1 KORINTH 7 - Rabu Athar New Testament (BSI)

Muiruai na ruia chong lam

¹ Atunko nang nin chithi nan hong jiak ruia pasal ning in neiluia a om lam asat det.

² Tak-ha an tak an kan chur tor mak aninko, pasal rakip ning an lomnu om rase, hale numei rakip ning om an lampa om rase.

³ Pasal ning an lomnu jiang tho rang asuak ha tho rase hale numei ning om an lompa jiang pek rase.

⁴ Numei a taksa a neipu ko ama nimak a lompa ha ani, hale pasal ama a taksa a neipu ham ama nimak a lomnu ha ani.

⁵ Nang ni khat le khat kan jot lui tho maru. Pathian le kan ruaia nang nin om chunru, hale nang nin nan lung kan chur torluija seitan jiang mathemna han chul maru.

⁶ Kei ning hivahi tho le leru kati nimak, kan jotru tia ka ri ani.

⁷ A thianga nang nin kei anga nan om rang hi ka dei, tak-ha Pathian kutchoi mirakip jiang alui kan khel.

⁸ keinin nei lui pasal le mei thai numeingai jiang ka ri ani, hingahin kei anga in neiluia om lam ning asat det.

⁹ Tak-ha anmani ning an taksa an kan chur tor mak inko in nei rase u. In nei jot a an tak chunga meikang a om nek inko, in an nei lam asat det.

In neingai ning an tho rang chuan

¹⁰ In neisa mingai chuanga kein ka na ri chang lui a puma ning a na ri ani. Numeingai ning pasal le kan sen maru.

¹¹ Numei ning a lompa a mak inko ama ha atheija om rase, animakle pasal ning om a lomnu le kan sen ma rase.

¹² Kein mirakip jiang ka ri ani, Pathian a ri ko nimak. Khristian pasal khat Khristian ni lui khat anei inko hale numei ning om ama le om ranga a jot inko ama ning a lomnu ha mak ma rase.

¹³ Hale Khristian numei khat ning Khristian nilui pasal a nei inko ama le om ranga a jot inko ama han a lompa mak ma rase.

¹⁴ Ajarko Khristian ani lui pasal ha a lomnu ning a man thiang jui, hale Khristian ani lui numei ham a lompa ning a man thiang jui. Hi animak inko nan naingai ha thiang noni u, tak-ha anmani ha an thiang jui.

¹⁵ Khristian nilui khat ning Khristian khat jiang ama ha a mak jot inko mak rase, hiva chuan na ko ulenai ti om mak, ajarko pathian in kei nihi a hip a daija om ranga a na kui ani.

¹⁶ Numei nang in na jet na lompa ha ija mo ni san rang? Pasal nang ning om na jet na lomnu ha ija mo ni san rang?

Pathian i dei na ringkhuo lam

¹⁷ Mirakip ning Pathian a pek chuan nuk juia ring rase u; hale Pathian ning hava ranga a na kui ani. Hivahi kei che na dan biakinn a ka man chu ani.

¹⁸ Pathian ning a na kui han vuntan mo nan kan chel? A man vuntan na abi ha manmang rase, hale Pathian ning ana kui lai han vuntan lui mo nan kan chel? A man vun ha tan rase.

¹⁹ Ajarko vuntan vuntan lui ning i om nem mak tak-ha Pathian chong pek a jui paha a lut tak ani.

²⁰ Mirakip ning an om na a mun rakip a Pathian ning a kui nuk juia om rase u.

²¹ Nang ni Suak nan ni han mo a na kui? Hiva jarra pong maru, nang nin ningsat na nan nei tor inko hava thoru.

²² Ajarko suak a changa puman akui amaha puma jiang ningsat na a nei, hale a man huija a om lai tak puman a kui ama ha puma suak ani jui.

²³ Nang ni puma ning a man na a na lui chok jui, nang ni suak chang lai maru.

²⁴ Hiva jarra ulenaingai, ho mun na mo a man a na kui na a mun rakip a Pathian le om ru.

In nei luingai chunga ripe na

²⁵ Atunko in nei mingai ruia ka ri ani, pathian in riro ati ko chang mak, Tak-ha kei lungdo hi ama han tak a na ngai tia ka ri ani.

²⁶ Kein ka ngaidon a tun tak a pong na omchan nuk juia pasal ning in neiluia an om lam asat det.

²⁷ Nang numei na nei jui mo? Numei ha mak lai maro. Nang numei le na kan sen jui mo? Numei tok lai maro.

²⁸ Nang nin in nan neia numei le nan kan chun aninko siatna la tho ma che hale numei om in anei inko siatna la tho mak, aninom in nei anmani ha ramuol la pong na ko an mu rang ke hale kein nang ni ha ka na la san.

²⁹ Ulenaingai jiang ka na ri ani, a phat om lai mak atun tenna ko in nei pasalngai ning in nei lui anga om rase.

³⁰ Hale a chapngai ham an lung tokluija om rase u, a ning satngai ham a ning satlui anga, hale phur pai a chokngai ham a chok lui anga om rase.

³¹ Ramuolla a nem na a tok, a nei man mingai ham atoklui mi anga om rase, ajarko hiva ramuol omchan hi a sot ko che lai noning.

³² Nang nin ning dong lui a nan om rang hi ka dei. In nei lui pasal ning om lung khop na chuan ijamo ka tho rang tia a ngaidon.

³³ Hale in neisa pasalngai ning om an numeingai lungdo ijamo a tung rang tia ramuol la phur pai jak an ngaidon.

³⁴ Hale a lunga a kan sem pe, in nei lui dong ma ning om a taksa le a thavang ning puma lungdo ija mo ka tho tor rang tia a ngaidon tak-ha in nei numei ning ramuol la phur le paihin ija mo an pasal lungdo a tung rang tia an ning adong.

³⁵ Kein nang ni satna ranga kati ani. Nangni tho jot mak tia ka na chur nimak tak-ha chuan dik le Pathian chuan ha na lung pumpui le na thavang pumpuia kein ka na man tho jot jarra ani.

³⁶ Kein nang ni satna ranga kati ani. Nang nin tho jot mak tia ka na chur nimak tak-ha chuan dik le Pathian chuan ha na lung pumpui le na thavang pumpuia keinin ka na man tho jot jarra ani.

³⁷ Tak-ha pasal khat ning a lunga in neiluia om kati tia a ngir a chang inko in nei luia om lam ning asat det.

³⁸ Hiva jarra pasal ning in neia om hi asat tak-ha in nei luija a omngai lam ning asat det.

Mei thai numeingai chunga man chuna

³⁹ In neisa numeingai ko an lompangai an thi mak kar je ko ala khit ani tak-ha an lompangai an thi suale ko an lungdo pasal a om inko in nei ret a jot, tak-ha Khristian jiang nei rase u.

⁴⁰ Aninnom ama han in nei luija hingahin a om inko a khel la asat det tia ka ngaidon Pathian a thiang Thavang ha ka sunga a om ti ka jet.