Samz 96 - Tèstèman nèf-la: Épi an posyòn an liv samz-la

Sé Bondyé Ki Gwan Wa-a

¹ Chanté an chanté nèf bay Bondyé Senyè-a! Sé pou tout latè-a chanté bay Bondyé Senyè-a.

² Chanté bay Bondyé Senyè-a èk lévé nonʼy. Toulé jou sé pou nou fè moun konnèt bon nouvèl-la mannyè i ja sové nou.

³ Fè sé nasyon-an konnèt pouvwaʼy, èk fè moun konnèt tout gwan twavay i ja fè.

⁴ Bondyé Senyè-a gwan èk i bon pou moun glowifyéʼy, sé pou moun wèspèktéʼy pasé tout sé lézòt bondyé-a.

⁵ Sé bondyé-a sé nasyon-an ka adowé-a sé imaj, mé sé Bondyé Senyè-a ki fè syèl-la.

⁶ Moun ki vini douvanʼy ka wè gwandèʼy èk lonnèʼy, yo ka wè pouvwa Senyè-a èk bèltéʼy an Kay li.

⁷ Sé pou tout moun ki an latè-a glowifyé Bondyé Senyè-a, sé pou yo lévé nonʼy pou pouvwaʼy èk fòs li.

⁸ Glowifyé non Bondyé Senyè-a paski i méwité sa. Mennen an kado èk vini an Kay li.

⁹ Adowé Bondyé Senyè-a ki pa ni fòt-la lè i pawèt, sé pou tout latè-a twanblé douvanʼy.

¹⁰ Di tout sé nasyon-an, “Sé Bondyé Senyè-a ki wa! I mété latè-a fò an plas li èk anyen pa sa soukwéʼy. I kay jijé sé moun-an san pwéféwans.”

¹¹ Sé pou syèl-la kontan èk kité latè-a wéjwi. Kité lanmè-a èk tout sa ki andidanʼy fè dézòd afòs yo kontan.

¹² Sé pou savann-an èk tout sa ki andidanʼy kontan. Sé pyé bwa-a ki an lafowé-a kay chanté afòs yo kontan,

¹³ paski Bondyé Senyè-a ka vini! I ka vini pou jijé latè-a. I kay jijé sé jan latè-a èk jistis èk sé nasyon-an san pwéféwans.