1 KORINTH 12 - Rabu Athar New Testament (BSI)

Thavang Thiang kutchoi ruia jet na

¹ Atunko kein Thavang kutchoingai ruia nang nin nan jet torlui ha kei dei making.

² Nang nin Pathian ha nan lui jet madonna, kut a sin pathian in nang ni ha ana tuanga a mun khat a nan lui che tihi nan kan jet.

³ Hiva jarra Pathian Thavang tenna chong ri mi khat ning Jisu hi kho khong amu ani ti ma che u, hale Thavang Thiang jarra Jisu hi Pathian nai ani ti om ti tor ma che u, tia kein nang ni jiang ka na manjet ani.

⁴ Pathian kutchoi ko a tam a om, tak-ha Thavang Thiang ko khat jak ani.

⁵ Hale chuan nom a tam a om tak-ha Pathian ko khat jak ani.

⁶ Chuan ngaiha a kan khel pet tak-ha chuan rakip a man tho pu pathian ko khat jak ani.

⁷ Mirakip ningsat na ranga Thavang Thiang ha a hong kando ani.

⁸ Ajarko mi khat jiang Thavang Thiang in ramuol la ching na alui pek.

⁹ Mi dang khat jiang Thavang Thiang takngai na a pek adang khat lam Thavang Thiang han mi mandam na a pek.

¹⁰ Mi khat jiang lam Thavang ranak a mi ning tho torlui chun a man tho. Mi khat jiang lam nuk a ahong rang ha a manjet mi khat lam Thavang karra asiat asat a manjet, mi khat lam chong rakip ha imo ani tia ama le tor.

¹¹ Hiva rakip hi khat jak ani, Thavang Thiang khat jak ning a tho ani.

¹² Ajarko taksa khat chunga tak ruanga jat a tam tak a om. Hiva rakip a kan khel na a om nom taksa ko khat jak ani. Khrista om hingahin ani.

¹³ Hiva anga keini rakip hi Jiw mo, jatdangai mo, suak mo, kan chong pa mo, Thavang Thiang in tuilutna a na man nei a tak khat a na man chang jui. Keini rakip sunga Thavang ana thun pe jui.

¹⁴ Taksa hi takruang khat jak ning a kan sin nimak, tak-ha takruang a tam a om.

¹⁵ Ke ning kut ha ni making, taksa chunga om making a ti nom, ama ha taksa jiang om mak ti jot mak.

¹⁶ Hale kuar ning kei ko mit ni making tak sa jiang om making a ti nom, ama ha taksa jiang om mak ti jot mak.

¹⁷ Taksa rakip hi mit alui chang aninko ija mo ngai na a nei rang? Hale a renga kuar a luini a chang inko ija mo arim a jet rang?

¹⁸ Tak-ha pathian in tak ruang rakip a thei atheia alui sin na taksa chunga aluibeng ama lungdo nuk juia ani.

¹⁹ Takruang rakip hi khat jak an lui chang inko, taksa ko hon mo a om jui?

²⁰ Takruang a tam om tak-ha taksa ko khat jak ani.

²¹ Mit ning kut jiang, kei na chuan dei making ti tor mak, hale lu ning om ke jiang kei na chuan dei making ti tor mak.

²² Hivajak niluia keini taksa chunga a sual takruangngai han a khel la anem na a om.

²³ Keinin chitlejak kan tho jot lui kan takruangngai lam a lut a kan tho rang a suak hale kan tak chunga kan tak ruang enna a mel asiatngai ham a khel la alut tak a kan en rang asuak.

²⁴ Kantak chunga takruang asin, asual ngaiha anem na a omngai ha Pathian in manrit tak a khat le khat hi taksa sunga a siak chun.

²⁵ Hiva jarra takruangngai ning lui kan sen ma u, takruangngai rakip ha khat ning khat chunga kan lungsiat thei na ranga ani.

²⁶ Takruang khat ning a nat inko tak ruang rakip ning a nat an dui pet. An khat ning a ning asat karra an renga an ning aluisat.

Kutchoi a thei atheia pek na

²⁷ Nang ni nan renga Khrista ama taksa ha nan ni, hale nang ni hi ama takruang ngaiha nanijui.

²⁸ Pathian a rapatak biakrup hin tirlon aluibe hale Pathian chong ri mi, hale, oja mi man chu hale chong rakip a jet mi, hale mi ning torlui chuan a tho tor mi, hale mi mandam a tor mi hale lam kaingai hale chong rakip a jet tor mingai ha aluibe ani.

²⁹ An renga tirlon mo anni? An renga mi ning tho torlui chuan an tho tor mo?

³⁰ A renga mimandan an tor mo? An renga mi ning jet lui chong ha an ri mo? An renga chong ma le an tor mo?

³¹ Nan lung sunga hiva neka a lian kutchoi ha deiru, achung chuanna a thuaija che na lam na pek kati.