Инус 2 - ФӀыцӀагъэ ЛъапӀэ

Инус Тхьэм зэрелъэӀуар

¹ Зиусхьэным и ӀэмыркӀэ Инус бдзэжьеишхуэм иригъэлъэтэхри, абы и кӀуэцӀым жэщищрэ махуищкӀэ исащ.

² Бдзэжьейм и кӀуэцӀым здисым, Зиусхьэну и Тхьэм елъэӀуащ Инус:

³ – Гузэвэгъуэшхуэм сыхэту сынолъэӀуати, дэӀэпыкъуэгъуншэу сыкъэбгъэнакъым. Хьэдрыхэм и гущӀэм силъу сыноджати сызэхэпхащ.

⁴ Хым и кууупӀэм сыхэбдзэри, псы уэрхэр къыстебгъэджэлат, Уи толъкъун ябгэхэр си щхьэщыгум щызекӀуэт.

⁵ СигукӀэ жысӀащ абы щыгъуэ: «Уи щӀыб къысхуэбгъэзауэ гу къыслъыптэжкъым, ИтӀанэми уи Унэ лъапӀэр иджыри слъагъунущ».

⁶ Псым сыщӀилъафэри, кууупӀэ щӀэншэм сыщӀэтӀысыкӀат, псыхэкӀэ удзхэм си щхьэм зыкърашэкӀат.

⁷ Бгым и лъабжьэм сыщӀэхуэри, игъащӀэкӀэ сыкъыщӀэмыкӀыфыну щӀым сыщӀихъумат. Ауэ Уэ, Зиусхьэну си Тхьэ, а псэзэпылъхьэпӀэм псэууэ сыкъыхэпшащ!

⁸ Зиусхьэн, си псэр пыт къудейуэ, сигу укъэкӀыжри, зыныщыпхуэзгъазэм, си лъэӀур зэхэпхащ, уи Унэ лъапӀэм нэсащ.

⁹ Тхьэ нэпцӀхэр зыгъэлъапӀэхэм къыпхуаӀэн хуей пэжыгъэр ӀэщӀыб ящӀащ.

¹⁰ Ауэ сэ, фӀыщӀэ пхуэсщӀыурэ, къурмэн пхуэзукӀынущ, узэрызгъэгугъар згъэзэщӀэнущ. Зиусхьэныращ дыкъезыгъэлыр!

¹¹ Абы иужькӀэ, Зиусхьэным бдзэжьейр къигъэжьыкхъури, Инус ныджэм къытрыригъэдзэжащ.