Garatea 2 - Ashiri Aeuitaknup Iyohaichish Yona 1897

2 Ik.

¹ Orowa, ine pa ikashima wan pa okaketa kuani Titus ne yakka ani wa Barnabas tura shui Yerusarem kotan orun ku hemesu nisa ruwe ne.

² Awa, ku oraan-i anak ne a en nukare gusu ku oman nisa ruwe ne; aige, Oya utara tumugeta ku eupaskuma pirika shongo nei utara otta ku nure, koroka, pase ne aesanniyo utara otta arorokishne no ku nure, ikineipeka tambe anak kuani raka sak no shomo hoyupu korʼan hene ki, raka sak no shomo hoyupu okere hene ki gusu ne na.

³ Koroka, en tura no an Titus anak Herenes un guru ne a yakka okarituye buri akire kuni shomo aki ruwe ne:

⁴ nei ambe anak nuina no aahupte shunge iriwak utara gusu an ambe ne; nei utara un usshiune utara ne akara kuni ne, Kiristo Yesu otta chikoro rengaine an nrondum nukara kuni gusu arorokishne no ahup nisa ruwe ne:

⁵ pirika shongo oma sonep echi otta an kuni ne, nei utara otta shine pakihi pakno ka shomo chi utara koitaknu nisa ruwe ne.

⁶ Koroka, pase ne aesanniyo utara orowa (nei utara anak nekon a ambe ne a yakka, en gusu isam korachi ne: Kamui anak ainu ne nep koro shomo uk ruwe ne); nei pase ne aesanniyo utara anak nep ne yakka en kore shomoki ruwe ne,

⁷ sekoro, ku ye: koroka, shinnai kane, Petros otta okarituye buri akire utara gusu pirika shongo ashikkashimare korachi, shomo okarituye buri akire utara gusu nei pirika shongo a en shikkashimare ne sekoro nei utara nukara chiki (inambe gusu ne yakun,

⁸ okarituye buri akire utara gusu Petros otta iki Apostoro ne kara Kamui anak ne, Oya utara gusu en otta iki wa en kara nisa ruwe ne na);

⁹ orowa, en orun koropare an irenga nei utara nukara chiki, ikushpe ne aesanniyo wa an Yakob newa Kepas newa Yoannes anak ne iriwak ne kuni shimon tekehe en otta newa Barnabas otta koropare nisa ruwe ne, tambe anak nei utara okarituye buri akire utara otta paye, orowa, chi utara anak ne Oya utara otta paye ash kuni gusu an ambe ne:

¹⁰ ouse chi utara otek-sak utara eshkarun kuni ne nei utara kon rusui ruwe ne; nei no ku ki-hi anak kuani son no yuptek no ku iki ambe ne ruwe tapan na.

¹¹ Koroka, Kepas anak ne Antiok kotan ta ek ita, shinuma akokatpakte kuni guru ne wa gusu kuani shinuma kopao nisa ruwe ne.

¹² Inambe gusu ne yakun, Yakob orowa no utara araki etokota, shinuma anak ne Oya utara tura no ibe nisa ruwe ne: koroka, nei utara araki wa okai chiki shinuma okarituye buri akire utara ishitoma gusu, yaishietaye wa yaishinnaire nisa ruwe ne.

¹³ Shui moshima okai Yudea un utara ne yakka shinuma tura kankapkapeka ambe iki nisa ruwe ne; Barnabas kankapkapeka akire pakno nei utara iki nisa ruwe ne na.

¹⁴ Koroka, nei utara anak pirika shongo oma sonep nei no oupeka no shomo apkash ambe ku nukara chiki, obitta no okai nei utara kotchaketa Kepas otta ene ku itak-hi:— Aokai anak ne Yudea un guru a ne wa, Yudea un utara shomo ne no Oya utara korachi e an chiki, hemanda gusu, Oya utara anak Yudea un utara korachi okai kuni ne e ki ya?

¹⁵ Chi utara anak ne katpak koro Oya utara shomo chi ne wa,

¹⁶ ashikore wano Yudea un utara chi ne ruwe ne, yakka, ainu anak tuitak ikip gusu aoupekare shomoki no ouse Yesu Kiristo eishokoro ari an ambe ani aoupekare ne sekoro chi eraman gusu, chi utara ne yakka tuitak ikip gusu shomo ne wa Kiristo eishokoro ari an ambe ani a un oupekare kuni ne Kiristo Yesu eishokon nisa ruwe ne na. Inambe gusu ne yakun, inan kara aye yakka tuitak ikip gusu shomo aoupekare kusu ne gusu ne na.

¹⁷ Koroka, chi utara Kiristo otta aoupekare kuni chi hunara rapoketa, chi utara yaikota katpak koro utara ne anukara chiki, Kiristo anak ne katpak hetukure gusu yaishieiwangere guru ne ruwe he an?

¹⁸ Oara shomoki ruwe ne. Kuani teeda ku isamka okaibe shui ku kara chiki, kuani ohaita guru ne sekoro a en yaiesanniyo ruwe ne.

¹⁹ Inambe gusu ne yakun, Kamui gusu ku ishu kuni ne, tuitak ankushkerai gusu tuitak epeka ku rai nisa ruwe ne.

²⁰ Kuani Kiristo tura no utasa chikuni otta akotukka okere; yakka, ku ishu wa an; kuani shomo ne, koroka, en oshiketa Kiristo ishu ruwe ne: orowa, tane kam otta ku ishu inotu anak eishokoro ambe an gusu an ambe ne ruwe ne, nei ambe anak en omap wa en gusu yaiyange Kamui Poho gusu an ambe ne ruwe tapan na.

²¹ Kamui irenga shomo ku isamka; inambe gusu ne yakun, aoupekare ambe anak ne tuitak gusu an ambe ne chiki, Yesu raka-isam no rai nisa ruwe ne gusu ne na.