I Korintos 13 - Ashiri Aeuitaknup Iyohaichish Yona 1897

13 Ik.

¹ Usa okai ainu itak ani hene Kamui hauturumbe itak ani hene ku itak yakka, omap ambe ku sak chiki, humi ash shiunin kani hene, iyenenumba nyohachi hene korachi ku ne ruwe ne.

² Orowa, uweingara ku ki, nep ne yakka okai mukkep newa aeramu kuni ambe ku eraman yakka; shui, nupuri moimoyegere pakno an obitta no okai eishokor-i ku goro yakka, omap ambe ku sak chiki, raka isambe ku ne ruwe ne.

³ Orowa, utara ibere gusu obitta no okai ku korobe ku sange hene ki, auhuyeka gusu ku netobake kore hene ki yakka, omap ambe ku sak chiki, en epirikare shomoki ruwe ne.

⁴ Omap ambe anak ne ramushiporore wa ramuhaugep ne; omap ambe anak ne shomo eyaitunnap ki; omap ambe anak ne shomo shiokunnere,

⁵ shomo pittarane, shomo-yaikatanu ambe shomo ki,

⁶ yaikota korobe shomo hunara, shomo irushka, wenbe shomo esanniyo, oupeka-sakbe gusu shomo nupetne,

⁷ koroka, son no ambe tura enupetne ruwe ne; nep ne yakka kamure, nep ne yakka eishokoro, nep ne yakka echipachipa, nep ne yakka yaishiporore ruwe ne.

⁸ Omap ambe anak ne ramma pakno shomo aokere: koroka, uweingara ki ambe an chiki aisamka kusu ne; usa itak ani ye ambe an chiki aokere; aeramushbe an chiki aisamka kusu ne.

⁹ Inambe gusu ne yakun, nimara ani chi eraman, nimara ani uweingara chi ki,

¹⁰ koroka, aeramushinne okaibe ek chiki, nei nimara ani an okaibe anak ne aisamka kusu ne.

¹¹ Kuani anak ne pon guru ku an ita, pon guru korachi ku ye, pon guru korachi yainu, pon guru korachi ku esanniyo nisa ruwe ne: rupne guru pakno ku shukup an ita, pon guru okaibe oyak ta ku ande nisa ruwe ne.

¹² Inambe gusu ne yakun, tane anak ne homanno yaikunnukarabe ani chi nukara; koroka, nei ita anak ne uwenitomom no nukan kusu ne ruwe ne: tane anak ne nimara ani ku eraman; koroka, nei ta anak kuani ka ara a en aeraman korachi, ara ku eraman kusu ne.

¹³ Orowa, tane anak eishokor-i hemhem, chipachipa-ambe hemhem, omap-ambe hemhem an, tan re okaibe an; koroka, tap otta iyotta pasep anak ne omap ambe ne ruwe ne na.