Samz 127 - Tèstèman nèf-la: Épi an posyòn an liv samz-la

Glowifyé Bondyé Pou Bontéʼy

An chanté pou lè yo té ka mouté Jérouzalèm

¹ Si sé pa Bondyé Senyè-a ki bati kay-la, twavay sé moun-an ki ka batiʼy-la pa vo anyen. Si sé pa Bondyé Senyè-a ki pwotèkté vil-la, twavay sé moun-an ki ka véyéʼy-la pa vo anyen.

² I pa ka voʼw anyen pouʼw lévé bonnè èk alé dòmi ta, ka twavay wèd pouʼw viv. Paski lè Bondyé enmen an moun, i ka ba li tout sa i bizwen paditan i ka dòmi.

³ Manmay sé an kado Bondyé Senyè-a baʼw, yo sé an bennédiksyon.

⁴ Sé gason-an yon nonm fè paditan i jenn-an sé menm kon flèch ki an lanmen an sòlda.

⁵ An nonm ki ni sak flèch li plen kay kontan an pil. I pa kay hont lè i ka dispité èk lèlmiʼy an bayè vil-la.