Iyohaichish 30 - Ashiri Aeuitaknup Iyohaichish Yona 1897

30. Iyohaichish.

Iyohaichish. Nei kenru ayange ita shinotcha ki kuni Dabid karape.

¹ AA Ehoba, Aokai anak ne en riknare nisa ruwe ne gusu, Ku iramye na, En epokba utara orowa no, shomo a en rapokikara kuni ne E ki nisa ruwe ne.

² Aa ku goro Ehoba Kamui, E orun ku konishuk nisa, awa, Aokai en iwangere nisa ruwe ne na.

³ Aa Ehoba, Aokai anak ne ku ramat Sheo wano yange; Iteki shui orun rap utara tura no ku ran kuni ne en shiknure nisa ruwe ne.

⁴ Aa ashkanne echi utara, Ehoba otta iyohaichish shinotchaki yan; Shinuma koro Ashkanne-i gusu yaiiraige ki yan.

⁵ Shinuma kinrakara ambe anak ne nisako ta patek an, Koro pirika irenga anak moshiri ko-hoppa pakno an ruwe ne: Onuman chish ambe anak ne reushi kuni ne ahun, Koroka, kunneiwano nupetne hawe an na.

⁶ Kuani anak, aeyaiepirikare an ita, Samma pakno shomo ku moimoyege kusu ne, ari ku itak.

⁷ Ehoba, Aokai anak ne irenga sange wa ku goro nupuri tumashnu no ashte nisa: E koro nanuhu E nuina gusu, ku chiukopoye nisa ruwe ne.

⁸ Aa Ehoba, E orun ku konishuk nisa; Ehoba otta ku koramkoro ku ki nisa ruwe ne:

⁹ Shui orun ku ran ita, ku kem gusu nep pirika ambe an a? Koponchi anak ne E ramye kusu ne ya? nei ambe anak E koro sonep assuru ashte ya?

¹⁰ Aa Ehoba, nu wa pirika irenga sange wa en kore: Aa Ehoba, en ikashiu wa en kore.

¹¹ Aokai anak ne ku ki yaituwashkarap itasare wa en rimsere nisa ruwe ne: Aokai ku goro aeshiyuk amip pita wa yainuchattek-i ani en kut-kore nisa ruwe ne.

¹² Tambe gusu ku ramat mo no an shomoki no iyohaichish E orun shinotchaki kusu ne. Aa ku goro Ehoba Kamui, otusashuishiri pakno ne yakka E ko-yaiiraige ash na.