1 THESSALONIKA 5 - Rabu Athar New Testament (BSI)

Puma hong na ranga kan ningru

¹ U le naingai nangni ning a phat, a kum a tha ngaiha rabu a jiak ana manjet rang ngai mak.

² Nang nin a thianga nan jet jui. Puma ko a ruk ning janna rukchian na a hong anga a hong rang ke.

³ Mingai ning ahuia an om lai tak han khang hong a hong na ta mingai pong na a man suak rang ke. Numei ning nai an nei a pong na, a nat an pial torlui anga pial na jot noning.

⁴ Tak-ha u le naingai nangni ko ajinga a om mi ha nima che u, hava phat ha jet lui thailuja a hong manni rang ke. Kan ning chakru.

⁵ Nangni ko a var na mun na a om a var naingai nan ni, Keini om ajinga a om jan mingai ha ni masing.

⁶ Ajarko keini hi jal la om lai ma rei midangngai anga, Kan jal tenna thuija om tarei.

⁷ Jan na mi ning an jal, hale ju in ngai ning ju an in anrui.

⁸ Tak-ha keini ko a varra a om a tak akanchur tor mi ha kan ni jarra puma jiang takngai na hi puan si anga sirei, lungsiat lam ha raka anga kum sot ringna rang lungdo kan nei lam ha lu hup anga hup chak rei.

⁹ Pathian ning keini hi khodengthei ranga ana thang suak nimak, tak-ha Jisu Khrista ten na kum sot ringna ha na pek ranga ana thang suak ani.

¹⁰ Keini ranga puman a na lui thi pe jarra kan ring nom kan thi a chang nom ama le kan om suam rang ani.

¹¹ Hiva jarra nang ni khat le khat lung thok nale thanuam na ha kan pekru hale khat le khat kan sanru.

A torna chong pek

¹² U le naingai kein in kan na mathem ani, nan karra chuan tho a na san ngaiha Khristian ringkhuo hin an om na ranga chitlejak neiru.

¹³ An chuan tho na chunga a sang tak a chit jak hale lungsiat a thoru, lunghip ha nan karra om rase.

¹⁴ U le naingai a tal mingai ham, a chit dop ngai ham, lung thok na tho peru, asual ngai ham sanru.

¹⁵ Enru tu khat ning om a satlui han a satlui male maru, tak-ha phat rakip a chuan sat tho ranga tokru miring rakip jiang.

¹⁶ Phat rakip a ningsat tak a om ru.

¹⁷ Pathian jiang amongtibuia lam na ha neiru.

¹⁸ Chuan lam rakip a Pathian ha man pakru, ajarko ama lungdo Jisu Khrista jiang a om ha nang ni ranga ani.

¹⁹ A thiang thavangngai ha man pong maru.

²⁰ Pathian chong lui ri ngaiha ae sel maru.

²¹ Tak-ha i rakip hi dan enru asat ha a rak a churru.

²² Asiat, chuan salui rakip ha makru.

²³ Pathian ama lunghip na han nan thavang nan taksa hale nan lung a renga na rasuk rase. Khrista a hong karra a salui ite khat buia lui omru.

²⁴ Nangni ana kui puma Pathian ha takngai rang asuak, ama han a tirakip ha atho rang ke.

²⁵ U le naingai keini rang ngom lam na na nei peru.

²⁶ A thianga lungsiat biang tum ha ulenaingai jiang ka na hong pek.

²⁷ Hiva chithi hi ulenaingai jang suai luia pa peru tia Pathian jiang kan lam.

²⁸ Kan puma Jisu Khrista ami lungsiat theina chuan ha nan chunga om chak rase.