Samz 8 - Tèstèman nèf-la: Épi an posyòn an liv samz-la

Pouvwa Bondyé Èk Pozisyon Lézòm

Sé an sam David

¹ Bondyé Senyè, sé ou ki Senyè nou. Toupatou moun gadé an latè-a yo ka wè pouvwaʼw. Pouvwaʼw ka wivé pli ho pasé syèl-la.

² Manmay èk ti manmay ki ka tété ka chanté pou lévé nonʼw. Pyès lèlmiʼw pa sa fèʼw anyen, ou ka détwi népòt moun ki doubout kont ou.

³ Lè mwen gadé syèl-la ou ja fè-a, lalin-an èk sé étwal-la ou ja mété an plas yo-a,

⁴ mwen di, “Ki sa lézòm yé kon sa, pouʼw ni yo an lidéʼw, èk ki sa gason lézòm yé, pouʼw kontanʼy kon sa?”

⁵ Ou mété yo an ti tak pli ba paséʼw, ou onnowé yo èk ou ba yo pouvwa.

⁶ Ou mété yo anho tout bagay. Ou ba yo kondwi tout sa ou fè:

⁷ mouton épi bèf, èk tout bèt sovay ki an lafowé,

⁸ sé jibyé-a èk sé pwéson-an, èk tout bèt ki lanmè.

⁹ Bondyé Senyè, sé ou ki Senyè nou. Toupatou moun gadé an latè-a yo ka wè pouvwaʼw.