Лукас 10 - ФӀыцӀагъэ ЛъапӀэ

Хьисэ и гъэсэнхэр Тхьэм хуигъэлэжьэну зэрыригъэжьар

¹ Абы и ужькӀэ Зиусхьэным и Ӏумэтым итхэм цӀыху блыщӀ аргуэру къыхихри, езыр здэкӀуэну здигугъэ жылэхэм, щӀыпӀэхэм тӀурытӀурэ игъэкӀуащ, езым япэ иту.

² Хьисэ абыхэм мыр яжриӀащ: – Гъавэр бэв хъуащ, ауэ Ӏузыхыжынухэр мащӀэщ. Аращи, хьэсэр зейм фелъэӀу гъавэр Ӏузыхыжынухэр къигъэкӀуэну.

³ ФыкӀуэ! Щынэм фыхуэдэу, дыгъужьхэм фахызогъэхьэ.

⁴ Бохъши, хъуржыни, вакъи здевмыхьэжьэ, цӀыхухэм сэлам ефхын щхьэкӀи фыкъэмыувыӀэ, гъуэгуанэ фытету.

⁵ Зыгуэрым и унэ фыщеблагъэкӀэ, япэрауэ, «Тхьэм тыншыгъуэ къывит» жыфӀэ.

⁶ Тыншыгъуэ зыхуэфащэ цӀыху а унэм щӀэсу къыщӀэкӀмэ, фызэрыхуэупса тыншыгъуэр абы лъысынущ, щӀэмысмэ, тыншыгъуэм фи деж къигъэзэжынущ.

⁷ Унэ фыздихьам фыщыхьэщӀэ, къыфхутрагъэувэр фшхы, фефэ, сыту жыпӀэмэ лэжьакӀуэм лэжьапщӀэ хуэфащэщ. Фыздыхьа жылэм фыдэтыху, унэ хъуэж фымыщӀ.

⁸ Жылэ гуэрым фыдыхьауэ фрагъэблагъэмэ, фагъэшхыр фшхы.

⁹ Сымаджэхэр вгъэхъуж, Тхьэм и Тепщэныгъэр къазэрыхуэблэгъар яжефӀэ.

¹⁰ Ауэ жылэ гуэрым фыдыхьауэ зыми фримыгъэблагъэмэ, я уэрамхэм фрикӀуэурэ мыр жыфӀэ:

¹¹ «Фи къуажэм дыдэтыху, ди лъакъуэм къытрихьа сабэр фхукӀэрыдогъэлъэлъыж; ауэ зэвгъащӀэ Тхьэм и Тепщэныгъэр къызэрыблэгъар».

¹² НывжызоӀэ, къемэтмахуэм Сэдом къалэм щыпсэуа цӀыхухэм я Ӏуэхур нэхъ тынш хъунущ фезымыгъэблэгъа жылэм и Ӏуэхум нэхърэ.

¹³ Гъуэгу мыгъуэ фытеуващ, Хуразин дэсхэ! Гъуэгу мыгъуэ фытеуващ, Бэтсэид дэсхэ! Сыту жыпӀэмэ фи уэрамхэм щызлэжьа Ӏуэху телъыджэхэр Тиррэ Сидонрэ щызлэжьатэмэ, куэд щӀат а къалэхэм дэсхэр я гуэныхьхэм зэрыхущӀегъуэжрэ, щыгъуэ щыгъын ящыгъыу, сахуэ ятепхъауэ тобэ къызэрахьыжрэ.

¹⁴ Ауэ къемэтмахуэм Тиррэ Сидонрэ я Ӏуэхур нэхъ тынш хъунущ фи Ӏуэхум нэхърэ.

¹⁵ Уэри, Кэпэрнэум, уафэм удрахьеин уи гугъэу къыщӀэкӀынщ. Ущымыгугъ, жыхьэнмэм урадзыхынущ.

¹⁶ ИтӀанэ Хьисэ и гъэсэнхэм захуигъазэри, жиӀащ: – Фэ къывэдаӀуэр Сэ къызэдаӀуэу мэхъу, фэ фызымыдэм Сэри симыдэу мэхъу. Сэ сызымыдэм сыкъэзыгъэкӀуари имыдэу мэхъу.

Хьисэ иригъэжьа цӀыху блыщӀым къызэрагъэзэжар

¹⁷ Хьисэ иригъэжьа цӀыху блыщӀым гуфӀэу къагъэзэжри жаӀащ: – Зи щӀыхьыр ин, уеблэмэ жин бзаджэхэри къыдодаӀуэ уи цӀэр къыщитӀуэм деж!

¹⁸ – УафэхъуэпскӀым ещхьу Ӏиблисыр уафэм къызэрехуэхар Сэ слъэгъуащ, – жиӀащ Хьисэ. –

¹⁹ Мис, Сэ тепщэныгъэ фэстащ блэхэми акърэбхэми зэран къыфхуэмыхъуу фатеувэну, бийм и къару псоми фатекӀуэну. Зыри зэран къыфхуэхъуфынукъым.

²⁰ Ауэ фызыщыгуфӀыкӀын хуейр жин бзаджэхэр къызэрывэдаӀуэр аркъым, атӀэ фи цӀэхэр Тхьэм и тхылъым иритхауэ зэрыщытырщ.

²¹ Асыхьэтым Тхьэм и Псэм Хьисэ и гур гуфӀэгъуэшхуэкӀэ игъэнщӀри, Хьисэ мыр жиӀащ: – Уафэми щӀылъэми щы-Зиусхьэну си Адэ! ФӀыщӀэ пхузощӀ, Ӏущхэмрэ губзыгъэхэмрэ ящыббзыщӀа Ӏуэхухэр сабийхэм хуэдэу щыт къызэрыгуэкӀ цӀыхухэм гурыӀуэгъуэ ящыпщӀащи. Ей, си Адэ, уи ӀэмыркӀэ къэхъуа Ӏуэхущ ар!

²² Си Адэм си ӀэмыщӀэ псори кърилъхьащ. Къуэр зыхуэдэр зыми ищӀэркъым Адэм фӀэкӀ. Ещхьыркъабзэу, Адэри зыхуэдэр зыми ищӀэркъым Къуэмрэ Къуэм Адэр зригъэцӀыхуну хуейхэмрэ фӀэкӀ.

²³ Ар жиӀа нэужь, Хьисэ и гъэсэнхэм захуигъазэри, адрейхэм зэхамыхыу, яжриӀащ: – Гъуэгу махуэ теуващ фэ фи нэм илъагъур зылъэгъуа цӀыхухэр.

²⁴ Сыту жыпӀэмэ бегъымбар куэдми пащтыхь куэдми ялъагъуну хуеящ фэ флъагъур, ауэ ялъэгъуакъым, фэ зэхэфхри зэхахыну хуеящ, ауэ зэхахакъым.

ГущӀэгъулы нэсым теухуауэ

²⁵ Теурэт егъэджакӀуэ гуэр къэуври, Хьисэ игъэунэхун и мураду къеупщӀащ: – УщиякӀуэ, сыт сщӀэн хуейр, гъащӀэ уахътыншэ згъуэтын папщӀэ?

²⁶ – Теурэт Хабзэм сыт итыр? – еупщӀащ абы Хьисэ. – Абы къибджыкӀыр сыт?

²⁷ – «Уи Тхьэу Зиусхьэныр гукӀи, псэкӀи, акъылкӀи, къарууэ уиӀэ псомкӀи фӀыуэ лъагъу». ИкӀи «Уи гъунэгъу цӀыхури фӀыуэ лъагъу, уи щхьэр зэрыплъагъум хуэдэу», – къитыжащ жэуап теурэт егъэджакӀуэм.

²⁸ – Пэжу жыпӀащ, – жиӀащ Хьисэ. – Мис ахэр гъэзащӀи, гъащӀэ уахътыншэ бгъуэтынущ.

²⁹ Ауэ теурэт егъэджакӀуэм и пщӀэр иримыгъэхуэхын щхьэкӀэ, Хьисэ еупщӀащ аргуэру: – Хэт сэ си гъунэгъуу слъытэн хуейр?

³⁰ Хьисэ ущие хъыбар къригъэжьащ: – ЛӀы гуэр Ерусэлим икӀауэ Ерихъуэ здэкӀуэм, хъунщӀакӀуэхэм яӀэщӀэхуащ. Абыхэм ар яупцӀэнщ, удын ирадзри, гъуэгум ныкъуэлӀэу къытранащ.

³¹ Асыхьэтым, дин гъуазэ гуэр а гъуэгумкӀэ кърикӀуэрт. Дин гъуазэм ар щилъагъум, гъуэгубгъум зритри блэкӀащ.

³² Абы ещхьу, Лэуий къытехъукӀа дин лэжьакӀуэ гуэр а щӀыпӀэм щынэсым, гъуэгубгъу зищӀри блэкӀащ, ар щилъагъум.

³³ Ауэ Самарием щыщ лӀы гуэр гъуэгуанэ тету абыкӀэ блэкӀ пэтрэ, лей зылъысар къилъагъури, ар фӀэпсэкӀуэд хъуащ.

³⁴ Ар абы бгъэдыхьэщ, и уӀэгъэхэр санэкӀэ хуитхьэщӀщ, дагъэ хущихуэри, хуипхэжащ. ТхьэмыщкӀэр и шыдым тригъэгъуалъхьэщ, хьэщӀэщ гуэрым ишэри, зыхуей хуигъэзащ итӀанэ.

³⁵ ЕтӀуанэ махуэм дыжьын ахъшэ жьгъеитӀ кърихщ, хьэщӀэщыр зейм иритри, жриӀащ: «Мы лӀым схукӀэлъыплъ, уэстам нэхърэ нэхъыбэ тебгъэкӀуадэмэ, къыщызгъэзэжкӀэ уэстыжынщ».

³⁶ УзэреплъымкӀэ, хэт а цӀыхуищым щыщу лей зылъыса цӀыхум гъунэгъу хуэхъуар? – еупщӀащ Хьисэ абы.

³⁷ – ЗыфӀэпсэкӀуэд хъууэ дэӀэпыкъуар арщ, – къитыжащ жэуап теурэт егъэджакӀуэм. – АтӀэ кӀуэи, уэри абы ещхьу щӀэ, – жриӀащ абы Хьисэ.

Мэрямрэ Мартэрэ

³⁸ АдэкӀэ кӀуэурэ, Хьисэ и гъэсэнхэр и гъусэу жылэ гуэрым дыхьащ. Щыдыхьэм, Мартэ и цӀэу цӀыхубз гуэрым иригъэблэгъащ.

³⁹ Мартэм Мэрям и цӀэу шыпхъу иӀэт. Арати, Мэрям Хьисэ и лъакъуэм пэгъунэгъуу етӀысэхри, Зиусхьэным жиӀэм едаӀуэу щӀидзащ.

⁴⁰ Мартэ хьэщӀэхэр зэригъэхьэщӀэным пылът. Ар Хьисэ бгъэдэкӀуатэри, жриӀащ: – Зи щӀыхьыр ин, си шыпхъум лэжьыгъэ псори си пщэ къызэрыдилъхьар къыпфӀэмыӀуэхуу ара? Ӏуэхур къыздигъэпсынщӀэну схужеӀэт.

⁴¹ – Ей Мартэ, Мартэ! – жиӀащ Зиусхьэным. – Уэ куэдым уолӀалӀэ, куэдым уогугъу,

⁴² ауэ зыт узыхуэныкъуэр. Мэрям нэхъыфӀыр къыхихащи, ар абы зэи ӀэщӀахыфынукъым.