JOHON 21 - Rabu Athar New Testament (BSI)

Thiamruai Sari Ngai jiang Akando

¹ Tiberia anti pat han Jisun a thei jak veikhat a thiamruoingai jiang a man kan mu ret.

² Simon Pitar; Diduma antithoma Nathanael Galili ram ma kana mi Zebedi naingai a thiamruoi a dang anni le Jisu le an lui, an kanchun na an lui om.

³ Simon, Pitar in a dangngai jiang a ti, “Kei ngatok che kati,” “Keini om Nang ha kan na jui rang ke, anti han rokuang anchuanga an che jui, tak-ha jansot hinitekhat om luichur ma u.

⁴ Khua ahong var han Jisun tuilaija ahonglon tak-ha, thiamruoi ngainko Jisuke tia lui jet ma u.

⁵ Tak-ha ama ning anmani jiang ading kel, “Naipangngai nang ni ite churmakche u mo?” ite churmasing tia an sang”

⁶ “Nalenha hiva nan rokuang chang tiang hin vorro. Han nga churnanti,” anmanin len anhongvorhan lenha hong kei suak torlai ma u, ajarko anmanin nga a tam anchurjui.

⁷ Jisu ning a lungsiat thiamruoi khat in Pitar jiang a ti, “A mahi puma ke a ti!” Pitar ning hi puma ke ti a jet pha a puan adiar ashi a keijui. Apuan a khek tuilaia akanchom ani jarra,

⁸ Thiamruoi a dang ngain len sunga nga asip reia tanglai tiang an keiphiatjui. Anmani ha tanglai tenna kan lakma khutupkhat duk ani.

⁹ Anmani tanglai tiang an kei sua pha, mei an tho anga bule anroha a mu jui.

¹⁰ Jisun anmani jiang a ti, “Nan chur ngaha hin aviar hong choi diru.”

¹¹ Simon, Pitar in a chea lenha tuipanga a keisuak nga alian tak riakhat le somranga leithum in ankhita ani hiduk nga an khit in om len ha ko luichetmak.

¹² Jisun thiamruoingai jiang nang ni hong una luihongchak taru a ti, thiamruoi tutekhat nom, ‘Nang tumo nani?’ tia dingkel tendingkel ma u, ajarko ama Puma ke tia an jet.

¹³ Jisun a chea bulom le nga a luia anmani jiang a pek jui.

¹⁴ Hiva jarra Jisu ning a thui tenna i man kan muhi veithum tung na ani.

Jisu le Pitar

¹⁵ Anmanin an chak suale, Jisun Simon Pitar jiang a ri, “Johon a nai Simon hiva ngai nek nang in kei na na lungsiat det mo?” A man a sang O, Puma kei kanlungsiathi nang in na jet ati, “Kabelram ngaihi asat narungpero.”

¹⁶ Veini chang na Jisu ading kelret, “Johon a nai Simon nang kei na na lungsiatmo?” A man a sang, O, Puma kei ka na lungsiat tihi nang in na jet a ti kabelram ngaihi asat narungpero.

¹⁷ Veithum chang na Jisun ama jiang ariret, Johon a nai Simon, kei nanalungsiat mo? Veithum khan nanalungsiatmo tia Jisun ading kel jarra Pitar ning a ning alui dong. Pitar ning ama jiang a ti, Puma kein nang ka na lungsiat tihi nang in najetver, Jisun ama jiang a ti ret, kabelram ngaihi asat hong enpero.

¹⁸ Kein nang jiang adik kari ani, nang in nai pang nachanglai naratlai nache jot na mun han nang in nache, tak-ha na hong tarleko na kut thuang na ta, miring khat in nakhit nan ta, nachejot luina mun han na tuang nanti.

¹⁹ Jisun hiva itinahi Pitar ning ija mo ithi rang hale Pathian lianpui na ha ido rang? han Jisun ama jiang a ti “Najuiro.”

Jisu le Adang Thiam Ruoi

²⁰ Pitar in a nuk a hong kanheia a en karra a nuk tiang Jisun a lungsiat thiamruoi khat ha Jisu bu an nek lai Jisu koltak om pa a mua a hong ti, Puma nang anajuar rang ha tu mo ani?

²¹ Pitar in ama a mu pha Jisu jiang a hong dingkel, Puma hiva mihiko imo ichang rang?

²² Jisu ning a sang, kei ka hong kirmaje ama om rang hi ka lungdo aninko, “Nang ranga ko imo ani?” Najuiro.

²³ Hiva jarra Jisu nuk jui karra thiamruoi ha thi lai noning tia chong asemjui tak-ha Jisunko ama thinoning a ti nimak, ‘kei ka hong kuimaje ama om rang hi kei ka lungdo aninko nang ranga imo ani atinake.’

²⁴ A ma hike thiamruoi karra chongluiriha, hale hiva rabu hin non aluijiak ama ari rakip ha adik tia kan jet.

A torna Chong

²⁵ Jisun a tho chuan tam tak adangom a la om tak-ha an khat khat kan jiak inko ramuol pumpui hin nom kengnoning tia ka ngaidon.