Epesos 6 - Ashiri Aeuitaknup Iyohaichish Yona 1897

6 Ik.

¹ Nokan utara, Utarapa gusu echi koro eshikop otta koitaknu yan:

² tambe echi ki kunip ne ruwe ne gusu ne na.

³ Aokai irammakaka ohonno moshiri koishu kuni ne e koro ona e koro unu ko-oripak yan (tambe anak uitaknu koro atpake an ikashpaotte ne ruwe ne na).

⁴ Orowa, Michi ne echi utara, iteki echi koro poho irushkare yan: koroka, Utarapa gusu an pakashnu ambe hene, onishinishi ambe hene ani reshpa yan.

⁵ Ausshiune an echi utara, Kiristo otta korachi, shine keutura koro wa tusushke newa ishitoma kane ki hine kara gusu an echi kon nishpa gusu koitaknu yan;

⁶ utara nupetnere anukara kuni gusu shomo ne no, koroka, sarabe osshi wano Kamui irenga ki hine Kiristo koro usshiune utara korachi ki yan;

⁷ irenga keutum koro wa utara otta korachi shomo ne no,

⁸ Utarapa otta iki korachi yaishieiwangere yan: aige, nep ne yakka pishno okai echi utara ki pirikap gusu, usshiune guru ne a yakka, rengaine an mondum koro guru ne a yakka shui nei ambe Utarapa orowa no

⁹ akore kusu ne na, sekoro uonnere yan. Orowa, nishpa ne echi utara, shinuma utara gusu nei no ki wa, iteki kosakayokara yan; aige, nei utara kon nishpa ne yakka echi kon nishpa ne yakka kando oshiketa an sekoro esanniyo yan, orowa, Shinuma anak ne ainu chari ainu kowen keutura shomo kon ruwe ne na.

¹⁰ Tewa no, Utarapa newa Shinuma koro kiroro oina tumashnu ambe gusu aeyaitumashnure no okai yan.

¹¹ Echi utara nitne kamui kokandama ambe esbishi eashkai kuni ne, Kamui hayokbe utomchiure yan.

¹² Inambe gusu ne yakun, chi ki ukotereke ambe anak ne kem newa kara tura ikip shomo ne, koroka, esapanep tura hene, mondum korobe tura hene, tapan kunne-i moshiri esapanep tura hene, kando un ushiketa okai wen ramat tura hene ukotereke ambe ne ruwe ne.

¹³ Tambe gusu, wen toho ta echi eshishi hemhem ki, orowa, obitta no okaibe kara wa echi roshki hemhem ki eashkai kuni ne, Kamui koro obitta no okai hayokbe koro yan.

¹⁴ Tambe gusu, echi roshki kane sonep ani kutkoro,

¹⁵ oupeka ambe ani rerara-kotukbe koro, itomo an pirika shongo etokooiki-hi ani chikiri otta eushi;

¹⁶ samata, ani nitnep koro obitta no okai abe-o ai ushka eashkai gusu an eishokor-i ari an kikhumbe koro yan.

¹⁷ Orowa, kashiobiuki-hi ani kane pon kasa ne koro, samata, Kamui itak ari an Ramat un rangetam ne koro yan;

¹⁸ shui, ramma-kane Ramat otta obitta no okai inonno newa koramkorobe ani inonno-itak ki, orowa, nei okaibe gusu shiure wa obitta no okai ashkanne utara gusu yaishiporore hine koramkoro,

¹⁹ samata, ku paroho ku maka wa pirika shongo gusu an anuina ambe ku eupaskuma ehonnai shomoki no a en itakte kuni ne,

²⁰ nei ambe gusu shomo ehonnai no ku ki wa ku ye kusu ne ap korachi ku ye kuni ne, en gusu koramkoro yan; nei ambe gusu kani shinkop eok ateshkara guru ku ne ruwe ne na.

²¹ Koroka, echi utara anak ne kuani nekon a iki ya, en gusu an orushpe ne yakka echi nu kuni gusu, aomap an iriwak ne Utarapa otta ikipniukesh wa yaishieiwangere Tikikus anak obitta no okaibe echi nure kusu ne na:

²² tambe gusu, echi orun shinuma ku arapare ruwe ne, echi utara un gusu an orushpe aeramande wa echi keutum aomaoma kuni ne ruwe tapan na.

²³ Michi ne Kamui newa Utarapa ne Yesu Kiristo orowa no iriwak ne utara otta itomo newa eishokor-i tura omap ambe an kuni ku koramkoro.

²⁴ Turu-sak no chikoro Utarapa ne Yesu Kiristo omap obitta no okai utara otta irenga an na.