1 Gawˇliˬtu 16 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrshawr-euq Gharduq Pyur Tafuiq-eu

¹ Tsawrshawr deuq-euq gharduq pyurdamq yuruiq-eu garkawv-anr tafler-awr nae ngar heulof-aer aer-eu ma. Ngaq nae Gaqlaqtiv-anr jawr-eu Kalizaq armur deuq-anr khaertaq-euq lof-aer, nawmaf khawf mr-awq.

² Yawqjaw navluf-euq yawbae ngae nan, nawmaf yawqghaq navluf yawqha nae za-euq gar geuxni pyur yurdov-awr jeqhmq taq-awq. Khoerlof-aer janr nar-aq, ngar larkeuv ngae, pyur tafuiq-eu laer maqya ghae-ar.

³ Ngar larkeuv ngae, nawmaf nae sanqbof bof-awr khaerdov taq-euq tsawrhaq-anr ghoe-awr, nawmaf nae yuruiq taq-euq pyur khoer yur-awr, Yeqlursaqlaeq-anr bi shaha-ir ma.

⁴ Ngar khawf, ir paq-aer ghae nar-aq, aqyawfmaf, ngaq naeq-aer bi’oecaw taef-a.

Pawrluv Nae Noeqtaq-euq Garma

⁵ Nymq-mr ngar, Maqgeqdawrniv mirkhanq-anr cantsaev luf-eu ma. Ngar, Maqgeqdawrniv mirkhanq-anr cantsaev ghaq-euq nar-aq, nawmaf jawr-eu gar lar ma.

⁶ Ngar, nawmaf naeq-aer tiqkhaeq jawr-eu paq. Maqngeur nar-aq, tsanqgav yamq jawr jir-eu maqsiq laer noeq-eu ma. Khoernar-aq, ngar aqgeu paw ir-eu maqkaq, nawmaf, ngaq-anr maeqhu paw sheuqha-ir naeqlaf-eu gar noeqtmq-eu ma.

⁷ Nymq-mr ngar irtsaev lartsaevluf ngae, nawmaf-anr maq mawrmawf nya siq. Aerkhawf, Sanqpaq Miqyaer nuima tsaq nar-aq, ngar, nawmaf naeq-aer tiqkhaeq jawr ma laer noeqtmq taq-euq ma.

⁸ Aerkhawf, Beqdeqgordeq yawbui bui-eu aryamq keuvlar ngae keuvni, ngar, Erpersu-anr jawrtawq ma.

⁹ Aqjeq mirnae aernar-aq, gar yawmuiq-aer mrnya’ni, ngaq-euq gharduq larghov jerloni pantaq-euq mae. Ngar gar mr-eu gar lavtsoeq-eu tsawrhaq khawf ghawqmya’ni jawr-eu mae.

¹⁰ Tivmorseq, nawmaf jawr-eu gar lar nar-aq, aqyawf, nawmaf naeq-aer jawr ngae maqya guvni hawnaeq-awq. Aqjeq mirnae aernar-aq, aqyawf khawf, ngar lof-aer Sanqpaq Miqyaer-euq gar mr-eu mae.

¹¹ Khoermirnae, aqyawf-anr tiqghaq-iq maq hawdoer-aer, aqyawf, ngar jawr-eu gar ghofle-eu gharduq, aqyawf nuisar of-eu lafkhoer maeqhu paw sheuqha dovle naeq-awq. Aqjeq mirnae aernar-aq, aqyawf, aqyuif aqnyir deuq naeq-aer ghofle-eu gar ngar dawqluf-eu ma.

¹² Aqnyir Aqpawrluv-euq garkawv-aq heulof-aer mae. Ngar, aqyawf-anr aqyuif aqnyir deuq naeq-aer nawmaf jawr-eu gar le-awq laer yawkhav-aer shar-euq ma. Aerkhawf, nymq-mr keuvni-aq, aqyawf, nawmaf jawr-eu gar tiqpawf-iq maq larmawf nga siq. Aqjox-aer law-awr khawf, aryamq tsaqlar nar-aq aqyawf lar taef-a.

Arsaq Saq-eu Dawq

¹³ Nawmaf yawbeur beur-aer jawr-awr, jan-eu lafkhoer zifdanni yawf-awq. Nuima khaqduqni ghae-awr, ghaq khavlar-awq.

¹⁴ Nawmaf kharmr-eu yawqjeq navluf gaq-eu lafkhoer mr-awq.

¹⁵ Aqyuif aqnyir deuq-or! Ngar, nawmaf-anr shar ma. Saqteqpaqna paeqzaq-aq, Aqgaqyar-euq lafkhoer siqbae baele-euq arsiq pyeuf-awr, tsawrshawr deuq-euq guiqlanq-euq gar mr-eu laer, aqyawf maf-euq mawrdo a’naeq taq-euq garkawv nawmaf siqnya mae.

¹⁶ Nawmaf khoerlof-aer ghae-eu tsawrhaq-euq lafov, nga’maf naeq-aer gar yawkhav-aer mr-eu tsawrhaq hawr-eu, nga’maf-euq gar mrcawq yawqghaq navluf-euq lafov jawr-awq.

¹⁷ Saqteqpaqna, Pawqdurnav hawr-eu Aqgaqyaqgur aqha’maf, ngar jawr-eu gar oe-euq mirnae, ngar laqkhaqcaer duidui nya. Aqjeq mirnae aernar-aq, nawmaf nae maq mrluiv-euq jeq-anr aqyawfmaf mrbyan naeqlaf-euq mae.

¹⁸ Aqyawf maf-aq, ngaq-euq nuima-anr khawf, nawmaf-euq nuima-anr khawf bi sarlar-euq mae. Khoermirnae, heulof-aer ghae-eu tsawrhaq-anr noeqpoeq-awq.

¹⁹ Aqsir mircoer-anr jawr-eu Kalizaq armur deuq, nawmaf-anr dawqcawq puqanr laf-euq mae. Aqgurla hawr-eu Birgirla, aqnyaf dzerzaq naeq-aer aqyawf nyaf-euq nymr-anr dzoer-eu Kalizaq armur khawf, Sanqpaq Miqyaer-euq lafkhoer nuigaq keuv-awr, nawmaf-anr dawqcawq puqanr laf-euq mae.

²⁰ Aqyuif aqnyir yawqghaq navluf, nawmaf-anr dawqcawq puqanr laf-euq mae. Nawmaf tiqghaq tirghaq shawr-eu maeqsaw nae dawqcawq puq-awq.

²¹ Ngar-aq, Pawrluv ma. Dawqcawq puq-eu dawq heu-aq, ngaq-euq aqlaf nae bof-euq ma.

²² Aqsur ghaq maqkaq, Sanqpaq Yeqsur Kali-anr maqgaq nar-aq, aqyawf-euq khoertav yaqkhaer yaq-eu jeq keuvle luf-ur. Sanqpaq Yeqsur-or, oe-awq!

²³ Aqdui-euq Sanqpaq Yeqsur Kali-euq guiqlanq yawdzanr nawmaf-euq khoertav jav luf-ur.

²⁴ Yeqsur Kali-euq lafkhoer ngaq-euq gaq-eu jeq nawmaf yawqghaq navluf-euq khoertav jav luf-ur. Aqmeq.