Hebraios 2 - Ashiri Aeuitaknup Iyohaichish Yona 1897

2 Ik.

¹ Tambe gusu chi utara anak ne anu okere orushpe gusu naa irammakaka ikokanu kunip ne, ikineipeka chi mom wa ehaita ruwe ne kusu ne na.

² Inambe gusu ne yakun, Kamui hauturumbe ani asange wa an itak aashtere wa an yak anak ne, aige, pishno an ehaitap newa shomo-itaknu ambe oupeka an no an pummaha akore yakun;

³ ene poro kashiobiuki-hi ikorampoktuye chiki, nekon a ahonnere ash kusu ne ya? Nei ambe anak ne atpaketa Utarapa orowa no aye, awa, nei ambe nu utara ani un orun sonnere nisa ruwe ne;

⁴ Kamui ne yakka shirosh newa iyokunnurep newa inne no okai kirorobe newa yaikota rengaine an mondum an nei no Ashkanne Ramat eimekbe newa ani nei utara tura no paweteshu ki nisa ruwe ne na.

⁵ Inambe gusu ne yakun, gusu aye ek kushki moshiri Shinuma anak ne hauturumbe otta itaknure shomoki nisa ruwe ne. Koroka,

⁶ nei ita an nep ushiketa paweteshu ki wa ene itak-hi :— Aokai orowa no aeshkarun kani gusu ainu anak ne nekon a ambe ne ya? Otta Aokai arapa kuni gusu ainu poho nekon a ambe ne ruwe he an?

⁷ Aokai ouse pon no patek hauturumbe kasu no shinuma pokashnure, Aige, araguru newa nupeki ani sapa unure ruwe ne, Orowa E teke ani akarape nei guru esapanere:

⁸ Nep ne yakka shinuma kema pokta E are nisa ruwe ne. Inambe gusu ne yakun, Shinuma anak ne obitta no okaibe nei guru otta itaknure nisa ruwe ne gusu, otta aitaknure shomoki ambe nep ne yakka isam ruwe ne na. Koroka, tane anukara chiki obitta no okaibe naa shomo Shinuma ko-itaknu.

⁹ Koroka, Kamui irenga ankushkeraipo pishno pishno okai ainu shirihine hauturumbe kasu no pon no pokashnu no akara hine rai ambe sapke wa, rai-i oma aeyairamshitnere ambe gusu araguru newa aeoripakbe ani sapa aunure Yesu chi nukara ash ruwe ne.

¹⁰ Inambe gusu ne yakun, gusu obitta no okaibe an, ankushkeraipo obitta no okaibe hetuku ambe auak ne inne no okai poho utara arakuru otta tura shiriki ita ayairamshitnere ki wa gusu nei utara koro kashiobiuki-hi hetukurep eramushinnere kuni oupak ruwe ne.

¹¹ Inambe gusu ne yakun, aturu-sakte shiriki utara newa turu-saktep anak ne obitta shinep orowa no an ambe ne: tambe gusu. Shinuma anak ne nei utara iriwak

¹² ani porose kuni yainikoroshma shomo ki; ene itak-hi :— Ku iriwak utara otta E reihei ku nure kusu ne; Karisia tumugeta E orun ramye shinotcha ku ki kusu ne na.

¹³ Orowa shui, kuani shinuma gusu eyaikopashte ash kusu ne. Orowa, shui, ingarʼan, kuani newa Kamui en kore poho utara ne.

¹⁴ Poho utara anak ne kem newa kam utura kon ruwe ne gusu, Shinuma yaikota ne yakka shem korachi nei ambe kon ruwe ne; tambe anak Shinuma rai ambe ani nitne kamui ari aye rai-i kiroro korobe isamka kuni gusu ne na;

¹⁵ samata, rai ambe koishitoma gusu moshiri koapkash rapoketa ausshiunere wa okai utara honnere kuni gusu ne na.

¹⁶ Inambe gusu ne yakun, Shinuma anak ne Kamui hauturumbe koro sanike kishima shomoki, koroka, Abraham koro sanike nep kishima nisa ruwe ne.

¹⁷ Tambe gusu, Shinuma anak ne nep ne yakka gusu koro iriwak utara nei no akara kuni oupakbe ne; tambe anak Shinuma utara koro katpak gusu imommuye kara kuni ne erampokiwen wa kore ikipniukesh Kamui korope gusu yaisbieiwangere esapane guru ne kuni gusu an ambe ne ruwe ne.

¹⁸ Inambe gusu ne yakun, Shinuma yaikota akoramnukara wa ayairamshitnere gusu, akoramnukara wa okai utara kaobiuki eashkai ruwe ne na.