Nwɛr a Luk 9 - Abanyom LP New Testament Portions

Jisɔs atom Arɔb ayɛ woba na abal

¹ Jisɔs akog Arɔb ayɛ woba na abal atu mfom yirang, akarɛ abɔ ɛkɔ na nsim arɛ akam abe atugi atɔb alem anɛ ayam.

² Atom abɔ arɛ asɔng aji tebe ɔteb bi ɛjiba ɔtol Ɔsɔwɔ afɛngɛ alem anɛ ayam.

³ Arigi abɔ arɛ, “Ɔtɔb tab ɛjom ajiaji na lijɛn li fɔ. Ɔtɔb tab bite lijɛn, ɔtɔb tab ɛbam, ɔtɔb tab nsɔl lili, ɔtɔb tab akpuga, ɛjɔl ɛlimi.

⁴ Ɛtɛk ajiaji ji wun ɔyɛlɔ ba jɔl na ɛtɛk jifɔ jirang tɛtɛ wun ɔtum ɛjiba jifɔ.

⁵ Anɛ adɛnɔ wun kpera, ba tum ɛjiba abɔ wun ɔkom ɛbubu ji ɛgbɛlɔ wun na ata ji ɛla jɔl mɔng ɛjom ɛrigi ɛkarɛ abɔ.”

⁶ Arɔb ayɛ atum ajɛn bijiba na bijiba atebe ɛteng ɔteb alema anɛ ayam na kpakpa afom.

Buburi bi Hɛrɔd

⁷ Naji Hɛrɔd ntol a Galili ayogɔ abangɛ nsɔl kpakpa yi ɛlɔ lem, abɛl ntakpa buburi, ateb arɛ anɛ bangɔ ajɔl bong arɛ Jɔn nwura alib agba nyimi na liku.

⁸ Bangɔ arɛ Ɛlayija yɔ alɔ teb ɛlɛ, anɛ bangɔ arɛ nyɛna amir wurang yɔ ɔkubingɔ wɛ alɔ fɛngɛ njim na likpen.

⁹ Hɛrɔd abong arɛ, “Mɛ yɔ nkemɔ Jɔn ɛsi. Ba nɛ yɔ nkpɛg yog nsɔl yi fa mbangɛ?” Ajɔl gara arɛ ayɛn Jisɔs.

Jisɔs alɛl anɛ ɛgɔr litil na bɛrɔn

¹⁰ Naji Arɔb ayɛ akurɔ atɔra ji abɔ alemɔ atɔg Jisɔs. Fɔyɔ atabɔ nɔ abɔ na wɛ nfɔnɛ atum na ɛjiba ji akoga arɛ Bɛtsayida.

¹¹ Naji ɛbɔngɛ anɛ ayogɔ abangɛ mfom yi afenɔ atɔna wɛ. Akpera abɔ abong atɔg abɔ abangɛ ɛjiba ɔtol Ɔsɔwɔ, alema anɛ anɔb ba asɛba arɛ anɔb.

¹² Na ngara ligoligo Arɔb ayɛ woba na abal, abal atɔgɛ arɛ. “Tom ɛbongɛ anɛ ji fa tu na bijiba na bigbɛ bi ɛreanɔ ɛlagɛ aji sɛb nsɔl lili na mfom yi abɔ ala nɔnga alagtu afa, ateb arɛ mfom yifa arena ɔnwɔlɛ.”

¹³ Jisɔs afanga, “Wun bafɔnɛ ba karɛ abɔ nsɔl ali.” Abɔ afanga, “Wur ɛkpe ngba brɛd ɛrɔng na nyam alib ɛbal afi ɔsɛb arɛ wur ɛji gona nsɔl lili ɛba karɛ ɛbɔngɛ anɛ ji fa?”

¹⁴ Abalom ɛgɔr litil na bɛrɔn ba ajɔlɔ fɔ. Jisɔs abong atɔg Arɔb ayɛ, “Tɔg abɔ ajɔl na nde na ɛkun ɛkun mɔng anɛ atil abal na woba.”

¹⁵ Batɔnanjim abɛ alem anɔ mɔng wɛ abongɔ anɛ kpakpa ajɔl na nde.

¹⁶ Atab ngba brɛd ɛrɔng na nyam alib ɛbal abri na libonta, akag Ɔsɔwɔ sam abɛg, atab akarɛ Batɔnanjim abɛ arɛ akarɛ anɛ.

¹⁷ Abɔ fɛb ali awuri. Batɔnanjim abɛ afugi nkpal woba na ɛbal na ya asalɔ.

Pita abong arɛ Jisɔs arenɔ Mɛsaya

¹⁸ Ɔfo brang Jisɔs ajɔl kag ɔrɔ na nara mfom. Batɔnanjim abɛ ajɔl na nɛ, abib abɔ, “Baligan nɛ yɔ anɛ abonga arɛ mɛ ndenɔ?”

¹⁹ Abɔ afanga, “Anɛ bangɔ arɛ wɔ Jɔn nwura alib, bangɔ arɛ wɔ Ɛlayija, bangɔ arɛ wɔ nyɛna amir yɔ ɔkubingɔ yɔ alɔ tore afɛngɛ njim aba na likpen.”

²⁰ Wɛ abib, “Wun mɛn? Wun arɛ mɛ ba nɛ yɔ?” Pita afanga, “Wɔ Krayis yɔ Ɔsɔwɔ.”

Jisɔs abong abangɛ liku ɛlɛ

²¹ Jisɔs arigi batɔnanjim abɛ arɛ adɛ tɔg nɛ awiawi nɛ yɔ wɛ arenɔ.

²² Jisɔs atɔg batɔnanjim abɛ arɛ, “Mɔn a Nɛnom ala yɛn ɛriga na ɛgbem nsɔl, atobɛsi, atol a balemanjɔm na ba teba ajing ya Mosis ala wɛ tɛn ayolɛ, na mfo ɛra ala nyimi na liku.”

²³ Jisɔs abong atɔg abɔ kpakpa: “Nɛ awiawi yɔ alagɔ jɔl ntɔnanjim ɔma ateg atɛn ɛlɛ atab krɔs ɛjɛ ɔfo abiabi atɔna mam.

²⁴ Nɛ awiawi yɔ ala gɔ nyangɛ likpen ɛlɛ, ɛlɛ tatan, nɛ awiawi yɔ alɔ tanɛ likpen ɛlɛ na ɛsi ɛjama ala totore.

²⁵ Ba nɔba yi arenɔ akarɛ nɛ arɛ ali nseng ɛyeng atanɛ likpen ɛlɛ?

²⁶ Nɛ awiawi yɔ alɔ bɛl ndɔn na nama na alom ama, Mɔn a Nɛnom atɔb abɛl ndɔn na nɛ naji wɛ alɔ ba na liloba ɛlɛ na liloba Tata na li bateb ɔteb Ɔsɔwɔ.”

²⁷ “Mɛ ntɔga wun ɛtete, bandɛga ba ayemɔ fa anim teg ayonge liku tɛtɛ ayɛn Ɔtol Ɔsɔwɔ.”

Jisɔs ayanga ngoabiji

²⁸ Na mfo ɛnigni naji alɔ bong ɔtɔga bifa, Jisɔs, atab Pita, Jɔn na Jemsi akod ɛwɔng aji ɔrɔ nkaga.

²⁹ Naji ajɔl kag ɔrɔ, libri ɛlɛ ɛyanga abɔma ayɛ ajɔ ya mɔng nwangdo.

³⁰ Fɔ tutu abalom abal, Mosis na Ɛlayija ajog na liloba li libo akuma mbonga na Jisɔs.

³¹ abɔ abonga abangɛ liku ɛlɛ li ɛla lem na Jɛrusɛlɛm naji nkanter Ɔsɔwɔ ala jɔl na ɛtete.

³² Pita na anɛ ba lijɛn abɛ ajɔl lalal, naji abɔ anyimɔ, ayɛn liloba li Jisɔs na abalom abal ayemɔ na nɛ.

³³ Naji Mosis na Ɛlayija alagɔ tum Jisɔs asa, Pita abong atɔgɛ. “Nsɔjama njo, ɛgba nɔb arɛ wur ɛre fa. nɔng wur ɛsi ɛkpa bɛra, jirang ɛja, jirang ji Mosis jingɔ ji Ɛlayija.” (Wɛ akunam ji ajɔl bong).

³⁴ Naji Pita ajɔl bong mfom abumi abole abɔ fɛb, ɛkokob ɛbɔb abɔ naji mfom abumɔ abole abɔ.

³⁵ Lilom ɛjog na mfom yi abumɔ ɛbong, “Fa Mɔn ɔma yɔ ɔlom, yɔ mɛ nɔ yege. Yonge atong karɛ.”

³⁶ Naji lilom ɛlɔ bong ɛlɔ, Jisɔs ajɔl nanting. Batɔnanjim abole anyɔ ategam atɔg nɛ awiawi na ngara yifɔ ji abɔ yɛn.

Jisɔs alem mɔn yɔ ɔlom yɔ akpenɔ ɛbe ɛtugi anɔb

³⁷ Na ɛtɔna ɔfo na ji alɔ budi na ɛwɔng, ɛbɔngɛ anɛ ɛba ɛkɔn Jisɔs

³⁸ Nɛnom na lirɔng abɔ ajog akɔn gbogbo, “Nteteba, mɛ ngɔrɛ wa ndɛ wɔ ɔyɛn mɔn ɔma yɔ lom, ateb fa mɔn ɔma wurang wuranga.

³⁹ Ɛbe ɛtugi ɛbɔb wɛ ɛlemɛ akuma nkɔna; ɛlema wɛ agbɔga ɛtitik aful ajoga wɛ na nyɔ. Ɛnim jɔga ɛdaga wɛ abɔ ɛrungi wɛ ɛjiga.

⁴⁰ Mɛ ngɔrɛ batɔnanjim aba ndɛ akam ɛbe ɛtugi jifɔ ayege, amalam.”

⁴¹ Jisɔs afanga, “Wun anɛ ba ɔdɛnɔ bɛl ntamɛ na ba lema abeɔfɛm! Na jɔl nan na nina nfɛng nkar nan na nina?” Afɛng abong atɔg nɛnom yɔfɔ arɛ, “Bafa na mɔn ɔwa.”

⁴² Naji mɔn yɔ lom ajɔlɔ ba ɛbe ɛtugi ɛromɛ ɛtob na nde na ngbɔbɔga. Jisɔs atob ɛbe ɛtugi ɛgan, alem mɔn ɔfɔ anɔb, atu wɛ akarɛ ndɛ.

⁴³ Ɛkpɔl anɛ kpakpa ɛsi ateb ntakpa ɛkɔ Ɔsɔwɔ. Ɛkpɔl anɛ ɛsi na nsɔl yi Jisɔs alɔ lem, abong atɔg batɔnanjim abɛ

Jisɔs akpɛ bong abangɛ liku ɛlɛ

⁴⁴ “Ba yonge atong ɛnɔb nɔbɛ ji mɛ nagɔ wun tɔg: ala da mɔn a nɛnom akag na abɔ ya ba ayola anɛ.”

⁴⁵ Ntɔga yifa asaram batɔnanjim abɛ mɔng ɛjogɔ. Ɛjɔl ɛbobo ntɔga ategam akun, ajɔl bɛ amir ayɛ amalam abibɛ.

Ba Nɛ yɔ arenɔ ntobɛsi

⁴⁶ Batɔnanjim abɛ akuma nfabɛ na atɛm nɛ yɔ ala jɔl ntobɛsi abɔ.

⁴⁷ Jisɔs akukun ji abɔ ajɔl kɛrɛ, atur na mɔnsɛ ayeme alag ɛlɛ.

⁴⁸ Abong atɔg abɔ, “Nɛ awiawi yɔ akperɔ mɔn sɛ yɔfa na mbeng ɛma akpera mam; nɛ awiawi yɔ akperɔ mam akpera nɛ yɔ atomɔ mam. Nɛ yɔ agalɔ rɛda na ɛbɔngɛ ɛjina kpakpa wɛ yɔ ala jɔl ntobɛsi.”

Nɛ yɔ adɛlɔ wur tɔna are nɛ ɔjing ɔwura

⁴⁹ Jɔn abong arɛ. “Nsɔjama njo Wur ɛyɛn nɛyɔ akɔga mbeng ɛya ayege abe atugi wur ɛnɔk arɛ ɛsidi wɛ ateb wɛ ayɔbam lirɔn ɛlira.”

⁵⁰ Jisɔs abong atɔg abɔ, “Ɔtɔb wɛ sidi, Nɛ awiawi yɔ adɛnɔ jɔl akara, anɔga wa.”

Anɛ ba Samaritan atɛn Jisɔs

⁵¹ Naji ngara alagɔ lome yi ala wɛ tab ajɛn na libo, Jisɔs alem litem ɛlɛ arɛ alag tum aji Jɛrusɛlɛm

⁵² Atom ba teb ɔteb arɛ agbɔ mba na ɛkpa ɛgbɛ Sameriya aji tore mfom abomɛ.

⁵³ Anɛ ba ɛjiba jifɔ wɛ akperam, ateb arɛ ajɔl ji Jɛrusɛlɛm.

⁵⁴ Naji Batɔnanjim abɛ Jemsi na Jɔn ayɛnɔ jifa, abɔ abong arɛ, “Tata, ɔsɛba arɛ wur ɛkog ngon na libo ɛba fi abɔ ɛ?”

⁵⁵ Jisɔs akpede atob abɔ ɛgan.

⁵⁶ Jisɔs na batɔnanjim abɛ atum ajɛn ɛkpa ɛgbɛ jindɛga.

Mɔng ɔmal ɔlem ɔtɔna Jisɔs

⁵⁷ Naji abɔ ajɔlɔ jɛn na mba, nɛnom wurang abong atɔg Jisɔs, “Mɛ naga tɔna mfom ayiayi yi wɔ ɔfenɔ.”

⁵⁸ Jisɔs afanga, “Abrambi akpe abe, anyamfor akpe bijo, mɔn a nɛnom akpem mfom yi ala nɔnga arɛdɛ ɛkɛr.”

⁵⁹ Abong atɔg nɛnom yɔngɔ, “Tɔna mam.” Wɛ afanga, “Tata nɔng mɛ ntɔg gbɔ mba nji rim nsɔjama.”

⁶⁰ Jisɔs afanga wɛ, “Nɔng akuanɛ arim liabɔ, wɔ ba sɔng ɔji tebe ɔteb bi ɛjiba ɔtol Ɔsɔwɔ.”

⁶¹ Nɛ yɔngɔ abong atɔgɛ, “Mɛ na tɔtɔna Tata, nɔng mɛ ngbɔ mba nji tɔg nub ɛma ndɛ wun ɔjɔlɔ.”

⁶² Jisɔs afanga, “Nɛ awiawi yɔ alɔ fele ɛro anwek abri na njim afomam na ɔtol Ɔsɔwɔ.”