I Timoteos 4 - Ashiri Aeuitaknup Iyohaichish Yona 1897

4 Ik.

¹ Koroka, okake an pakihi ta sereke okai utara anak ne kokandama ramat newa nitne kamui utara koro epakashi inu hine shunge itak ki utara kankapkapeka

² ambe ankushkerai seisek kani ani korachi koro keutura auhuyeka wa eishokor-i gusu eyaikoemaka kusu ne ari Ramat anak irammataka ye ruwe ne;

³ nei utara matakore ambe hattoki hemhem ki, sonep eishokoro wa eraman utara iyaiiraige koro auina kuni Kamui kara aep gusu shomo ramnu ki ambe kashpaotte hemhem ki ruwe ne.

⁴ Kamui karape obitta pirika ruwe ne, aige, iyaiiraige an keutura ani auina yakun,

⁵ aemaka kuni ambe isam ruwe ne.

⁶ Eani anak ne tapan okaibe iriwak utara eshkarunde chiki, Kiristo Yesu koro pirika diakonos e ne wa, eishokor-i gusu an itak otta hemhem, e iki pirika epakashi otta hemhem areshpa guru e ne kusu ne na:

⁷ koroka, momok uwepekere newa bakko ramkoro an uwepekere eshishi yan.

⁸ Orowa, Kamui kooripakbe ani yaikota yairiterite yan: inambe gusu ne yakun, netobake gusu an yairiterite ambe anak ne pon no ka epirikare kunip ne, koroka, Kamui kooripak ambe anak ne nep ne yakka gusu epirikare kunip ne, aige, tane an inotu gusu ne yakka, okaketa an inotu gusu ne yakka eitakamkire aeoma an ambe ne ruwe ne gusu ne na.

⁹ Nei itak ambe anak ne sonep ne, auk kuni oupak an ambe ne na.

¹⁰ Tan ikkewehe an gusu chi utara anak ne monraige wa shiyuppa no iki, inambe gusu ne yakun, chi utara anak ne obitta no okai utara, makangane eishokor-i atte utara, koro kashiobiukip ne ishu Kamui gusu chipachipa ruwe ne na.

¹¹ Tap okaibe kashpaotte hemhem ki, epakashnu hemhem ki yan.

¹² Inan guru ne yakka iteki e paha ponbe esapse kuni ne ki yan; koroka, itak otta ne yakka, iki buri otta ne yakka, omap ambe otta ne yakka, eishokor-i otta ne yakka, turu-sakbe otta ne yakka, eishokoro wa okai utara gusu aekoikarabe ne yaikara yan.

¹³ Ku ek pakno, karabi-orooitak ambe, onishnishi ambe epakashnu ambe ki yan.

¹⁴ Puresbuteros utara koro teke e kashiketa aande-hi tura uweingara ambe ani akore an eikrap iteki isaika no koro yan.

¹⁵ Tap an okaibe gusu muchinashnu no iki yan; nei ambe orun ramne no yaikoropare yan; e ki ikip obitta no okai utara otta anukara kuni gusu ne na.

¹⁶ Yaikota gusu ne yakka e iki epakashnu ambe gusu ne yakka yaitubare yan. Tap okaibe oshiketa riya yan; inambe gusu ne yakun, tap ambe e ki chiki, eani anak ne yaikota ne yakka e nu utara ne yakka e kashiobiuki kusu ne na.