ROM MINGAI JIANG PAUL NING A JIAK CHITHI 3 - Rabu Athar New Testament (BSI)

¹ Ha aninko Jiw ranga a nem na imo a om? Hale vuntan jarra iha mo anemna aom?

² i rakip arui ajar atam aphut lai han ko anmani jiang Pathian chong ha jiw ngai jiang alui pek.

³ Ajarko aviar in takngai na an nei mak inko imo ichang rang? Anmani takngaina atom jarra han Pathian ha takngai rang asuak ha ite khat nem nalui mo ichang rang?

⁴ Hava nima rase mirakip ning an lei asei aninom, Pathian ko adik ha nirase; hingahin an luijiaksa anga ani. Puma nang na chonga nang ko adik takbal ha nani tinarangale nang in chong natan karra tortheina ranga ani.

⁵ Tak-ha keini kan dik na jarra Pathian adik ha kan man mu aninko keinin imo kan lati rang? Pathian ning a rang jarra puk isak hi dik mak mo? Hivahi kein miring omchan lungdo nuk juia ka ri ke.

⁶ Hivahi nima rase ajarko hivahi aninko Pathian ning ramuol hi ija mo chong itan rang?

⁷ Tak-ha ka lei iseina han Pathian adik ha ka ri man thang tor inko ama lianpui na han ka man lian deja, kei jom ijarra mo a tun tenna siatnei mi ke tia chong nan natan?

⁸ Hale asat suakthei na ranga asat mak tho rei, tia kein in ita mo kan ti lui? Hava ang han keinin kan riha tu ang khat in keini ha anilui tianga an na lui, hi anga mingai hi siatna kan man nei hi adik.

Tu khat Jak om Dik ma u

⁹ Ha aninko imo kan ti rang? Keini hi anmani nek kan sat det mo. Ite khat satmak sing ajarko Jiwngai le Grikngai jiang om mirakip siatna kan nei tia kein in anmani madonna kan lui ri jui.

¹⁰ Hingahin a kan jiak adik tute khat om ma u,

¹¹ a jet athei khat jak om ma u Pathian tok tu khat om om ma u.

¹² Anmani an renga lam an ma chaijui, anmani ha nemna bui ha an hong chang jui, asat tho tu khat jak om ma u an khat jak tenom om ma u.

¹³ Anmani rol rui ha a kan longsa than anga ani an lei ning leisei a sip jui anner tumma rul atur ning a sip jui.

¹⁴ Anbaija kho khongnale an chong riha akha ning in asip jui.

¹⁵ Anmani an ke ha thi man suak ranga ankal ajang.

¹⁶ Anmani lam ha mang na rang le khodengthei na rang ani.

¹⁷ Hale lunghip lungdai na anmanin jet ma u.

¹⁸ Anmit en na Pathian chit ha om mak.

¹⁹ Dan chong pek in a ri, dan thuaija a om rakip ko dan ning chongtan na nei nati. An bai sua rakip khapthei na rang le ramuol pum puia Pathian mandonna chongtan na ranga ani.

²⁰ Ajarko dan chong pek chuan nuk juia Pathian madonna tu khat om mandik noning ajarko dan chong pek jarra siatna kan hong jet.

A ma le Kan om Jarra Pathian ning Ina mandik

²¹ Tak-ha, a tunko dan chong pek ha kan chel luia Pathian tenna adik tiha ahong kan ri jui, hava dan chong pek ha ning le Pathian chong lui ringai ning shakhi an pek.

²² Pathian tenna dikna an nei ha ning Jisu Khrista takngai na an nei mirakip jiang ani ajarko i om i kan khel i kan khuisen na om mak.

²³ Ajarko mirakip siatna kan nei Pathian lianpui na tenna ranak nei lui kan ni.

²⁴ Khrista Jisu jiang a om rakip ha san ring na jarra puma ama manrit na han anmani ha a man buia a man dikjui.

²⁵ Atuan laia kan lui tho ha ning Pathian ning a na jet pea ana bang pe jarra a man adik ha ana man mu.

²⁶ Puma ama tak in adik le Jisu ha takngai ama ha dik na neipu manchang na rang a tun pha hin puma adik ha do na ranga takngai jarra ama thi senna man thiang na ranga Pathian ning ama ha a na manjet jui.

²⁷ Ha aninko mankanlain na rang hon mo ala om? Hava om mak, ho anga dan chong pek ning mo? Chuan tho ning mo? Nimak, takngai chong pek jarra ani.

²⁸ Ajarko dan chong pek chuan kan chel luia takngai jarra miha imandik ani tia kein in kan ngaidon.

²⁹ Tak-ha Jiwngai rang jak Pathian mo ani? A dangjatngai ranga ko Pathian mo ani lui?

³⁰ Ti ko, Pathian ko khat jak ani vuntan ruia takngai mi le, vuntan luia takngai na inei ha a man dik ani.

³¹ Takngai jarra dan chong pek ha keinin i om manni masing mo? Hava nimarse, keinin dan chong pek ha ka man kan pol jel mo?