Samz 46 - Tèstèman nèf-la: Épi an posyòn an liv samz-la

Sé Bondyé Ki Ka Pwotèkté Nou

Sé pou yo chantéʼy èk an vwa ki ho

¹ Sé Bondyé ki tout kouway nou, sé li ki ka pwotèkté nou. I toujou pwé pou édé lè nou an twaka.

² Menm si latè-a soukwé, épi sé mòn-an tonbé désann ofon lanmè-a, nou pa kay pè.

³ Menm si lanmè-a gwondé èk tjimé, épi sé ti mòn-an soukwé lè lanmè-a fwapé anlè yo, nou pa kay pè.

⁴ La ni an lawivyè ki ka mennen lajwa an vil Bondyé-a, plas-la koté Bondyé ki pa ni pyès anhoʼy-la ka wèsté-a, plas-la ki sa li yonn-an.

⁵ Bondyé ka wèsté an vil sala, pyèsonn pa sa détwiʼy. Bonnè bonmaten i kay pòté vil-la soukou.

⁶ Sé nasyon-an ka fè kwi afòs yo pè, gouvèdman yo ka tonbé. Bondyé palé kon an kout loway èk latè-a fonn.

⁷ Bondyé Senyè-a ki ni tout pouvwa-a la épi nou. Sé Bondyé Jakòb-la ki ka pwotèkté nou.

⁸ Vini wè sa Bondyé Senyè-a ja fè, bagay ki ja fè jan latè-a wèsté bouch gwan ouvè.

⁹ I ka doubout ladjè toupatou an latè-a, i ka kasé sé bannza-a, i ka détwi sé pitjèt fè-a yo ka sèvi pou goumen-an, èk i ka bwilé sé kawòs ladjè-a.

¹⁰ I di, “Doubout goumen èk sav sé mwen ki Bondyé. Sé mwen ki anho tout sé nasyon-an èk sé mwen ki anho tout latè-a.”

¹¹ Bondyé Senyè-a ki ni tout pouvwa-a la épi nou. Sé Bondyé Jakòb-la ki ka pwotèkté nou.