Yaˇ kʼaˬ daˇ 10 - Akha

Toˇlaˬ

¹ Aˬbiˇmaˬlehˆ shiˇ dzeuˇ ngeh jawˇ, Doˇdoˬ-euˬ aˬ li Puˇhaˬ-euˬ aˬ li Toˇlaˬ gʼaˬ Iˇsaˬleˬlaˆ tsawˇ haˬ deuˬ-ahˇ ka kʼoꞈ le-euˬ meh. Aˬ yawꞈ-aˬ, Iˇsaˬkaˬ tsawˇ jeuˬ pyeuꞈ-awˇ, Eˇpaˬleˬ miˇ kʼahˬ gawˬ jawˬ gawˬ duˇ paw jaˆ-eu Shaˬmeuˬ meuˬ-ahˇ jawˇ-eu meh.

² Nyiˬ tseˇ smˇ kʼoꞈ byah ni, Iˇsaˬleˬlaˆ tsawˇ haˬ deuˬ-euˬ aˬ yuiꞈ aˬ yawꞈ geuꞈ-euˬ meh. Kʼoeˇ naˇ, aˬ yawꞈ shiˇ-awˇ, Shaˬmeuˬ meuˬ-ahˇ aˬ yawꞈ-ahˇ baꞈ pahˬ-euˬ meh.

Yaˬiˇlaˆ

³ Toˇlaˬ dzeuˇ naˇ, Giˇlaˆ miˇ kʼahˬ-ahˇ jawˇ-eu Yaˬiˇlaˆ gʼaˬ paˇ oe-awˇ, Iˇsaˬleˬlaˆ tsawˇ jeuˬ-ahˇ nyiˬ tseˇ nyiꞈ kʼoꞈ uˆ lahˇ-euˬ meh.

⁴ Aˬ yawꞈ-euˬ aˬ li smˬ tseˇ li jawˇ-awˇ, mahˬ tahˬ laˆ smˬ tseˇ mawˇ dziˬ-euˬ meh. Iˬ nah keuˆ ni, Yaˬiˇlaˆ-euˬ meuˬ deuˬ lehˇ kuˇ luꞈ-eu, aˬ yawꞈ maꞈ-euˬ meuˬ smˬ tseˇ meuˬ Giˇlaˆ miˇ kʼahˬ laꞈ kʼoeˇ jaˆ luꞈ meh.

⁵ Yaˬiˇlaˆ shiˇ-awˇ, Kaˬmoˬ meuˬ-ahˇ aˬ yawꞈ-ahˇ baꞈ pahˬ-euˬ meh.

Yeˬpaˬtaˆ

⁶ Iˇsaˬleˬlaˆ tsawˇ haˬ deuˬ-aˬ, Baˬlaˇ miˬ yehˇ hawˇ-eu Aˬshaˇtaˬyoˇ miˬ yehˇ deuˬ-ahˇ maˬ ehˇ, Siˇdoˬ miˬ yehˇ deuˬ-ahˇ maˬ ehˇ, Mawˇbaˆ miˬ yehˇ deuˬ-ahˇ maˬ ehˇ, Aˬmoˬ miˬ yehˇ deuˬ-ahˇ maˬ ehˇ, Piˇliˇtiˆ miˬ yehˇ deuˬ-ahˇ maˬ ehˇ, uˬ duˬ tahˬ-eu laꞈ kʼoeˇ, Sahˬpaˬ Miˬyehˇ mehˬ shi iˬ baˇ mˇ-euˬ meh. Sahˬpaˬ Miˬyehˇ-ahˇ aˬ yawꞈ maꞈ uˬ duˬ maˬ tahˬ ni byehˇ dzeh-euˬ meh.

⁷ Kʼoeˇ miˇ neh Sahˬpaˬ Miˬyehˇ nui ma pehˇ laˇ-awˇ, Piˇliˇtiˆ tsawˇ haˬ hawˇ-eu Aˬmoˬ tsawˇ haˬ deuˬ-ahˇ, aˬ yawꞈ maꞈ kʼoeˇ taˆ bi gʼaˬ leˇ-awˇ, aˬ yawꞈ maꞈ-ahˇ bi uˆ lahˇ-euˬ meh.

⁸ Yawˇdaˬ lawˇ baˬ nahˇ ma doˆ kʼehˬ paw Giˇlaˆ miˇ kʼahˬ laꞈ kʼoeˇ jaˆ-eu Aˬmawˇliˆ miˇ kʼahˬ laꞈ kʼoeˇ jawˇ-eu Iˇsaˬleˬlaˆ tsawˇ haˬ deuˬ-ahˇ, tseˇ yehꞈ kʼoꞈ keuˆ ni aˬ yawꞈ maꞈ kʼehˬ nehˬ kʼaˆ nehˬ-euˬ meh.

⁹ Aˬmoˬ tsawˇ haˬ deuˬ-aˬ, Yawˇdaˬ lawˇ baˬ tsehˆ doˆ laꞈ-awˇ, Yuˇdaˆ tsawˇ jeuˬ, Beˬyaˬmiˬ tsawˇ jeuˬ hawˇ-eu, Eˇpaˬleˬ tsawˇ jeuˬ-ahˇ guiˇ deuˆ laˇ-euˬ meh. Iˇsaˬleˬlaˆ tsawˇ haˬ deuˬ-aˬ, nui ma cawˆ dui dui luꞈ-eu meh.

¹⁰ Kʼoeˇ naˇ, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ guˇ-awˇ ehˇ-eu, “Nga maꞈ-euˬ Miˬyehˇ pyeuꞈ-eu nawˬ-ahˇ nga maꞈ byehˇ dzeh-awˇ, Baˬlaˇ miˬ yehˇ deuˬ-ahˇ uˬ duˬ tahˬ-eu laꞈ kʼoeˇ, nawˬ-eu mehˬ shi nga maꞈ iˬ baˇ mˇ-euˬ ma.”

¹¹ Aˬ yawꞈ maꞈ-ahˇ Sahˬpaˬ Miˬyehˇ ehˇ kʼoꞈ nehˬ-eu, “Dzeuˇ laˇ ngeh, Iˇjiˇtuˆ tsawˇ jeuˬ, Aˬmawˇliˆ tsawˇ jeuˬ, Aˬmoˬ tsawˇ jeuˬ, Piˇliˇtiˆ tsawˇ jeuˬ,

¹² Siˇdoˬ tsawˇ jeuˬ, Aˬmaˬlehˇ tsawˇ jeuˬ hawˇ-eu, Maˬoˬ tsawˇ jeuˬ deuˬ naw maꞈ-ahˇ kʼehˬ nehˬ kʼaˆ nehˬ-awˇ, naw maꞈ ngaˬ-ahˇ guˇ ngeh, ngaˇ maw maꞈ-ahˇ maˬ ka kʼoꞈ nehˬ-aˬ loˇ.

¹³ Ehˇ kʼawꞈ, naw maꞈ ngaˬ-ahˇ paˇ byehˇ dzeh-awˇ, miˬ yehˇ nui deuˬ-ahˇ uˬ duˬ paˇ tahˬ-euˬ meh. Teu miˇ neh, naw maꞈ-ahˇ ngaˇ maˬ paˇ ka kʼoꞈ nehˬ ma.

¹⁴ Naw maꞈ neh tseˇ geuꞈ-euˬ miˬ yehˇ deuˬ-ahˇ guˇ gaˬ nehˬ-awˬ. Shaˬ-eu zahˬ-eu jeˬ naw maꞈ ya tahˬ puˬ ngeh, aˬ yawꞈ maꞈ naw maꞈ-ahˇ bi ka kʼoꞈ le-awˬ.”

¹⁵ Ehˇ kʼawꞈ, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ ehˇ-eu, “Nga maꞈ iˬ baˇ mˇ gʼaˬ-euˬ ma. Nawˇ nga maꞈ-ahˇ kʼaˇ jahˇ mawꞈ-eu jeˬ jahˇ nehˬ laꞈ-awˬ. Ehˇ kʼawꞈ, nga maꞈ-ahˇ iˬ nah maˬ ka kʼoꞈ ni taˬ byehˇ nehˬ laꞈ.”

¹⁶ Kʼoeˇ naˇ, boeˇ miˬ siˬ kʼaˬ deuˬ-euˬ miˬ yehˇ deuˬ-ahˇ aˬ yawꞈ maꞈ byehˇ dzeh-awˇ, Sahˬpaˬ Miˬyehˇ-ahˇ uˬ duˬ tahˬ ngeh, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ gʼawˬ shaˬ haw gaˬ-euˬ meh.

¹⁷ Aˬmoˬ guiˇ maꞈ deuˬ guiˇ deuˆ-eu lehˬ hmˬ-awˇ, Giˇlaˆ miˇ kʼahˬ-ahˇ taˆ tsoˆ-awˇ jawˇ-euˬ meh. Iˇsaˬleˬlaˆ tsawˇ jeuˬ kʼawꞈ tiˬ gaˇ oe uiˬ-awˇ, Giˇlaˆ miˇ kʼahˬ Miˇzaˬpaˬ meuˬ-ahˇ taˆ tsoˆ-awˇ jawˇ luꞈ-eu meh.

¹⁸ Kʼoeˇ gaˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ tiˬ gʼaˬ tiˇ gʼaˬ ehˇ-eu, “Aˬmoˬ tsawˇ haˬ deuˬ-ahˇ guiˇ deuˆ-eu gʼaˇ duˬ aˬ suˇ gʼaˬ aˬ yuiꞈ geuꞈ-awˇ sheuˬ gʼeh nmˇ. Kʼaˇ sheuˬ gʼeh-eu gʼaˬ-aˬ, Giˇlaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ kʼoeˇ taˆ aˬ yuiꞈ aˬ tsu ya geuꞈ tehꞈ-a.”