1 Gawˇliˬtu 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Gaq-eu Jeq

¹ Ngar, tsawrhaq-euq dawqdeuq hawr-eu mqtav ghaqkhaer-euq dawq bavnya-eu khawf, gaq-eu jeq maqanr nar-aq, ngaq nae ngaeq-euq dawq-aq, boeloe diq-eu tersar hawr-eu caexlaer civ-eu tersar-anr dur-eu taef mae.

² Ngar, Miqyaer gharduq ngaeqdan-eu lafsawq za-awr, Miqyaer nae zaftaq-euq dawqtawvluf ghovshaw nya-eu uqtaf, yawqjeq navluf-anr siqnya-eu tsawrganr anr-awr, gawqjawq-anr bijiv-ir nya’ni jan-eu nuima tiqbyan anr-eu khawf, gaq-eu jeq maqanr nar-aq, ngar-aq, tiqjeq-iq gardanr maqtsoeq-a.

³ Ngar kharjav-eu myawqganq dawqtawvluf shaqzaq-anr bidzaq-eu laer bifjir-awr, ngaq-euq mawrdo miqdzaq-anr bi puivpeuq-eu khawf, gaq-eu jeq maqanr nar-aq, ngaq-euq gharduq tiqjeq-iq gardanr maqtsoeq-a.

⁴ Gaq-eu jeq-aq, nuinoeq ghawqmanrni noeq-awr, ghawqshaq gaqnya-eu mae. Gaq-eu jeq-aq, myav maqnav-aer, maq janrghae-eu uqtaf, nuima maqhuiq-a.

⁵ Gaq-eu jeq-aq, aqcawq-anr yaeqbawq-aer maqghae-aer, yawqha-anr muiqni taef-aer maqtov-eu uqtaf, nuima paerlar-eu maqkawr-aer, yawdoer jeq maqnoeq-a.

⁶ Gaq-eu jeq-aq, maqtsaq maqdawr-eu jeq-anr laqkhaq maqcaer-aer, yawtsaq yawdawr jeq-anr laqkhaq caer-eu mae.

⁷ Gaq-eu jeq-aq, dawqtawv luf-anr orcoer-awr, dawqtawv luf-euq lafkhoer jancoer-eu uqtaf, dawqtawv luf-euq lafkhoer noeqtmq coer-awr, dawqtawv luf-anr daqcoer-eu mae.

⁸ Gaq-eu jeq-aq, byov-ir-eu maqbaw-a. Aerkhawf, tiq nan, Miqyaer gharduq ngaeqdan-eu jeq byov-ir-awr, dawqbav bav-eu, naq-ir-eu baw-eu uqtaf, siqnya-eu tsawrganr khawf maqjav-aer pyeuf-ir taef-a.

⁹ Aqjeq mirnae aernar-aq, nymq-mr aqdui siqnya-eu maqbyan-aer, Miqyaer gharduq ngaeqdan-eu khawf maqbyan-a.

¹⁰ Aerkhawf, byan-eu jeq keuvle ngae, maqbyan-eu jeq byov-ir taef-a.

¹¹ Ngar, zaq pyeufluf ngae-aq, zaq lof-aer ngaeq-awr, zaq lof-aer ghovshaw-euq uqtaf, zaq lof-aer ngaeq-eu ma. Aerkhawf, ngar, tsawrkhav khavlar-euq nar-aq, zaq-anr taf-eu jeq-anr byaerdzaejir yaf-euq ma.

¹² Nymq-mr aqdui-aq, maq mawrshawr lar-eu pyawqhaw-anr hawluf-eu gar dur-eu mae. Aerkhawf tiqnan-aq, myavpyawq dzoer-awr ya mawrduq taef-a. Nymq-mr ngar siqnya-eu maqbyan-a. Aerkhawf, khoerngae nan keuvlar nar-aq, Miqyaer, ngaq-anr siqnya-eu lof-aer, ngar khawf tiqbyanni siqnyalar taef-a.

¹³ Nymq-mr-aq, jan-eu jeq, noeqtmq-eu jeq, gaq-eu jeq heu smr jeq jav-eu mae. Aerkhawf, heu smr jeq-euq lafkhoer nae huiqdzaeq dzaeq-eu jeq-aq gaq-eu jeq mae.