GALATIA 6 - Rabu Athar New Testament (BSI)

Khat le khat phur rik kan sanru

¹ Ka u ka naingai, nang nin a salui a tho mi khat ha nan chur karra thavanga chuan tho nang ni ning lung nem tak a sinheiru, nangni jiang om a hong suak mak na ranga nan tak kan enru.

² Khat le khat phur rik ha kan sanru, hale Khrista chena dan ha tho tor nanti.

³ Ajarko mi khat ning ka thei det tia a om aninko, a maha ijom la jet mak. A thei jak a akan huang ani.

⁴ Mirakip ning an chuan tho ha kan en rase u. Hava phat han midang ranga ni luia athei jak a man kan lian rase.

⁵ Ajarko mirakip ning an tak phur rik ha kan choi rase u.

⁶ Pathian chongsat ari ama han ama jiang alui ripe mi jiang chuan sat ha tho rase.

⁷ Nang ni man kan huang maru Pathian ko nuiso jot mak, ajarko mi ning an ling an ling ha an luak ani.

⁸ Ajarko taksa tianga chuan tho ama han taksa tianga a salui ha amu rang ke, tak-ha Thavang a chimu aling ama han Thavanga kumsot ringna ha mu nati.

⁹ Hale keinin asat chuan tho hin pong ma rei, Keinin kan tho theng aninko a phat a hong tung karra kan mu rang ke.

¹⁰ Hiva jarra keinin phathui a om rakip hin chuan sat ha mirakip jiang tho tarei, achung chuanna takngaija a om Pathian mingai jiang tho rei.

A torna chong

¹¹ Enru paul ka tak tak ning ka hong jiak chithi hi iduk mo a lian hi?

¹² Taksa tianga asat tia, a kando jot anmanin nangni ha vuntan ranga an na doi ani hivahi Khrista a ruija nan chunga khodengthei na na pek mak na ranga ani.

¹³ Ajarko vuntun anmani tak om chena dan ha lui jui ma u. Nang ni jiang vuntan an dei na ajarko, nang ni ruia maipak chong hui an mu jot a ani.

¹⁴ Kei rango kan puma Jisu Khrista khros ni luia kei ka man kan lian torna om mak, khros jarra ramuol hi kei rang ko athi jui hale kei om ramuol la kalui thi jui.

¹⁵ Ajarko vuntan nom vuntan lui om a kan khel na om mak tak-ha alian tak ko ringkhuo thara a om ha ani.

¹⁶ Hiva chong lam a jui mirakip jiang Pathian lungsiat le lunghip ha pathian nai Israelngai jiang sip rase.

¹⁷ Atun ten na ko keini hi khodeng na man thei lai maru, ajarko kei chunga a pop abi a om ha Jisu Khrista a suak changna ranga ani.

¹⁸ Puma Jisu Khrista a mi lungsiat theina ha ulenaingai chunga om rase Amen.