Hebraios 12 - Ashiri Aeuitaknup Iyohaichish Yona 1897

12 Ik.

¹ Tambe gusu, chi utara ne yakka, tap korachi an nishkuru nepkoro inne paweteshu ki utara koro wa okai gusu, ene irammakaka un nikkotama obitta no okai aeoshirokokbap newa chikokatpak oyakta ande hine, yaishiporore wa un kotchaketa aatte wa an uwetushmak kuni ambe otta hoyuppa anro,

² aige, chikoro eishokor-i esapane hemhem ki, eramushinnere hemhem ki Yesu orun ingara anro, Shinuma anak ne yaikotchaketa aatte wa an enupetne kunip gusu, aeyainikoroshmarep pange hine, utasa chikuni eyaishiporore nisa, orowa, Kamui araset oshimon samta a shiriki an.

³ Echi utara anak ne iteki echi keutum ta ramu-rai hine echi shingi kuni ne, yaikota gusu chikokatpak utara iki ene upaure ambe eyaishiporore guru esanniyo yan.

⁴ Echi utara anak ne chikokatpak epeka yupki no iki wa kem oro pakno naa shomo eshishi ruwe ne:

⁵ samata, poho utara tura eukoyupekere korachi echi tura iki onishnishi ambe echi oira okere :— Ku poho, Utarapa sange shirikik ambe iteki isaika no esanniyo yan, Shui, Shinuma orowa no apakashnu chiki iteki ramurai yan;

⁶ Inambe gusu ne yakun, Utarapa anak ne omap guru pakashnu, Orowa, Shinuma uk obitta no okai poho shirikik ruwe ne gusu ne na.

⁷ Echi utara anak ne apakashnu gusu yaiyupupu; poho korachi Kamui echi gusu iki na; koro Michi orowa no shomo apakashnu poho inan guru ne ya?

⁸ Koroka, ani obitta no okai utara apakashnu ari an ambe ani echi utara shomo apakashnu chiki, chieappise echi ne wa poho shomo ne ruwe ne;

⁹ Shui, chikoro kara gusu an michi anak ne un pakashnu, aige, chi utara shinuma ko-oripak; yakun, naa kasu no un shiknure kuni ne ramat koro Michi otta ko-itaknu shomoki kusu ne ya?

¹⁰ Son no newa, nei utara kata rengaine irukai un pakashnu, koroka, Shinuma anak un pirikare gusu, Shinuma koro oupeka ambe a un koropare kuni gusu un orun iki nisa ruwe ne na.

¹¹ Nep shirikik ambe an yakka iki an rapoketa eyaikopuntek kuni gusu an ambe shomo ne wa eoknatara kuni gusu an ambe ne sekoro anukara; yakka, okake an koro nei ambe gusu apakashnu utara otta itomo an ibehe, oupeka an ambe, hetukure ruwe ne.

¹² Tambe gusu, rachichi teke shipeshte yan,

¹³ tusushke kokkasap ne yakka; orowa, hera ambe anak ne ru ohaita shomoki no aiwangere an kuni gusu, echi kemaha gusu kuwanno no an ruhu kara yan.

¹⁴ Obitta no okai utara epeka itomo noshpa yan, samata, sak no ne yakun nen ne yakka Utarapa shomo nukara aeashkamrere ambe noshpa yan:

¹⁵ nen ka Kamui irenga gusu eyaikoemaka guru an ya shomo ya irammakaka ingara yan; ikineipeka shiu shinrit ika hetuku wa echi keutum-chiukopoyere hene ki, ani inne utara turu-ushte hene ki na;

¹⁶ orowa, hoiyo ki guru hene, yaikota koro kuni eikeshkorobe shine rai no an aep oro gusu ehok Esau nei no an shomo oripak an guru hene an ya isam ya ingara yan.

¹⁷ Inambe gusu ne yakun, shinuma nei okaketa shinnunuke an ambe aeikeshkore rusui poka ki ita, nupe yaikorange tura nei ambe shiarikiki no hunara yakka (yaikokatpak kuni ushike shomo shinuma nukara gusu), aemaka nisa sekorambe echi eraman ruwe ne gusu ne na.

¹⁸ Inambe gusu ne yakun, echi utara anak ne atomooshma kuni ushike otta hene, abe ari uhuye ushike otta,

¹⁹ hene, ekureok an ushike otta hene, kunne-i otta hene, rera-mau-shiuyupu-i otta hene, rappa humi otta hene, orowa, itak hawe an ambe otta hene shomo echi koehange ruwe ne; nei hawe inu utara anak ne koramkoro wa otta kanna iteki itak an kuni gusu iki nisa ruwe ne;

²⁰ inambe gusu ne yakun, nei utara anak ne ene aekashpaottep sei eaikap; — Chikoikip poka nei nupuri tomooshma yakun akopiyekara kusu ne ari an ambe ne ruwe ne gusu ne na:

²¹ orowa, kuani shi no ishitoma wa tusushke shiriki ari an itak ani Mose ye pakno,

²² nei anukarape ashitoma ruwe ne: koroka, echi utara anak ne Sion nupuri otta, ishu Kamui koro machiya otta, kando un Yerusarem otta araki wa okai, orowa, inne topaha otta, Kamui hauturumbe uwekari otta,

²³ kando oshiketa auwatore an hoshiki no hetuku karisia otta, obitta no okai utara koipishi Kamui otta, aeramushinnere okere oupeka utara kon ramat otta echi araki wa okai,

²⁴ shui, ashiri aeuitaknup gusu an iyuturu oma Yesu otta, gusu Aberu korobe kasu no pirika okaibe ye achari kem otta echi araki wa okai ruwe ne.

²⁵ Itak sange shiriki an guru iteki ekatupase kuni ne yaitubare yan. Inambe gusu ne yakun, moshiri kata an wa nei utara anak ne epakashnu guru ekatupase chiki shomo aohaitare yakun, naa eitasa no chi utara anak kando wano un epakashnu guru eyaishishire chiki shomo yaiohaitare ruwe ne:

²⁶ Shinuma koro hawe anak ne moshiri shimoyere nisa: koroka, tane anak Shinuma eitakamkire wa ene itak-hi:— Kanna arashui ne Kuani anak ne moshiri patek shomo ne, koroka, kando ne yakka ku tusushkere kusu ne na.

²⁷ Orowa, tan :— Kanna arashui ne — sekorʼambe anak ne, akara okaibe nei no korachi an wa ashimoyere ambe anak oyakta aomande kunip ne sekorʼan ikkewe an itak ne, aige, shomo shimoyepa okaibe anak an kusu ne gusu ne na.

²⁸ Tambe gusu, ashimoyere eaikap moshiri a un kore gusu, kooripak ambe newa ishitoma ambe tura, ani Kamui nupetnere yaishieiwangere iyaiiraige an keutum koro anro:

²⁹ inambe gusu ne yakun, chikoro Kamui anak ne okaibe isamka abe ne ruwe ne gusu ne na.