Nwɛr a Luk 8 - Abanyom LP New Testament Portions

Abakal ba atɔnɔ Jisɔs

¹ Naji ngara akpɛlɔ ji, Jisɔs atum lijɛn aseng na bijiba na akpagbɛ, abonga anɔba alom abangɛ Ɔtol Ɔsɔwɔ. Batɔnanjim abɛ woba na abal ajil na nɛ.

² Abakal ba alemɔ nɔ abɔ anɔb ayege abɔ abe atugi, na ayam atɔb atɔna wɛ, Meri yɔ ajɔl wɛ kog arɛ Magdalen yɔ ayegɔ wɛ abe ɛtugi arima.

³ Jowana nkal a Kusa, yɔ ababɛ ɛtɛk Hɛrɔd, Susana, na agbem abakal bangɔ. Abakal ba fa akɔl nsɔl yi abɔ akpenɔ ajɔ nyangɛ Jisɔs na Atɔnanjim ayɛ.

Ligan li mbima amuga nsɔl

⁴ Anɛ ajɔl jog na ɛgbem bijiba abaga naji Jisɔs, naji ɛbɔngɛ ɛlɔ gba Jisɔs atob abɔ ligan lifa.

⁵ “Mbima ɛgbɛ ajil abim amug a nsɔl ayɛ. Naji awuri amug yafɔ, amuga nsɔl yandɛga awuri na mba, anɛ anyɛdɛ anyamfor ali.

⁶ Yandɛga awuri na atal naji akumɔ mɛra, atore akpɔ ateb alib ajɔlam fɔ.

⁷ Yandɛga agbɔl ayɛl na ajɔnga amɛr ajɔnga ajumi abɔ

⁸ yangɔ agbɔ na ɛteng nde abenga ɛnɔbnɔbɛ, mug ayiayi akab nkab atil arɔn.” Jisɔs akur bong, arigi abɔ, “Nɛ awiawi yɔ akpenɔ atong nɔng ayog!”

Ji ɛkerɔ atob ligan lifa

⁹ Batɔnanjim abɛ abibɛ ji ligan lifɔ ɛjogɔ.

¹⁰ Jisɔs abong arɛ, “Ɔsɔwɔ agba wun lem ɔmɛngɛ nsɔl yi abirɔ abangɛ Ɔtol Ɔsɔwɔ.” Anɛ bangɔ ntoba abɔ ligan. Na ngara yi ala bri anim yɛn, ayonge atong ɛnim sar abɔ.

¹¹ Yog lisara li ligan lifa: Mug yi arenɔ lilom Ɔsɔwɔ.

¹² Amug ya agbɔlɔ na mba are anɛ ba alɔ yog nim aba yege alom yafɔ na ntem abɔ, na ngara yi adɛmal atamɛ abɛl ɔnyangɛ

¹³ Ya agbɔlɔ na atal are anɛ ba ayoga alom Ɔsɔwɔ akɔ na ɛyɛbalitem titi abɛl am arug. Ala tamɛ nana ngara sed, ngara yi ligara ɛlɔ ba abɔ agbɔ.

¹⁴ Amug ya agbɔlɔ ayɛl na ajɔnga are anɛ ba ayogɔ alom Ɔsɔwɔ naji abɔ ajɛna ajiga na likpen abɔ, ɛfegayɔ ayɔ abangɛ nsɔl likpen, afang, anɔba nsɔl ya likpen, ala bole ntem abɔ ɛtɔna fɔ anim lem ɛnɔbnɔbɛ.

¹⁵ Amug ya agbɔlɔ na ɛteng nde are akarɛ anɛ ba ɛtete na nɔba litem, ba ayoga alom Ɔsɔwɔ, abɔb abom na ntem, akak asig akab ateng akab.

Ligan li ɛnwɔlɛ

¹⁶ “Nɛ sang yɔ ala wɔnlɛ ɛnwɔlɛ abir na ndɛl afi akɔ akag na nub a ɛgbenga. Anwɔlɛ akone na ɛkone ɛnwɔlɛ ngara yi nɛ alɔ yɛl na njo ala yɛn liro lifɔ.

¹⁷ Sang ji abirɔ ji ɛdɛ jog na ɛtegla. Sang ji abolɔ ji ɛdɛ rebi na ɛwerang.

¹⁸ Ɛlɔ jɔl anɔ kone ɛkpo ngara yi mɔng ɔyoga, nɛ awiawi yɔ akpenɔ alɛ kpɛkpɛlɛ, nɛ yɔ adɛnɔ bɛl ji akɛrɔ arɛ akpenɔ alɛ tatabɛ.”

Nyɛn Jisɔs na Abɔnyɛn abɛ

¹⁹ Nyɛn Jisɔs na Abɔnyɛn abal wɛ nyɛna, wɛ amal am arir na biji ateb ɛbɔngɛ anɛ.

²⁰ Nɛ wurang atɔgɛ arɛ, “Nija na Abɔnyɛn aba ayem na ɛtegla asɛba arɛ ayɛna.”

²¹ Jisɔs afanga abɔ, “Nijama na abɔnyɛn abama are anɛ ba ayoga alom Ɔsɔwɔ akɔ akag na nema.”

Jisɔs anarɛ ntakpa nfɛb

²² Ɔfo brang Jisɔs atɔg atɔnanjim abɛ arɛ, “Ba ba wur ɛkod na nkon aya.” Ayɛl na ɛgba atum lijɛn.

²³ Na ji afiga ajiga, Jisɔs agbɔ lilɔ. Ntakpa nfɛb aba na aya alib ayɛl na ɛgba, abɔ ajɔl na ntakpa ɛfen.

²⁴ Batɔnanjim abɛ aji nyimi wɛ abonga, “Nsɔjira njo, ɛlag kpɔ o!” Jisɔs anyimi, anyam mfɛb yi fɔ na ɛbog alib, mfɛb adɛ mfom anar.

²⁵ Jisɔs abib batɔnanjim abɛ, “Ntamɛ ɛyina mɛn?” ɛpkɔl abɔ ɛsi na ɛkokob abong atɔg atɛm. “Fa ba nɛ yɔ anyama nfɛb ayoga wɛ.”

Jisɔs atore nɛnom yɔ akpenɔ abe atugi

²⁶ Abɔ afi aji rir na mfom yi akoga arɛ Jɛrasɛn, ji ɛreanɔ na nkone ngɔ yi aya Galili.

²⁷ Na ji Jisɔs ajigɔ ata na ɛgbok, nɛnom yɔ akpenɔ ɛbe ɛtugi akɔn wɛ. Mba agba rab yi nɛnom yɔfɔ ajɔl jɛn ɛbonjoga nig afɛng ajɔl na ɛtɛk ajɔl na mfom alim.

²⁸ Na ji ayɛnɔ Jisɔs, agbɔ wɛ na ata akɔn gbogbo, “Ɔsɛba jɛn na agama, Jisɔs Mɔn a Ɔsɔwɔ bi Ɛyurɔyura? ɛtiti ɔtɔbam kag ɛriga.”

²⁹ Abong anɔ ateb Jisɔs agba nyam abe atugi yafɔ arɛ ajog na biji ɛbɛ. Na ɛgbem ngara atugi abɔb wɛ. Ɛjɔl ji agbadɛ wɛ agbakɔbɔ na ata na abɔ, anɛ ajɔ wɛ babɛ ɛbe ɛtugi ɛjɔl wɛ kam ɛkaga na ɛkpelele.

³⁰ Jisɔs abibɛ, “Wɔ ɔnyina nan?” Wɛ afanga “Lejɔn” ateb ɛgbem abe atugi agba wɛ yɛl.

³¹ Abe atugi yafɔ agɔrɛ Jisɔs nkpɛlɛkpɛlɛ arɛ adɛ nɔngɛ abɔ ayɛl na ndula libe li ɛdɛnɔ bɛl nkulsi.

³² Ɛbɔngɛ akog ɛjɔl li nsɔl ɛlagɛ ɛtang, abe atugi ya fɔ agɔrɛ Jisɔs arɛ anɔngɛ abɔ aji yɛl akog ya afɔ, akarɛ abɔ ɛkɔ.

³³ Fɔyɔ abe atugi yafɔ alɔ jog na biji nɛnom yɔfɔ ajil ayɛl akog ya fɔ, ɛbɔngɛ akog ya fɔ abɛna abudi ayɛl na aya yafɔ atan.

³⁴ Naji balɛga akog afɔ ayɛnɔ ji ɛlɔ lem, abɔ abɛna aji tɔra na ɛjiba na afom yangɔ ya arenɔ alagɛ fɔ.

³⁵ Anɛ abal arɛ aba yɛn ji ɛlɔ lem. Naji alɔ yɛn Jisɔs ayɛn nɛnom yɔfɔ yɔ abe atugi agbalɔ wɛ jog na biji ajigɔ na ata Jisɔs, agbalɔ leba na arɔn ayɛ na nsɛrɛ, abɔ abɛl ɛkokob.

³⁶ Anɛ ba agbalɔ yɛn atab atɔga anɛ ngara mɔn nɛnom abe atugi yɔfɔ agbalɔ nɔb.

³⁷ Fɔyɔ anɛ kpakpa ba bijiba bi Jɛrasɛn atɔg Jisɔs arɛ atum abɔ asa, ateb abɛl ɛkokob. Wɛ atum ayɛl na ɛgba ajɛn.

³⁸ Nɛnom yɔ abe atugi ajogɔ wɛ na biji agɔrɛ wɛ arɛ alagɛ tɔna, wɛ atɛn arɛ,

³⁹ “Sɔng na ɛtɛk, ɔbong ɔtɔg anɛ ji Ɔsɔwɔ alɔ lem akara.” Nɛnom ɔfɔ afɛngɛ njim na bijiba aji tɔra atɔg anɛ ji Jisɔs alɔ lem akarɛ.

Jisɔs anyimi mɔn yɔ kal yɔ akpɔlɔ afɛng alem nɛnkal ɔyam anɔb

⁴⁰ Naji Jisɔs afɛngɔ ɛbɔngɛ ɛbal ɛkpera wɛ ateb ajɔl wɛ seg.

⁴¹ Ɛbɛl nɛnom wurang yɔ ajɔl wɛ kog are Jayirus, ntobɛsi na ɛkpasega abal aba jumi ndung na ata Jisɔs agɔrɛ wɛ arɛ aba na ɛtɛk ɛjɛ.

⁴² Ateb mɔn ɔwɛ yɔ ɔkal wurang wuranga mɔn yɔ nya woba na ɛbal alag kpɔ. Naji Jisɔs ajɛna ajiga ɛbɔngɛ anɛ ɛgba wɛ ɛkag.

⁴³ Na ɛbɔngɛ jifɔ ɛbɛl Nɛnkal wurang yɔ along ajɔlɛ jog na nya woba na ɛbal nɛ sang yɔ amalɔ alemɛ anɔb.

⁴⁴ Ajog wɛ na njim abal afele wɛ na ntong ɛwuri, fɔtutu along akeme.

⁴⁵ Jisɔs abib, “Ba nɛ yɔ akɔmɔ mam?” Naji abɔ fɛb atɛnɔ, Pita abong, “Nsɔjama njo ɛbɔngɛ ɛgba wa nyɛdɛ.”

⁴⁶ Jisɔs abong, “Nɛ akɔma mam, mɛ nkukun ɛkɔ ɛgba mam jog.”

⁴⁷ Fɔyɔ nɛnkal yɔ fɔ ayɛna arɛ agba wɛ renge, akuma ntigi aba gbɔ wɛ na ata. Na libri anɛ, atɔra ji ɛkerɔ wɛ akɔma wɛ na ngara yifɔ anɔb fɔ tutu.

⁴⁸ Wɛ abong atɔgɛ, “Mɔn ɔkal ntamɛ ɛya agba wa lem ɔnɔb. Sɔng na likɔna.”

⁴⁹ Naji Jisɔs akpenɔre abonga ntɔga, nɛ wurang ajog na ɛtɛk Jayirus ntobɛsi a ɛkpasega. Aba tɔgɛ arɛ, “Mɔn ɔwa yɔ kal agba kpɔ, ɔtɔb kpɛ fege nteteba ayɔ.”

⁵⁰ Naji Jisɔs ayogɔ abong atɔg Jayirus arɛ, “Ɔtɔb bɛ, bɛl ntamɛ, ala nɔnɔb.”

⁵¹ Naji Jisɔs arirɔ na ɛtɛk Jayirus atamam nɛ atɔna wɛ ayɛl ndɛg Pita, Jɔn na Jemsi na ndɛ na nyɛn mɔn yɔ fɔ.

⁵² Na ngara yifɔ. Anɛ kpakpa akuma wɛ ndera akara liku ateb liku mɔn yɔfɔ. Jisɔs abong arɛ, “Balɔ arer wɛ aka kpɔ am alalal.”

⁵³ Abɔ ayɔlɛ ateb anyinyi arɛ wɛ agba kpɔ.

⁵⁴ Jisɔs afele wɛ na ɔbɔ abong, “Mɔn ɔma, tum yema!”

⁵⁵ Ɛtugi ɛjɛ ɛfɛngɛ, fɔ tutu atum ayema. Fɔ yɔ Jisɔs atɔgɔ nɔ abɔ arɛ akarɛ ɛjom lili ali.

⁵⁶ Ɛkokob ɛjɔl na anɛ abɛ, arigi abɔ arɛ adɛ tɔg nɛ awiawi ji ɛlɔ lem.