Roma 6 - Ashiri Aeuitaknup Iyohaichish Yona 1897

6 Ik.

¹ Yakun, hemanda chi ye kusu ne ya? Irenga aporore kuni gusu, rammakane katpak chi ki kusu ne ya?

² Ara shomo. Katpak otta rai okere chi utara anak ne hemanda tewa no nei ambe otta shiknu kusu ne ya?

³ Kiristo Yesu otta Baptisma akore chi utara anak ne obitta Shinuma rai-hi otta baptisma akore na sekorʼambe echi erampeutek ruwe he an?

⁴ Tambe gusu, chi utara anak ne baptisma gusu rai-hi otta Shinuma tura no aomare; Kiristo anak ne Michi nupeki gusu rai orowa no hotopo-a-shiknure korachi, chi utara ne yakka ashiri inotu oma wa apkash kuni gusu ne na.

⁵ Inambe gusu ne yakun, chi utara anak ne Shinuma rai-hi otta tura no an chiki, Shinuma hotopo-shiknu-hi otta ne yakka unepkoro ne ruwe ne;

⁶ chikoro onne ainu Shinuma tura no utasa chikuni otta akotukka, chikokatpak an netobake aisamka wa tewa no chikokatpak orun ausshiunere shomoki kuni gusu chi eraman wa an ruwe ne gusu ne na;

⁷ inambe gusu ne yakun rai okere guru anak ne katpak atusare ruwe ne gusu ne na.

⁸ Koroka, chi utara anak ne Kiristo tura no rai a chiki, Shinuma tura no shiknu kusu ne sekoro chi eishokonʼruwe ne.

⁹ Kiristo anak ne rai-i orowa no hotopo-a-shiknure wa kanna rai shomoki kusu ne; rai-i anak tewa no shinuma esapane shomoki ruwe ne, sekoro chi eraman.

¹⁰ Inambe gusu ne yakun, Shinuma ekot rai-ambe anak arashui ne katpak otta rai okere nisa ruwe ne: koroka, Shinuma

¹¹ ishu inotu anak Kamui otta shiknu ruwe ne na. Nei no korachi echi utara ne yakka yaikota anak katpak otta son no echi rai nisa ruwe ne sekoro esanniyo yan, koroka, Kiristo Yesu gusu Kamui otta ishu ruwe ne ani sanniyo yan.

¹² Tambe gusu, nei ambe kon rusuibe shomo echi ki kuni ne, koro rai kuni netobake ta iteki katpak esapanere yan;

¹³ shui, oupeka-sakbe ki kuni gusu an eshipopkep nei no iteki echi koro awehe katpak otta koropare yan; koroka, rai-i orowa no shiknu korachi Kamui otta yaikota yaiyange, orowa, oupekap ki kuni gusu an eshipopkep nei no echi koro awehe Kamui otta yange yan.

¹⁴ Katpak anak ne shomo echi esapane kusu ne; tuitak choropoketa okai utara shomo echi ne, koroka, irenga choropoketa echi okai ruwe ne gusu ne na.

¹⁵ Yakun, nekon a? Tuitak choropoketa shomo chi okai wa irenga choropoketa okai gusu, tambe gusu katpak chi ki kusu ne ya?

¹⁶ Ara shomo. Itaknu ki kuni otta yaikota echi yaikoropare wa yaiusshiunere guru gusu, katpak gusu an rai-ambe otta hene, oupekap gusu an uitaknu ambe otta hene, koro itak nu wa ki chiki, nei guru koro usshiune utara echi ne sekoro shomo echi eraman ruwe he an?

¹⁷ Koroka, Kamui koyaiiraige na; echi utara anak ne etoko wa katpak koro usshiune utara echi ne, awa, otta echi akore epakashi aikoikarape ramu-osshi wano itaknu ki utara echi ne nisa ruwe ne;

¹⁸ aige, katpak orowa no ahonnere wa oupekap otta ausshiune utara echi ne nisa ruwe ne.

¹⁹ Echi koro kam anak ne katchakbe ne ruwe ne gusu, kuani ainu ye korachi ku ye ruwe ne: inambe gusu ne yakun, echi utara anak ne ichakkere ambe gusu katpak wano katpak otta koro awehe echi usshiunere korachi, tewa no awehe aashkannere gusu oupeka-i otta usshiunere yan.

²⁰ Katpak koro ausshiune utara echi ne rapoketa, oupekap gusu oupeka sakbe echi ne nisa ruwe ne na.

²¹ Tane echi eyainikoroshma ambe gusu, nei rapoketa nekon a ibehe echi kon nisa ruwe he an? Nei okaibe gusu hetukup anak ne rai-ambe ne ruwe ne gusu ne na.

²² Koroka, tane katpak gusu ahonnere utara chi ne wa Kamui uitek utara echi ne gusu, ashkannere-i gusu an ibehe echi koro, nei oro hetukup anak ne shiokere shomoki inotu ne ruwe ne.

²³ Inambe gusu ne yakun, katpak gusu an pummaha anak ne rai ambe ne ruwe ne; koroka, Kamui sange eikrap anak ne chikoro Utarapa ne Yesu Kiristo otta ramma pakno shiokere shomoki inotu ne ruwe ne gusu ne na.