Samz 45 - Tèstèman nèf-la: Épi an posyòn an liv samz-la

An Chanté Pou Mawiyaj Wa-a

An chanté lanmou

¹ Mwen ni an chay bèl pawòl ka vini an lidé mwen, kon mwen ka konpozé chanté sala bay wa-a. Menm kon an moun ki ka ékwi byen, lanng mwen pawé pou chanté.

² Sé ou ki pli bèl anpami tout nonm ki an latè-a. Bèl pawòl ka sòti an bouch ou. Bondyé ja benniʼw pou tout tan.

³ Bouklé sab ou an wenʼw, gwan wa. Ou ni pouvwa èk moun ka onnowéʼw.

⁴ Mouté kawòs ou, gwan wa. Alé goumen pou fè défans tout sa ki vwé èk dwèt. Lanmen dwèt ou ni asé pouvwa pou sa genyen tout ladjè.

⁵ Sé flèch-la ou ka voyé-a filé an pil, yo ka pèsé tjè lèlmiʼw, èk sé nasyon-an kay tonbé an pyéʼw.

⁶ Gouvèdman-an Bondyé ja ba ou-a kay doubout pou tout tan èk pou tout tan. Ou ka sèvi baton wa-a pou kondwi sé moun ou-an san pwéféwans.

⁷ Ou enmen sa ki dwèt épi ou hayi sa ki mové. Sé pou sa Bondyé ki Bondyéʼw-la ja chwaziʼw épi i ja baʼw tjè kontan pasé pyès lòt wa.

⁸ Had ou ni lòdè losyon ki fèt èk lanmi, lalwé èk kas. Yo ka jwé mizik baʼw pou fè tjèʼw djé, an bèl kay ou-a ki dékowé èk pik léfan-an.

⁹ Anpami sé madanm-lan ki an kay ou-a la ni ich lòt wa. Épi wenn-an doubout an plas lonnè-a asou lanmen dwèt ou épi an pil lò anlèʼy ki sòti an péyi Ofir.

¹⁰ Ou ki ni pou mayé èk wa-a, kouté sa mwen ka di-a. Sé pouʼw obliyé moun péyiʼw èk tout fanmiʼw ki lakay papaʼw.

¹¹ Bèltéʼw ki kay fè wa-a plézi. Sé li ki mèt ou, kon sa ou ni pou obéyiʼy.

¹² Jan péyi Taya kay mennen an pil kado baʼw. Moun ki wich kay vini flatéʼw pou favèʼw.

¹³ Pwennsès-la abiyé an chanm li — pa dé bèl i bèl! Had li fèt épi fil ki fèt an lò.

¹⁴ Yo té mennenʼy byen abiyé an tout bèl had li èk yo pwézantéʼy bay wa-a, èk sé jenn fi-a ki ka édéʼy-la té ka swiv li.

¹⁵ Yo ka antwé an kay wa-a èvèk lajwa èk kontantman an tjè yo.

¹⁶ Wa mwen, ou kay ni an pil gason pou pwan plas ou, èk ou kay mété yo kondwi tout latè-a.

¹⁷ Chanté sala kay fè moun chonjé nonʼw pou tout tan, èk tout moun kay glowifyéʼw pou tout tan èk pou tout tan.