1 THESSALONIKA 4 - Rabu Athar New Testament (BSI)

A thiang omchan che na chong lam

¹ A torna tak hin ulenaingai Khrista minga kan na ri ani, nang nin ijamo nan om rang hale puma ha ijamo a lungdo nan tho rang tiha keini jiang tenna nan jet ha man khel de detru.

² Ajarko Jisu Khrista tenna keinin kan na pek chong lam ngaiha nan jet jui.

³ Nang nin a satlui omchan mak a athianga om rang hi Pathian lungdo ani.

⁴ Pasal rakip ning nan mu mei le ijamo nan om rang, a thianga chitlejak nei a om rang ani tihi jetru.

⁵ Pathian jet lui mingai anga taksa mit en rang jak hin om maru.

⁶ Hiva ruia nangni tu khat ning om nan u nan naingai, Khristian nan chang pui ngai chunga omchan salui che maru, keinin kan na lui manjet jui, ani lui omchan a che ngai chunga Pathian ning pong na pek nati.

⁷ A thianga om ranga Pathian ning a na kui hi, omchan salui che na ranga nimak.

⁸ Hiva jarra tu an khat ning chong pek ajui lui aninko miring chong pek ajui lui nimak, thavang thiang ana pek puma chong pek ajui lui ani.

⁹ Nang ni khat le khat lungsiat thei na ranga kein in chithi kan jiak rang ngai mak. Ajarko pathian in nan nai ngaile kan lungsiatru tia kan puman ana ripe jui.

¹⁰ Makidonia sunga a om mingai chunga nan lungsiat ha kan jet, tak-ha a khel a khel la lungsiat deru.

¹¹ Nangini ahip adaija om ma, nan chuan tho ha lung lut a thoru. Hale nan kut a chuan tho nang chakru tia a rapa lai kan lui ri jui.

¹² Hingahin nang ni jiang Pathian takngai mingai ning chitlejak na nei nanti, hale mi jiang tok lui a ring tor nanti.

Puma a hong na ranga chong lam

¹³ U le naingai adik tak a kan na manjet jot, nang nin a thisa mingai ranga ning dong na nei maru anmani ko lungdo ha om lui ha an ni jui.

¹⁴ keinin takngai na kan nei Jisu alui thia ahong thui ret, hiva jarra Jisu Khrista jiang takngai mirakip an luithi nom puma ning a kei thui khier rang ke.

¹⁵ keinin nang ni jiang kan ri ani. Jisu Khrista a hong pha han a ringa a om keini hi a thi ngai madonna che nonising.

¹⁶ Hingahin Vanram ma a om Thavang thiang rasa le kan ruaia puma ha hong chum nata, pengkul rasa le hong khek nati. Jisu Khrista takngai mirakip a rapa tak kei thui nati.

¹⁷ Hiva suale a ringa ana mak keini ngaihi Thavang a thiang in na chur na ta chung tiang an na tuang rang ke, vanram ma jisu le kan mu kan ti, hale puma ama le phat rakip a om rang kan ni jui.

¹⁸ Hiva jarra nang ni khat le khat hiva chong hin lung thok na kan pekru.