II Korintos 11 - Ashiri Aeuitaknup Iyohaichish Yona 1897

11 Ik.

¹ Ku ramat-sakbe gusu pon no echi eyaishiporore kuni ku kon rusui: son no poka en eyaishiporore echi ki nisa ruwe ne.

² Kamui san ikoitupa ambe ani echi utara gusu ku ikoitupa ruwe ne: inambe gusu ne yakun, shine hoku ne guru otta kuani echi kore okere, turu-sak-mat nei no Kiristo otta kuani echi yange ash kuni gusu ne na.

³ Koroka, ikineipeka nekon a ka, okokko irara wa Hefa kokandama korachi, echi koro keutum anak Kiristo epeka kuni gusu an sonep newa turu-sakbe gusu awende kuni ku ishitoma ruwe ne.

⁴ Hemanda gusu ne yakun, ek kushki guru anak ne shomo chi utara eupaskuma ash moshima an Yesu eupaskuma hene ki yakun, shui, teeda echi akore ramat moshima an ramat echi uk hene ki yakun, samata, shomo echi uk okere moshima an pirika shongo echi uina hene echi ki yakun,

⁵ eyaishiporore yak pirika Kuani anak ne nei iyotta pase Apostoro utara gusu pon no ka pokashnu guru shomo ku ne ruwe ne ari ku yainu ruwe ne gusu ne na.

⁶ Koroka, itak gusu ramat-sakbe ku ne a yakka, eramushbe gusu ramat-sakbe shomo ku ne; son no newa, echi utara gusu obitta no okai utara tumugeta nep ne yakka sarare ash nisa ruwe ne.

⁷ Samata, echi utara ariknare kuni ne kuani yaieoripakka hine oro sak no Kamui pirika shongo ku eupaskuma gusu katpak ku ki nisa mwe he an?

⁸ Kuani anak ne echi utara gusu yaishieiwangere kuni ne, moshima okai karisia orowa no pummaha ko-uk hine ko-ikka nisa ruwe ne;

⁹ orowa, echi tura no ku an wa eishiramnep an ita anak ne, inan guru ne yakka shomo ku iramu-ikurukurure nisa; iriwak utara Makedonia kotan orowa no araki ita ku eishiramnep eramushinnere nisa ruwe ne gusu ne na; orowa, nep ne yakka gusu iteki echi iramu-ikurukuru kuni ne ku yaishikkashima nisa ruwe ne; shui nei no ku an kuni ku yaishikkashima kusu ne na.

¹⁰ Kiristo koro sonep anak ne en onnaigeta an ne-hi korachi, Akaya moshiri ta tapan yaiomonnure ambe gusu inan guru ne yakka en onnere shomoki nangon na.

¹¹ Hemanda gusu? Kuani shomo echi omap ash ruwe ne gusu ne ya?

¹² Kamui eraman. Koroka, iki ika kon rusui utara gusu an ikkeu ku isamka kuni ne ku ki korʼan okaibe ikichi kushki na, otta nei utara yaiomonnure gusu, chi utara korachi nei utara anukara kuni gusu ne na.

¹³ Inambe gusu ne yakun, nei no okai utara anak ne chinore apostoro ne, kokandama ikichi utara ne, Kiristo koro Apostoro nep kuni ne yaikota yainere utara ne ruwe ne gusu ne na.

¹⁴ Tambe anak iyokunnure kuni ambe shomo ne; inambe gusu ne yakun, Satan poka yakota Kamui koro nupeki an hauturumbe nep kuni ne yainere ruwe ne.

¹⁵ Tambe gusu, shinuma otta yaishieiwangere utara ne yakka oupeka ambe otta yaishieiwangere kuni nep yainere chiki poro ambe shomo ne; nei utara gusu an okake an ambe anak ne koro ikichi ikip nei no an ambe ne ruwe ne.

¹⁶ Shui ku ye, inan guru ne yakka kuani anak ramat-sakbe ne sekoro iteki yainu yan; koroka, nei no aeyainu yakun, pon no ka ku yaiomonnure kuni ne, ramat-sakbe nei no en uk wa en kore.

¹⁷ Ku ye itak anak ne Utarapa orowa no an ambe nei no shomo ku ye, koroka, ramat-sakbe korachi nep, tapan yaiomonnure an asamaha an no iki ruwe ne.

¹⁸ Inne utara kam gusu yaiomonnure gusu, kuani ne yakka yaiomonnure ruwe ne.

¹⁹ Echi utara wayashnu gusu yaikopuntek no wayasap utara eyaishiporore ruwe ne.

²⁰ Inambe gusu ne yakun, nen ka echi usshiune kara, echi ruki, echi tekepashte, yaikota yairiknare, echi koro nanuhu kokik chiki, echi utara nei guru eyaishiporore ruwe ne.

²¹ Chi utara anak ne katchakbe ne korachi yainikoroshmarep ku ye na. Yakka, nen ne yakka nep otta ka rametokkoro chiki (wayasap no ku ye), kuani ne yakka rametok kon ruwe ne.

²² Nei utara anak ne Hebrai un utara ne ruwe? Kuani ne yakka ene ani ne. Israeru un utara ne ya? Kuani ne yakka ene ani ne.

²³ Abraham sanikiri ne ya? Kuani ne yakka ene ani ne. Kiristo otta yaishieiwangere utara ne ya? (ramu-isam guru korachi ku ye) Kuani naa kasu no ne ruwe ne: nei utara kasu no poron no ku iki; nei utara kasu no poron no upakashnu chisei ta ku an; poron no a en shirikik mashkin, kanna-kanna rai otta ku an ruwe ne na.

²⁴ Ashikne shuine Yudea un utara orowa no tu hotne shirikik otta shinep ehaita no a en kik an.

²⁵ Re shuine kuwa ani a en kik an, arashuine shuma ari a en piyekara an, re shuine ku mimam-awende ruwe ne, shine kunne-to shine tokap-to ututta oohoi otta ku an;

²⁶ kanna-kanna payekai an, pet gusu ayaikikipi an, ikka utara gusu ayaikikipi an, ku goro moshirʼun ukorachi an ainu gusu ayaikikipi an, oya moshirʼun utara gusu ayaikikipi an, machiya otta ayaikikipi an, nup otta ayaikikipi an, atui otta ayaikikipi an,

²⁷ shunge iriwak utara tumugeta ayaikikipi an, imontabire wa nuwap; kanna-kanna shiruwande ki, ibe rusui iku rusui, kanna-kanna shomo-ramnu ki, meraige newa atusa ruwe ne.

²⁸ Tap ku ye moshima kesto-kesto a en seire obitta no okai karisia gusu nishomap ambe an ruwe ne.

²⁹ Nen ka katchak wa kuani ne yakka shomo katchak ne ya?

³⁰ Nen ka aurechiure wa ku keutum shomo seisek ruwe he an? Kuani yaiomonnure ki gusu ne ap chiki, ku katchakbe gusu ku yaiomonnure kusu ne na.

³¹ Utarapa ne Yesu Kiristo koro otusashuishiri pakno anunuke an Michi ne Kamui anak ne, shomo shunge ku ki na sekorʼambe eraman.

³² Damaskos kotan ta Moshiri shikkashima guru ne Aretas pokta an sapane guru anak ne en kishima kuni ne Damaskos un utara koro machiya shiruwande nisa ruwe ne:

³³ awa, puyara kari tumama samta saranip oshike un a en orange wa shinuma koro teke ku ohaitare nisa ruwe ne na.