Iyohaichish 143 - Ashiri Aeuitaknup Iyohaichish Yona 1897

143. Iyohaichish.

Dabid kava iyohaichish.

¹ AA Ehoba ku ki inonno-itak nu wa en kore; ku koramkorope gusu ikokanu wa en koi e: Aokai oupeka wa son no en orun ese wa en kore.

² Orowa, E tek-samata katpak isam no an shiknu guru isam ruwe ne; Tambe gusu, iteki E uitek guru esanniyo wa en kore.

³ En epokba guru anak ne ku kon ramat keshke; Shiri pakno ku inotu ko-shirikik; Ohon no uturuta rai wa isam utara nei no kunne ushiketa en oshiromare nisa ruwe ne.

⁴ Tambe gusu ku ramat anak ne en onnaigeta ramurai; Ku keutum anak irapokkari ruwe ne.

⁵ Fushko toho ku eshkarun; E ki ikip ku esanniyo; E tekehe ki ikip ku ramepakari ruwe ne.

⁶ E orun ku teke ku pirasa: Shingi toi korachi ku ramat anak ne Aokai eyaikate-kara. [Sera.]

⁷ Aa Ehoba tunashino en orun koese, ku ramat ramurai ruwe ne: En otta iteki E nanuhu nuina; Ikineipeka shui orun rap utara nei no ku an ruwe ne kusu ne na.

⁸ Kunneiwano E koro omap-an-ramuhauge-i en nure wa en kore; Kuani E eyaikopashte ash ruwe ne gusu ne na: Ku apkash kuni ruhu en eramande wa en kore; E orun ku ramat ku yange ruwe ne gusu ne na.

⁹ Aa Ehoba, en epokba utara orowa no en ohaitare wa en kore: En nuina kuni ne E orun ku kokira ruwe ne na.

¹⁰ Aokai anak ne ku goro Kamui E ne ruwe ne gusu, E korʼirenga ku ki kuni ne en epakashnu wa en kore: E kon ramat pirika ruwe ne; oupeka moshiri ta en ani wa en kore.

¹¹ Aa Ehoba, E reihei rengap gusu en shiknure wa en kore: Aokai oupeka wa gusu yairamhekomo ambe wano en etaye wa en kore.

¹² Orowa, omap-an-ramuhauge irenga sange wa en epokba utara otuye, Orowa, ku ramat eyairamshitnere utara ushtekka wa en kore; E koro uitek guru ku ne ruwe ne gusu ne na.