Samz 14 - Tèstèman nèf-la: Épi an posyòn an liv samz-la

Movèzté Lézòm

Sé an sam David

¹ Sé kouyon-an ka di an tjè yo, “La pa ni Bondyé.” Yo pa ka fè anyen ki bon. Tout sa yo ka fè sé movèzté. La pa ni pyès ki ka fè sa ki dwèt.

² Bondyé Senyè-a wèsté an syèl-la èk i gadé lézòm an latè-a, pouʼy wè si la ni pyès an yo ki ni lasajès, pyès an yo ki ka adowéʼy.

³ Yo tout ja pwan vyé chimen. Yo tout mové menm mannyè. Pa ni yonn an yo ki ka fè sa ki bon, pa menm yonn.

⁴ Bondyé Senyè-a di, “Ès sé moun-an ki ka fè méchansté-a pa konnèt anyen? Yo ka manjé sé moun mwen-an menm kon yo ka manjé pen. Sé moun sala pa ka janmen kwiyé anlè mwen.”

⁵ Mé lapè kay pwan yo, yo kay twanblé paski Bondyé ka édé sé moun-an ki ka obéyiʼy-la.

⁶ Sé moun méchan-an vlé anpéché plan sé maléwé-a twavay, mé sé Bondyé Senyè-a menm ki ka pwotèkté sé maléwé-a.

⁷ Pa dé anvi mwen anvi wè Bondyé sòti Zayonn pou vin sové sé moun li-an. Sé désandan Jakòb-la kay wéjwi, sé jan Izwayèl-la kay kontan lè Bondyé Senyè-a kay fè yo viwé doubout asou dé pyé yo ankò, pou yo vini an nasyon ki fò.