1 KORINTH 10 - Rabu Athar New Testament (BSI)

Kut a sin Pathian chubeibuk ngai manjotna

¹ Kein u le nai jiang kana manjet jot, kan pangai ha sum phai nuaia an lui om hale tuiongpui an lui kan.

² Mousi ning an renga sum phai le tuiongpui tui a luimanlut.

³ Hale an renga thavang bulom ha an lui nek.

⁴ An renga thavangai ju ha an inna an lui rui. Thavanga alui om lungpui ha Jisu Khrista ha alui ni.

⁵ Tak-ha Pathian in mitam chunga a lung lui khopmak jarra mitam an lui thi, a thi ruakngai ha ram ma an lui mak.

⁶ Atunko hiva ngai hi keini ranga jet thei na khat ani jui. Anmanin chuan salui an lui tho anga keini ko tholaima rei.

⁷ Kut a sin Pathian ha chubeibuk maru anmanin an tho anga. Hingahin alui kan jiak “Mingai ning an onga bu a nek hale ju an in hale an thuia an lam”

⁸ Hava omchan salui an lui tho anga keini ko tho ma rei. Sun khat a mi lising somni le an thum an lui thi.

⁹ Hale kein in Pathian ham dan enmarei anmanin an lui tho anga. Anmani ngaiha rulning alui chukthat.

¹⁰ keinin Pathian jiang chongkat ham tho ma rei anmanin an lui tho anga hava mingai ha ko khonam ning alui manmang jui.

¹¹ Atunko anmani jiang alui suakngai ha jet thei na rang khat ani, hale anmanin an lui jiak ha keini ranga chong pek ani, hava mingai chunga a torna phat a hong jui.

¹² Hiva jarra aringjot ama han athi mak na ranga ngaidon ta rase.

¹³ Nang ni chunga a om siatna mathemna ha mirakip chunga a om, hale pathian ko a ri ha a tho. A ma ning nan torlui chuan na mathema na pek noning, nang in na khang tor rang le na dui tor ranga mathemna a na pek rang ke.

Kut a sin Pathian chubeibuk jot mak

¹⁴ Hiva jarra ulenaingai kut a sin Pathian chubeibuk bang taru.

¹⁵ Ka chong ri hi a ching chong ani, nang nin ka ri chong hi chong jenna neiru.

¹⁶ keini ning phual kan pek kheng kam han Jisu Khrista a thi sen ha a kan chel lui mo? keinin phual kenpek tal han Jisu Khrista a tak sa a kanchel lui mo?

¹⁷ Ajarko tal khat jak ani, keini mitamngai hi om tak khat jak kan ni, kan renga tal khat jak kan chak chun ani.

¹⁸ Israel naingai ha enru, a thiang mun na Pathian chakpek mingai le bu an nek chun mo nimak?

¹⁹ Kein imo ka ri? Kut a sin Pathian jiang nan pek chak hi imo khat ko ani animakle kut a sin Pathian ha mo khat ko ani.

²⁰ Jatdangai ning om khonamngai jiang chak thei ha an lui pek, tak-ha kein nang ni ha khonamngai le na man chak chun jot making.

²¹ Nang nin Pathian kheng le khonamngai kheng ha man kan chun na in jot mak, Pathian table le khonam table man kan chun na nang ni bu nek jot mak.

²² Animakle kein in Pathian lung thak na ranga kan tho mo ani? keinin ama nek a mo kan rat det?

Pathian lur na Thoru

²³ Irakip tho a jot pet, tak-ha i rakip a nem na a om pet ko nimak. Irakip hi tho a jot pet nom hiva ngainin a na man lian ko nimak.

²⁴ Tu khat ning om ama nem na tok ma rase hale midangngai nem na rang tok rase.

²⁵ Nang nin me juarna mun na anjuar i rakip chak a jot, nan lung sunga kan dingkel lui a.

²⁶ Ajarko ramuol chunga a om i rakip hi pathian ta ani.

²⁷ Pathian takngai lui khat ning bu nek a na kui karra nang in na chak jot aninko, na madonna ansiak rakip ha chakro, na lung sunga kan dingkel lui a.

²⁸ Tak-ha mi khat ning meha kut a sin Pathian jiang an pek antinko nang in chak maro a na manjet jarra na ning thi lai noning na lung sunga.

²⁹ Tak-ha kein ka ri hi asat sat mak chak maro ti a a na ri ama jiang ka ri ani, ajarko ka cham ma asat sat mak ti a ka om rang ha ija mo midang khat ning a lungdo a a na man chu rang?

³⁰ Kein Pathian manpak le kan ruaia ka chak inko ijarra mo bu ruia Pathian ka manpak ha an na risiat rang?

³¹ Hiva jarra nang nin nan chak nom, nan in nom, a renga Pathian lur na liana ranga thoru.

³² Jiwngai jiang aninom, Jatdangai ngai jiang aninom, Pathian biakrup hin aninom, pong na ko pek maru.

³³ Kein i rakip ka tho, mirakip lungdo man tung na ranga. Kei ka tak nem na ranga tho making mirakip nem na ka tho han anmanin ring na mu nanti.