Iyohaichish 83 - Ashiri Aeuitaknup Iyohaichish Yona 1897

83. Iyohaichish.

Shinotcha, Asap kara iyohaichish.

¹ AA Kamui, iteki mo no okai wa en kore: Aa Kamui; iteki shomo itak no okai, iteki mo no okai yan.

² Aokai epokba utara anak ne sakayo kara: Aokai etunne utara sapaha punire ruwe ne gusu ne na.

³ E koro utara gusu irara ukoramkoro ki, E koro nuina no okai utara epeka no ukoramkon ruwe ne.

⁴ Ene nei utara ye-hi:— Shinuma utara uirup shomo ne kuni ne, hetak, araki wa otuye yan; Israeru un utara reihei shomo aeshkarun kuni ne ki yanro, ani itak nisa ruwe ne.

⁵ Nei utara shine ikinne ukoramkon nisa, Aokai epeka no uitaknup kan ruwe ne.

⁶ Edom newa Ishmaeru un utara koro kash; Moab newa Hagar un utara;

⁷ Gebar newa Ammon newa Amarek; Piristia Turos un utara tura:

⁸ Assiria ne yakka nei utara tura okai; Nei utara anak ne Rot koro sanikiri ikashiu nisa ruwe ne. [Sera.]

⁹ Aokai anak ne Midian otta iki korachi nei utara otta ki yan; Kishon pet samta Sisera otta, Yabin otta aki korachi ki yan:

¹⁰ Nei utara anak ne Endor ta aisamka; Toitoi gusu an tumun korachi ne nisa ruwe ne.

¹¹ Nei utara koro pase utara Oreb newa Zeeb nei no kara yan; Ruwe un, obitta no okai nei utara koro sapane utara Zeba newa Zarmunna nei no kara wa en kore:

¹² Chi utara anak ne yaikota gusu Kamui koro ushi shikkashima yanro, ari an itak ani nei utara ye nisa ruwe ne.

¹³ Aa ku goro Kamui, nei utara ani uweshinoye koponchi korachi, Bera etoko an wattesh korachi ne kara wa en kore.

¹⁴ Nitai uhuye abe nei no, Nupuri uhuyeka abe nipek nei no;

¹⁵ Nei no korachi E koro itasayupke rera ani keseamba, E koro poro apto ani ishitomare wa en kore.

¹⁶ Aa Ehoba, nei utara anak ne E koro nanuhu hunara kuni ne, Sambe-kokuruse iporo omare.

¹⁷ Ramma pakno nei utara yainikoroshmawa akimatekte; Ruwe newa, nei utara sambe-akokurusere wa aisamka:

¹⁸ Tambe anak ne, Ehoba ari an reihei koro Aokai patek, Ingi-moshiri koro Iyotta Rikunbe E ne ruwe ne sekoro aeramande kuni an ambe ne ruwe ne na.