1 Gawˇliˬtu 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Saflar Paw-euq Lafsawq Deuq

¹ Aqyuif aqnyir deuq-or! Saflar paw-euq lafsawq deuq-euq garkawv, ngar, nawmaf-anr maq siqnya-aer maqbi ghaemawf nya.

² Nawmaf, Miqyaer-anr maqjan-eu tsawrhaq pyeufluf ngae, dawq maq ngaeqnya-eu tanqpanq aqma mawrkawr-anr nawmaf uqduq bi tanqni, aqcawq khar sheuqghae lar-eu lof-aer bi sheuqghae-euq garkawv khoer-anr, nawmaf siqnya luf-eu mae.

³ Khoermirnae, ngar, nawmaf-anr heulof-aer bi siqnya’mawf mir-a. Tsawrhaq tiqghaq-iq Miqyaer-euq Saflar-anr ghoe-awr nae, Yeqsur-anr yaqkhaer yaq-eu dawq maqngaeq-ar. Khoeruqtaf, Yawshawr Saflar-anr maqghoe nar-aq, Yeqsur-aq, Sanqpaq mae laer tsawrhaq tiqghaq-iq maqaer nya-a.

⁴ Lafsawq beugar-eu mae. Aerkhawf, muiq-eu Saflar-aq, tiq ghaq taef mae.

⁵ Guiqlanq-euq gar mr-eu jeq maq durler-a. Aerkhawf, Sanqpaq Miqyaer-aq, tiq ghaq taef mae.

⁶ Mrdov laf-eu jeq beugar-eu mae. Aerkhawf, tsawrhaq yawqghaq navluf-euq lafkhoer yawqjeq navluf mr-eu ghaq-aq, Miqyaer tiq ghaq taef mae.

⁷ Yawqghaq navluf-anr gardanr tsoeqni, muiq-eu Saflar nae yawqghaq navluf-anr tiq ghaq-anr tiq jeq byacaevni bifnaeq taq-euq mae.

⁸ Muiq-eu Saflar-aq, tiq ghaq-anr zaqsiq tsawrganr-euq dawq bif-awr, muiq-eu Saflar heughaq, tiq ghaq-anr-aq, siqnya-eu tsawrganr-euq dawq bif-eu mae.

⁹ Muiq-eu Saflar heughaq, tiq ghaq-anr jan-eu jeq bif-awr, muiq-eu Saflar aqyawf heughaq, tiq ghaq-anr-aq, nargawr deuq lavtaq-eu lafsawq deuq bif-eu mae.

¹⁰ Tiq ghaq-anr khavjeq-aer ghae-eu jeq bi mrnya-awr, tiq ghaq-anr-aq, Miqyaer gharduq bi ngaeqdan nya-eu uqtaf, tiq ghaq-anr-aq, saflar deuq-anr bi tserpav nya-eu mae. Tiq ghaq-anr, dawqbav ghawqmya jeq bi bavnya-awr, tiq ghaq-anr-aq, dawqbav khoer-euq dawqtsuif bi yurdov nya-eu mae.

¹¹ Aerkhawf, heudeuq dawqtawvluf bi pyeuflarni mr-eu ghaq-aq, muiq-eu Saflar mae. Aqyawf nuima tsaq-eu lof-aer, aqyawf ghaq aqyawf-anr daeqbirnaeq taq-euq mae.

Mawrdo-euq Arsaer Ghawqmya Jeq

¹² Mawrdo tiq do taef khawf arsaer ghawqmya’ni tsof-eu mae. Mawrdo-euq arsaer deuq ghawqmya’ni tsof-eu khawf, dawqtawvluf mawrdo tiq do taef-aer pyeuf-eu lof-aer, Kali khawf khoerlof-aer dur-eu mae.

¹³ Yurdav tsawrhaq hawr-eu Heqlaqsar tsawrhaq maqaer, zaqkhav hawr-eu buq-ir-euq tsawrhaq maqaer, aqdui dawqtawvluf mawrdo tiq do taef-aer pyeuflarni, muiq-eu Saflar tiq ghaq-euq lafkhoer taef-aer bartirsaq hageuf-awr, muiq-eu Saflar tiq ghaq-anr taef-aer dawrluf-eu ma.

¹⁴ Mawrdo-aq, arsaer tiq saer taef maqngeur-a, arsaer ghawqmya’ni tsof-eu mae.

¹⁵ “Ngar, aqlaf maqngeur-eu mirnae, mawrdo-anr maqtaf” laer aqkuir aernar-aq, aqyawf khoerlof-aer aer-eu mirnae, mawrdo-anr maqtaf-eu la lor?

¹⁶ “Ngar, myavnuiv maqngeur-eu mirnae, mawrdo-anr maqtaf” laer naqbawr aernar-aq, aqyawf khoerlof-aer aer-eu mirnae, mawrdo-anr maqtaf-eu la laq?

¹⁷ Mawrdo dolan-aer myavnuiv taef law nar-aq, tersar aqjeq nae narhaq-eu? Mawrdo dolan-aer naqbawr taef law nar-aq, yawsaf aqjeq nae baeflaf-eu?

¹⁸ Aerkhawf, Miqyaer, aqyawf nuima tsaq-eu lof-aer, arsaer yawqsaer navluf-anr yawqha-euq tsofduq tsofzar-anr bitsof-euq mae.

¹⁹ Dawqtawvluf arsaer tiq saer taef law nar-aq, mawrdo aqjox-aer baw-eu?

²⁰ Nymq-mr arsaer ghawqmya’ni baw-eu khawf, mawrdo tiq do taef mae.

²¹ Myavnuiv, aqlaf-anr, “Ngar, nawq-anr maqmawf” laer maqaer nya-a. Uqduq khawf aqkuir-anr, “Ngar, nawq-anr maqmawf” laer maqaer nya-a.

²² Khoer taef-aer maqngeur-a siq. Mawrdo-anr tsof-eu arsaer deuq-euq lafkhoer, yawnanq laer sawxtaq-euq deuq-anr ngeurdzaeq yabi tsof-eu mae.

²³ Mawrdo-euq lafkhoer khanqsaer maqjav-a laer aqdui sawxluf-eu arsaer deuq-anr-aq, nuideuq-anr navmaqtser khanqsaer javlarni janr-awr, maq hawmuiq-eu arsaer deuq-anr-aq, hawmuiq dzaeqlarni aqdui yajanr-eu mae.

²⁴ Hawmuiq-eu arsaer deuq-anr khoernav nav-aer lavsav-eu laer maqya ghae-ar. Miqyaer, arsaer deuq, mawrdo-anr yurgawftsaq ngae, khanqsaer maqjav-eu deuq-anr bi javdzaeq lar-euq mae.

²⁵ Khoer-aq, mawrdo-euq arsaer deuq ghawq-awr ghaer-eu jeq maqbi jav-aer, tiqsaer tirsaer ghawqshaq bigaq-eu gharduq mae.

²⁶ Arsaer tiq saer shaq-eu gar yadaq nar-aq, arsaer dawqtawvluf cawdaq-eu mae. Arsaer tiq saer khanqsaer za nar-aq, arsaer dawqtawvluf laqkhaq cawcaer-eu mae.

²⁷ Nawmaf-aq, Kali-euq mawrdo mae. Khoeruqtaf, aqyawf ghaqyawf tiq ghaq tiq saer pyeuf-eu mae.

²⁸ Miqyaer, tsawrhaq heudeuq-anr Kalizaq armur-euq lafkhoer bijawr-euq mae. Tif, ghaqkhaer deuq, nyif, Miqyaer gharduq ngaeqdan-eu deuq, smr, maeqnaeq tsovnaeq-eu deuq mae. Khoernar-aq, khavjeq-aer ghae-eu jeq mr-eu deuq, nargawr lavtaq-eu lafsawq za-euq deuq, aqcawq-anr cawba-eu deuq, dzoeqdzaq mr-eu deuq hawr-eu dawqbav ghawqmya jeq bav-eu deuq-anr bijawr-euq mae.

²⁹ Dawqtawvluf ghaqkhaer-a lor? Dawqtawvluf Miqyaer gharduq ngaeqdan-eu tsawrhaq-a laq? Dawqtawvluf maeqnaeq tsovnaeq-eu tsawrhaq-a lor? Dawqtawvluf khavjeq-aer ghae-eu jeq mr-eu tsawrhaq-a laq?

³⁰ Dawqtawvluf nargawr deuq lavtaq-eu lafsawq deuq za-euq la lor? Yawqghaq navluf dawqbav bavnya-eu la laq? Yawqghaq navluf dawqbav-euq dawqtsuif yurdov nya-eu la lor?

³¹ Aerkhawf, nawmaf muiq duidui-eu lafsawq deuq-anr nuima keuv-awr sharpov-awq. Ngar, nawmaf-anr dawqtawv luf-euq navmaqtser muiqdzaeq-eu garma toeqmaeq naeqnyar de-eq.