1 Gawˇliˬtu 14 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqbav Bav-eu Hawr-eu Miqyaer Gharduq Ngaeqdan-eu

¹ Nawmaf gaq-eu jeq-anr taemi nya’ni laejae-awq. Saflar paw-euq lafsawq-anr khawf za’mawf-eu nuima anr-awr, dawqtawv luf-euq navmaqtser Miqyaer gharduq ngaeqdan mawf-awq.

² Dawqbav bav-eu tsawrhaq-aq, tsawrhaq-anr ngaeqcawq-eu maqngeur-a. Miqyaer-anr ngaeqcawq-eu mae. Aqjeq mirnae aernar-aq, tsawrhaq tiqghaq-iq aqyawf ngaeq-eu dawq-anr maq ghovshaw nya-a. Aerkhawf, aqyawf, saflar-euq lafkhoer zaftaq-euq deuq ngaeq-eu mae.

³ Aerkhawf, Miqyaer gharduq ngaeqdan-eu tsawrhaq-aq, tsawrhaq-anr ghaq bif-awr nuima bi sarlar-eu uqtaf, bihuiq bi manrlarni ngaeq-eu mae.

⁴ Dawqbav bav-eu tsawrhaq-aq, yawqhar yawqha taef-aer bihuiq bi manrlar-eu mae. Aerkhawf, Miqyaer gharduq ngaeqdan-eu tsawrhaq-aq, Kalizaq armur-anr bihuiq bi manrlar-eu mae.

⁵ Ngar, nawmaf yawqghaq navluf-anr dawqbav bi bavnya’mawf mir-a. Aerkhawf, nawmaf, Miqyaer gharduq ngaeqdan-eu gar ngar geufmawfdzaeq nya. Aqjeq mirnae aernar-aq, Kalizaq armur huiqlar manrlarni dawqbav bav-eu dawqtsuif maq yurdov nar-aq, Miqyaer gharduq ngaeqdan-eu ghaq-aq, dawqbav bav-eu ghaq navmaqtser gardanr tsoeqdzaeq-eu mae.

Dawqbav-euq Dawqtsuif Puir-eu Bijav-awq

⁶ Aqyuif aqnyir deuq-or! Ngar, nawmaf jawr-eu gar lar-awr, Miqyaer nae panmaeq-euq jeq hawr-eu siqnya-eu tsawrganr anr-eu dawq maqngaeq-aer, Miqyaer gharduq maq ngaeqdan-eu uqtaf, maqmaeq maqtsov-aer, dawqbav taef-aer bav nar-aq, nawmaf-euq gharduq aqjeq gardanr tsoeq-eu la?

⁷ Yawdaef maqngeur-eu jeq, coirloir hawr-eu deur-mq cuq khawf, tersar marjawvni maq dovlar nar-aq, aqjeq baw-awr aqjeq diqluf-eu nya laer aqjox-aer siqnya nmr-mq?

⁸ Darhae baw-eu tersar marjawvni maq dovlar nar-aq, guirdeuv deuv-eu gharduq aqsur ghaq laeqhmq-eu?

⁹ Khoergar durni, nawmaf dawq ngaeq ngae, aqcawq yaw’awq-aer siqnya paq-aer maqngaeq nar-aq, nawr ngaeq-eu dawq-anr aqjox-aer ghovshaw nya-eu? Khoerlof-aer ghae nar-aq, jaqlaer-anr ngaeqdzae-eu gar dur-eu mae.

¹⁰ Mirtsaq-euq khoertav dawqngaeq dawqbav ghawqmya jeq jav-eu ngeur-eu dur. Aerkhawf, dawqtsuif maqbaw-eu dawqngaeq dawqbav tiqjeq-iq maqjav-a.

¹¹ Khoermirnae, ngar dawq khoerdeuq-euq dawqtsuif maq siqnya nar-aq, dawq ngaeqluf-eu ghaq, ngaq-anr boermiq siqkhaq nga laer noeq-awr, ngar khawf aqyawf-anr boermiq siqkhaq nga laer noeq taef-a.

¹² Khoerlof-aer durni, nawmaf khawf saflar paw-euq lafsawq za’mawf-awr, nuima keuv-awr sharpovluf ngae, Kalizaq armur-anr bihuiq bi manrlar nya-eu lafsawq deuq-anr yawmuiq-aer zmqnya larni laejae-awq.

¹³ Khoermirnae, dawqbav bav-eu tsawrhaq-aq, dawqtsuif yurdov nya’ni guiqlanq shar-eu tsaq mae.

¹⁴ Ngar dawqbav bavbav-aer guiqlanqshar nar-aq, ngaq-euq saflar guiqlanq sharluf-eu mae. Aerkhawf, ngaq-euq ghovshaw nya-eu jeq gardanr maqtsoeq-a.

¹⁵ Tox-aer mar-iq, aqjox-aer janr-eu tsaq la? Ngar, saflar-euq lafkhoer guiqlanq shar-awr, ghovshaw-eu lafkhoer khawf guiqlanq shar-eu ma. Ngar, saflar-euq lafkhoer cardawq car-awr, ghovshaw-eu lafkhoer khawf cardawq car-eu ma.

¹⁶ Nawq-euq saflar nae taef-aer Miqyaer-anr jaceuqluf nar-aq, khoergar jawrluf-eu dawqbav maq siqnya-eu tsawrhaq, nawr jaceuq luf-eu dawq-anr maq ghovshawnya nar-aq, nawr jaceuq luf-eu gar, “Aqmeq” laer aqjox-aer aernya nmr-mq?

¹⁷ Nawq nae Miqyaer-anr jaceuq-euq dawq yawmuiq law-awr khawf, aqcawq-anr maqbi huiq maqbi manrlar nya-a.

¹⁸ Ngar, nawmaf yawqghaq navluf myavmaqtser dawqbav bavmyaq dzaeq-eu mirnae Miqyaer-anr jaceuq ma.

¹⁹ Aerkhawf, Kalizaq armur uiqler ngae, dawqbav armyaer dawq, bav-eu navmaqtser, ngar, aqcawq-anr maeqnaeq tsovnaeq nya’ni, ghovshaw nya-eu dawq ngaq dawq taef-aer ngaeq-eu geuf ma.

²⁰ Aqyuif aqnyir deuq-or! Ghovshaw nya-eu paw-aq, nawmaf, zaq lof-aer taqpyeuf. Aerkhawf, yawdoer jeq mr-eu paw-aq, zaq lof-aer pyeuf-awr, ghovshaw nya-eu paw-aq, tsawrkhav pyeuf-awq.

²¹ Zanrdawq boftaq-euq lafkhoer Sanqpaq Miqyaer aer-eu, “Ngar, aqcawq-euq dawqngaeq dawqbav bav-eu deuq hawr-eu, Aqcawq-euq maeqluq deuq-anr ghoe-awr, tsawrhaq heudeuq-anr dawqngaeq ngaeqnaeq ma. Khoerlof-aer ngaeqnaeq khawf, aqyawfmaf, ngaq-euq dawq maq narhaq-ar.” (Isy 28:11-12)

²² Khoermirnae, dawqbav bav-eu-aq, jan-eu tsawrhaq-euq gharduq maqngeur-aer, maqjan-eu tsawrhaq-euq gharduq bisiq bimawr-eu jeq pyeuf-eu mae. Aerkhawf, Miqyaer gharduq ngaeqdan-eu-aq, maqjan-eu tsawrhaq-euq gharduq maqngeur-aer, jan-eu tsawrhaq-euq gharduq mae.

²³ Khoermirnae, Kalizaq armur murlan-aer uiqler-awr yawqghaq navluf dawqbav bavluf ngae, maq siqnya-eu tsawrhaq hawr-eu maqjan-eu tsawrhaq urlar nar-aq, nawmaf, tsawruq uq-ir-euq nga laer maqaer-ar lor?

²⁴ Aerkhawf, yawqghaq navluf, Miqyaer gharduq ngaeqdan luf-eu gar, maqjan-eu tsawrhaq hawr-eu maq siqnya-eu tsawrhaq urlar nar-aq, Miqyaer gharduq ngaeqdan-eu tsawrhaq dawqtawvluf, aqyawf-anr gheupyawr-awr, aqyawfmaf dawqtawvluf, aqyawf-anr iqbax toeqmaeq taef-a.

²⁵ Khoermirnae, aqyawf-euq nuima-euq lafkhoer zaftaq-euq deuq khawf pandov laf-awr, myavpyawq, mirtsa tuvni awbyav-awr, Miqyaer-anr uqduq tanqtanq-aer, Miqyaer-aq, aqdir nawmaf-euq ghanrcae jawrluf-eu ngar-a laer aer taef-a.

Yawqjeq Navluf Shawqseuvni Mr-awq

²⁶ Tox-aer mar-iq, aqyuif aqnyir deuq-or! Aqjox-aer janr-eu tsaq la? Nawmaf uiqler ngae, yawqghaq navluf tiqghaq tiqjeq-aer car-awr jaceuq-eu, maeqnaeq tsovnaeq-eu, dawqbav bav-eu, panmaeq naeq-eu, dawqtsuif yurdov-eu, heudeuq mr-eu mae. Yawqjeq navluf aqcawq huiqlar manrlarni mr-awq.

²⁷ Dawqbav bav-eu tsawrhaq jawr nar-aq, nyiq ghaq maqngeur nar-aq, myaqdzaeq dzaeq-eu smr ghaq taef-aer bingaeq-awq. Khoeruqtaf, tiqghaq sair tiqghaq ngaeq-awr, dawqtsuif tiq ghaq bi yurdov-awq.

²⁸ Aerkhawf, Kalizaq armur uiqler ngae, dawqtsuif yurdov-eu tsawrhaq maqjawr nar-aq, dawqbav bav-eu tsawrhaq ciqcurni jawr-awr, yawqhar yawqha hawr-eu Miqyaer-anr taef-aer ngaeqcawq luf-ur.

²⁹ Miqyaer gharduq ngaeqdan-eu tsawrhaq nyiq ghaq smr ghaq bingaeq-awr, nuideuq-aq, dawq khoerdeuq-anr bi tsermr-eu tsaq mae.

³⁰ Khoergar nuirluf-eu tiqghaqnav, Miqyaer nae panmaeq-euq jeq za-euq ngeur nar-aq, yawbae ngaeqluf-eu ghaq ciqcurni naqler-eu tsaq mae.

³¹ Aqjeq mirnae aernar-aq, tsawrhaq dawqtawvluf dzawgeuf-awr ghaq za’ni, nawmaf yawqghaq navluf tiqghaq sair tiqghaq Miqyaer gharduq ngaeqdannya taef-a.

³² Miqyaer gharduq ngaeqdan-eu tsawrhaq-euq saflar-aq, Miqyaer gharduq ngaeqdan-eu ghaq-euq navni jav-eu mae.

³³ Aqjeq mirnae aernar-aq, Miqyaer-aq, yawbanq yawlanr-aer ghae-eu jeq bi dovlar-eu ghaq maqngeur-aer, tsawrshawr deuq-euq Kalizaq armur dawqtawv luf-euq lafkhoer jav-eu nuisar bif-eu ghaq pyeuf-eu mae.

³⁴ Kalizaq armur uiqler ngae, nawmaf-euq zaqmiq aqbur deuq ciqcurni bijawr-awq. Aqjeq mirnae aernar-aq, aqyawf maf-aq, dawq ngaeq-eu arnmq maqjav-a. Aqyawfmaf, zanrdawq aertaq-euq lof-aer lafof ya’aw-eu mae.

³⁵ Aqyawfmaf tiqjeqnav siqnya’mawf nar-aq, irkanr jawr ngae yawqha-euq khaqdzerzaq-anr narhaq luf-ur. Aqjeq mirnae aernar-aq, zaqmiq aqbur, Kalizaq armur-euq lafkhoer dawq ngaeq-eu-aq, shafdawr paq-aer ghae-eu mae.

³⁶ Miqyaer-euq dawq nawmaf-euq lafkhoer nae dovlar-euq la lor? Maqngeur nar-aq, nawmaf jawr-eu gar taef-aer oekeuv-euq la laq?

³⁷ Tsawrhaq tiqghaqnav, yawqha-aq, Miqyaer gharduq ngaeqdan-eu, maqngeur nar-aq, saflar paw-euq tsawrhaq ma laer noeq nar-aq, ngaq nae nawmaf-anr bofanr laf-euq jeq-aq, Sanqpaq Miqyaer nae bif-euq dawq ngar-a laer siqnya-eu tsaq mae.

³⁸ Aerkhawf, tiqjeq-iq maq siqnya’ni jawr-eu aqsur ghaq maqkaq, khoerlof-aer maq siqnya’ni bijawr-awq.

³⁹ Khoermirnae, aqyuif aqnyir deuq-or! Nuima keuv-awr Miqyaer gharduq ngaeqdan-eu lafsawq-anr geufmawf duidui-awq. Dawqbav bav-eu gar khawf taq lavtsoeq.

⁴⁰ Yawqjeq navluf shawqseuvni ghae-awr, aqyawf gar aqyawf tsaqni mr-awq.