Ekambakbe 22 - Ashiri Aeuitaknup Iyohaichish Yona 1897

22 Ik.

¹ Orowa, shinuma anak ne nei nachiya onnaigeta,

² Kamui newa nei Pon-hitsuji koro amset wano hetuku komu shuma korachi pekashnu inotu oma san pet en nukare nisa. Awa, nei pet otamba un toshka ta hemhem, okushun toshka ta hemhem, kesh chup range tu ikashima wan shuine nikaop hetukure inotu oma chikuni an: orowa, nei chikuni ham anak ne moshiri uirup iwangere kuni gusu an ambe ne ruwe ne.

³ Orowa, tewa no aiyoitakushi ambe isam kusu ne: samata, nei onnaigeta Kamui newa Pon-hitsuji koro amset an kusu ne: orowa, Shinuma koro usshiune utara anak ne Shinuma otta yaishieiwangere kusu ne na;

⁴ aige, nei utara anak ne Shinuma koro nanuhu nukara kusu ne; shui, Shinuma kon reihei nei utara koro keputuru ta an kusu ne na.

⁵ Nei ushiketa anchikara isam; ratchako pekere newa chup pekere eishiramne shomoki; Utarapa ne Kamui anak ne nei utara otta pekere atte kusu ne gusu ne na: orowa, nei utara otusashuishiri pakno epungine kusu ne.

⁶ Orowa, en orun shinuma ene itak-hi :— Tapan itak anak ne oupekap ne sonep ne ruwe ne: aige, Utarapa anak ne, uweingara utara oma ramat koro Kamui anak, naa pon no okaketa hetuku kuni gusu an okaibe koro uitek utara nure gusu koro hauturumbe teshkan nisa ruwe ne.

⁷ Ingarʼan, Tunashi no Ku ek kushki. Tan kambi kata okai uweingara itak shikkashima gurʼanak ne shinunuke an ruwe ne na.

⁸ Orowa, Yoannes ne kuani anak ne tap okaibe nu hemhem ki nukara hemhem ki guru ku ne ruwe ne. Aige, ku nu hemhem nukara hemhem ki chiki, tap okaibe en nukare hauturumbe chikiri kotchaketa koongami gusu ku yaihachire nisa ruwe ne.

⁹ Orowa, en orun shinuma ene itak-hi :— Iteki nei no ki yan: e tura no ne yakka, uweingara utara ne e koro iriwak utara tura no ne yakka, tan kambi oma itak ambe shikkashima utara tura no ne yakka iki uitek guru ku ne ruwe ne: Kamui koongami yan.

¹⁰ Orowa, en orun shinuma ene itak-hi :— Tan kambi oma uweingara itak ambe iteki ko-seshke yan; pakihi ehange no an ruwe ne gusu ne na.

¹¹ Oupeka-sak no an gurʼanak ne naa oupeka sak no iki yan: oupeka gurʼanak ne naa oupeka no iki yan: ashkanne gurʼanak ne naa aashkannere no an yan.

¹² Ingarʼan, tunashi no Ku ek na; aige, koro iki ikip an nei no pishno an guru orun Ku koropare kuni gusu an pummaha Ku kon ruwe ne.

¹³ Kuani anak ne nei Arupa newa Omeka Ku ne ruwe ne, hoshike an ap ne, iyoshi an ap Ku ne, atpake an ap ne, okake an ap Ku ne ruwe ne.

¹⁴ Koro mipihi furaye utara shinnunuke an; nei utara anak ne nei inotu oma chikuni epeka mondum akore, shui, ahunapa kari nei machiya orun ahup kuni gusu an ap ne ruwe ne gusu ne na.

¹⁵ Soigeta anak seta okai, pon-itak ki utara okai, hoiyo utara okai, keuk utara okai, potoki-koongami utara okai, orowa, shunge omap wa shungep iki ambe koomap obitta no okai utara pishno an ruwe ne na.

¹⁶ Yesu ne Kuani anak ne karisia utara gusu tap okaibe echi orun paweteshu iki kuni ne Ku hauturumbe Ku arapare nisa ruwe ne. Kuani anak ne Dabid koro shinrit newa santek Ku ne, nei heriat kunne-nisat-nochiu Ku ne ruwe ne.

¹⁷ Orowa, Ramat newa nei hoku akore kuni mat anak ne “Araki yan,” ari itak. Orowa, nu gurʼanak ne, shinuma anak “Araki yan,” ari ye yan. Samata iku rusui guru, araki yan: kon rusui guru anak ne rengaine oro isam no nei inotu oma wakka uk yan.

¹⁸ Tan kambi-sosh oma uweingara itak nu obitta no okai pishno an guru otta tapne Ku ye-hi :— Inan guru ne yakka tap okai itak ambe eun nepka kashi-iyo chiki, Kamui anak ne tan kambi-sosh kata chieshinnuye wa okai shirikikbe nei guru eun kashi-iyo kusu ne:

¹⁹ orowa, tan kambi-sosh oma uweingara itak orowa no uk wa isamka inan guru ne yakka an chiki, Kamui anak ne tan kambi kata chieshinnuye wa okai nei guru akore kuni gusu an nei inotu oma chikuni orushpe hemhem, nei ashkanne machiya orushpe hemhem shinuma orowa no uk kusu ne.

²⁰ Tap okaibe ye guru anak ne :— Ruwe ne wa: tunashi no Ku ek kusu ne, ari itak. Amen: ek wa en kore yan, Utarapa ne Yesu.

²¹ Utarapa ne Yesu korʼirenga ashkanne utara tura no an kuni ku koramkon na. Amen.