeq-eu khawf, tsawrhaq-euq zaqsiq tsawrganr anr-eu dawq zmq-awr mur-euq maqngeur, muiq-eu Saflar hawr-eu baoq-anr ghoe-awr mrmaeq mrmawr naeq-euq ma.

⁵ Khoermirnae, nawmaf jan-eu jeq-aq, tsawrhaq-euq zaqsiq tsawrganr-anr ghoe-eu maqngeur-eu, Miqyaer-euq baoq-anr ghoe-eu tsaq mae.

Miqyaer Nae Panmaeq Naeqlaf-euq Deuq

⁶ Nga’maf saflar paw tsawrkhav khavlar-euq deuq-euq ghanrcae zaqsiq tsawrganr-euq garkawv ja-eu ma. Aerkhawf, heuzir-anr taf-eu zaqsiq tsawrganr maqngeur-eu, piq-ir byov-ir luf-eu heuzir-euq khoertav uvlanr-eu deuq-euq zaqsiq tsawrganr khawf maqngeur-a.

⁷ Dzeurlaf ngae zaftaq-awr daeqkaq taq-euq Miqyaer-euq zaqsiq tsawrganr-euq garkawv nga’maf jaluf-eu ma. Zaqsiq tsawrganr heu-aq, aqdui khanqsaer za’ni, mirtsaq heu maqbae-euq minav-aer Miqyaer nae noeqtsaev taq-euq mae.

⁸ Mirtsaq heu-euq khoertav uvlanr-eu deuq, tiqghaq-iq zaqsiq tsawrganr heu-anr maq siqnya-a. Aqyawfmaf siqnya lawnmr-aq, yawshaef khanqsaer huiq-eu Sanqpaq-anr maq tafsaef-ar.

⁹ Aerkhawf, Yaerbof aer-eu, “Myavnuiv maq mawrhaw-aer, naqbawr maq gaqhaw-euq uqtaf, tsawrhaq-euq nuima maq noeqkeuv coer-eu jeq, Miqyaer nae aqyawf-anr gaq-eu tsawrhaq-euq gharduq laeqhmq taq-euq mae.” (Isy 64:5)

¹⁰ Miqyaer-aq, aqyawf-euq Saflar-anr ghoe-awr, heudeuq aqdui-anr panmaeq naeqlaf-euq mae. Aqjeq mirnae aernar-aq, muiq-eu Saflar-aq, yawqjeq navluf-anr povtser haw-awr, Miqyaer-anr taf-eu naf duidui-eu jeq-anr khawf povtser dov-eu mae.

¹¹ Tsawrhaq tiq ghaq-anr taf-eu garkawv, aqyawf-euq lafkhoer jawr-eu saflar maqngeur nar-aq, aqsur ghaq siqnya-eu? Khoerlof-aer durni, Miqyaer-euq Saflar maqngeur nar-aq, Miqyaer-anr taf-eu deuq-anr tiqghaq-iq maq siqnya-a.

¹² Aqdui-aq, mirtsaq heu-euq saflar zataq-euq maqngeur, Miqyaer nae aqdui-anr yawqngaef-aer bifnaeq laf-euq guiqlanq deuq-anr siqnya’ni, Miqyaer-anr nae oe-euq muiq-eu Saflar zataq-euq ma.

¹³ Khoermirnae, nga’maf guiqlanq heudeuq-euq garkawv ngaeq ngae, tsawrhaq-euq zaqsiq tsawrganr maeq-eu lof-aer ngaeq-eu maqngeur, Yawshawr Saflar maeqnaeq laf-eu lof-aer ngaeq-eu ma. Saflar paw-euq garkawv ngaeq ngae, saflar paw taf-eu deuq-anr ciqcaev-awr ngaeq-eu ma.

¹⁴ Aerkhawf, Miqyaer-euq Saflar-anr taf-eu deuq-anr maq daefpov-euq tsawrhaq maq hageuf nya-a. Khoerdeuq-aq, aqyawf-euq gharduq aqdzawq argan-euq dawq lof-aer pyeuf-awr aqyawfmaf, garkawv heudeuq-anr maq ghovshaw nya-a. Aqjeq mirnae aernar-aq, saflar paw tserpav birpav nya-eu tsawrhaq taef-aer heudeuq-anr ghovshaw nya-eu mae.

¹⁵ Saflar paw-euq tsawrhaq-aq, yawqjeq navluf-anr tsermr nya-eu mae. Aerkhawf, aqyawf-anr-aq, tiqghaq-iq maq tsermr nya-a.

¹⁶ Aqjeq mirnae aernar-aq, “Sanqpaq Miqyaer-anr maeqnaeqler paq-aer aqyawf-euq nuinoeq nuima-anr siqnya-eu aqsur ghaq jawr-eu la?” (Isy 40:13) Aerkhawf, aqdui-aq, Kali-euq nuinoeq nuima anr-eu ma.