Nwɛr a Luk 6 - Abanyom LP New Testament Portions

Mbiba abangɛ Ɔfo Ɛrɛdɛkɛr

¹ Na Ɔfo Ɛrɛdɛkɛr Jisɔs ajɔl jɛn na ɛgbɛ ji abimɔ nsɔl yi akoga arɛ nsam, atɔnanjim abɛ akuma mfugi asi a nsam, afore afuli afɛb aliga amug.

² Anɛ ba Farasi abibɛ, “Bɛjom ji wun ɔlema litom li ajigi abongɔ arɛ wun ɔdɛlem na Ɔfo Ɛrɛdɛkɛr?”

³ Jisɔs afanga abɔ, “Wun ɔka kogam ji Defid na anɛ ba ɔta lijɛn abɛ alemɔ ngara yi njal ayamɔ abɔ-ɛ?

⁴ Wɛ ayɛl na njo Ɔsɔwɔ aji tab brɛd bi ɛrenɔ ɛkarɛ Ɔsɔwɔ ali, atɔb akarɛ anɛ ba ɔta lijɛn abɛ. Njing atamam arɛ anɛ banga ali ndɛg nemanjɔm Ɔsɔwɔ.”

⁵ Jisɔs akur bong atɔg abɔ arɛ, “Mɔn a Nɛnom yɔ arenɔ Tata bi Ɔfo Ɛrɛdɛkɛr.”

Jisɔs alem Nɛ yɔ Ɔbɔ ɛlɔ jog anɔb na Ɔfo Ɛrɛdɛkɛr

⁶ Na Ɔfo bingɔ bi Ɛrɛdɛkɛr Jisɔs ajil na ɛkpasega aji kuma nteba. Nɛnom wurang yɔ ɔbɔ bilom ɛlɔ jog ajɔl fɔ.

⁷ Anɛ ba Farasi na ba Teba ajing ajɔl sɛb mba yi akone Jisɔs mfɛm na ɛsi, ajɔl babɛ arɛ ayɛn mɔng alagɔ wɛ lem anɔb na Ɔfo Ɛrɛdɛkɛr.

⁸ Jisɔs akukun ji abɔ ajɔl kɛrɛ. Abong atɔg nɛ yɔ ɔbɔ ɛlɔ jog arɛ, “Tum yema wɔ ɔjɛn ɔba na ɔsi.” Wɛ atum ayema fɔ.

⁹ Jisɔs atɔg abɔ arɛ, “Nag wun bib mbiba. Bɛjom ji njing adalɔ wur abɔ arɛ wur ɛlem na Ɔfo Ɛrɛdɛkɛr. Bilom bi afi nɔba? Ɔnyangɛ likpen afi ɔrungi likpen?”

¹⁰ Wɛ abri abɔ fɛb, abong atɔg, nɛnom ɔfɔ, “Tini ɔbɔ ɛba.” Wɛ atini ɔbɔ ɛtore ɛnɔb.

¹¹ Abɔ arag ntem akuma mbonga atɔga atɛm ɛjom ji ala lem Jisɔs.

Jisɔs arang Arɔb ayɛ woba na ɛbal

¹² Ɔfo brang, Jisɔs ayur na ɛwɔng arɛ aji kag ɔrɔ, ajɔl alagtu kpukpul akaga ɔrɔ akarɛ Ɔsɔwɔ.

¹³ Na ji ɔforanfo ɛlɔ kparɛ, akog batɔnanjim abɛ atu ɛlɛ arang anɛ woba na abal akog abɔ Arɔb:

¹⁴ Sayimɔn (yɔ agorɔ wɛ mbeng Pita), na mɔnyɛn ɔwɛ Andru; na Jemsi, na Jɔn, na Filip, na Batilɔmi,

¹⁵ na Matiyu, na Tɔmasi, na Jemsi mɔn a Alfɛyus, na Sayimɔn yɔ ajɔlɔ wɛ kog arɛ Silɔt

¹⁶ na Judas mɔn a Jemsi, na Judas Isikariyɔt, yɔ ayubɔ Jisɔs na ata.

Jisɔs ateb, atore anɛ

¹⁷ Naji Jisɔs na Arɔb ayɛ abudɔ na ɛwɔng, ɛbɔngɛ Batɔnanjim abɛ aba yema na mfom yi arenɔ sɛl, ɛbɔngɛ anɛ ba ajogɔ Judiya, Jɛrusɛlɛm bandɛga ajog na nkɛ ɛgbok aya Taya na Sayidɔn.

¹⁸ Abal arɛ aba yogɛ afɛngɛ anɔb ayam, anɛ ba abe atugi afege abɔ ayɔ alem abɔ anɔb.

¹⁹ Anɛ kpakpa ajɔl sɛb mba arɛ alagɛ abɔ ateb ɛkɔ ji ɛjɔlɔ wɛ jog ɛjɔl lem abɔ fɛb anɔb.

Ɛyɛbalitem na Ndɔn

²⁰ Jisɔs abri batɔnanjim abɛ abong, “Lifola na akpak, Ɔtol Ɔsɔwɔ ɛre ɛkarɛ wun.

²¹ Lifola na anɛ ba njal batig; ala wuwuri. Lifola na anɛ ba arera batig; wun ɔla yɔyɔl.

²² Lifola na na yɔ anɛ ajinga wa, atɛna wa, atoga wa ateb Mɔn a Nɛnom.

²³ “Rang, wɔ ɔbin na ɛyɛbalitem, nsɔl yi fɔ ɛlɔ lem ɛkara ateb ntore ɛya afafang na Ɔtol Ɔsɔwɔ. Anɔ yɔ anɛ abɔ ba ɛmini alemɔ ba yɛn amir.

²⁴ “Ligbo na nina afang anɛ batig, ateb arɛ wun ɔgba bɛl nyɛba likpen.

²⁵ Ligbo nana yɔ ɔlɔ wuri batig, wɔ ɔla jɔl njal. Ligbo ɛjɔl nana yɔ ɔyɔla batig, wɔ ɔla kar liku ɔjɔ fɛngɛ ɔrer.

²⁶ Ligbo ɛjɔl na na yɔ anɛ abonga atenga nsɔl abangɛ wa, anɔ yɔ anɛ abɔ ba ɛmini alemɔ bayɛn amir ba akemakem.

Likɔrɔ li anɛ ba ɔjing

²⁷ “Wun ba ɔyoga mam: Ba bɛl likɔrɔ na anɛ ba ɔjing abina, wun ɔlem ateng a nsɔl ɔkarɛ anɛ ba ɔraga abɔ.

²⁸ Tɔg Ɔsɔwɔ akarɛ anɛ ba atoga wa lifola. Wɔ ɔkag ɔrɔ ɔkarɛ anɛ ba akaga wa ɛriga.

²⁹ Nɛ awiawi yɔ aromɔ wa na ɛja ɔkpɔga, sibi ɛja jingɔ wɔ ɔkarɛ akpɛ rom. Nɛ awiawi yɔ atabɔ wa nkot, nɔngɛ wɛ akur kɔ ɛlimi.

³⁰ Karɛ nɛ awiawi yɔ alɛmɔ wa, nɛ awiawi yɔ atabɔ ɛjom ɛja ɔtɔbɛ tɔg arɛ afɛra wa.

³¹ Lem karɛ anɛ ji ɔsɛbɔ arɛ alem akara.

³² “Ɔlɔ bɛl likɔrɔ na anɛ ba ɔkɔra abɔ baba, ba nseng yi ɔla bɛl? Ɛjɔl anɛ ba abeɔfɛm akpe likɔrɔ na anɛ ba ateba abɔ likɔrɔ.

³³ Ɔlɔ lem ateng a nsɔl ɔkarɛ anɛ ba alema ateng nsɔl akarɛ wa, ba nseng yi ɔla bɛl? Ɛjɔl anɛ ba abeɔfɛm anɔnga alema anɔ.

³⁴ Ɔlɔ bɔ anɛ akpuga ba ɔkɛrɛ arɛ ala tore atu akara, ba nseng yi ɔla bɛl? Ɛjɔl anɛ ba abeɔfɛm abɔga atɛm akpuga asega arɛ akpe abɔ ngara mɔng abɔ akarɔ.

³⁵ “Bɛl likɔrɔ na anɛ ba ajing aba, ɔlem nɔba ɔkarɛ abɔ, ɔlɔ bɔ nɛ akpuga ɔdɛ bɛl ɛkɛkɛrɛ arɛ atore atu akara. Wɔ ɔla bɛl ntakpa ntore, wɔ ɔla jɔl Mɔn a Ɔsɔwɔ bi Ɛyurɔyura, ateb wɛ anɔb litem na anɛ ba adɛgɛ kag sam na abe anɛ.

³⁶ Nɔb litem na anɛ mɔng Nsɔja anɔbɔ litem.

Ɔtɔb lam anɛ

³⁷ “Ɔtɔb lam anɛ adɛ tɔb alama. Ɔdɛ rungi anɛ, anim tɔb arungi wa. Tum karɛ anɛ ateg atum akara.

³⁸ Karɛ anɛ, ala kakarɛ. Ɛyarɛ ɛja alɔ atore afɛngɛ njim akara ɛla ror ɛwuri na nde, ji ɔgarɔ ɔkarɛ jiji ala tɔb akɔ agara akara.”

³⁹ Jisɔs atob abɔ ligan li fa. “Naga amir amamal ateb ntɛm naga amir mba ɛ? abɔ anim gbɔ ayɛl na libe ɛ?

⁴⁰ Nkpekpele anim ma jɔg aseng nteteba, nkpekpele yɔ atorɔ wɛ ala jɔl mɔng nteteba yɔ atebɔ wɛ.

⁴¹ Bɛjom ji ɔbri lisan na limir mɔnyɛn ɔwa, ɔdɛk yɛn ɛbɛg ɔte na limir ɛla?

⁴² Ɛla lem nan ɔtɔg mɔnyɛn ɔwa arɛ, ‘mɔnyɛn ɔma, ɛtiti nɔng mɛ nyege wa lisan na limir ɛla,’ na ji wɔ ɔdɛk yɛn ɛbɛg ɔte na limir ɛla? Wɔ nɛ a nbri ɛbal! Gbɔ mba yege ɛbɛg ɔte na limir ɛla, na ji ɔla ɔmal ɔyɛn ɛnɔbnɔbɛ ɔyege lisan na limir mɔnyɛn ɔwa.

Ɔte na akab ayɛ

⁴³ “Ɛteng ɔte ɛnim teg ɛkab abe akab, nig ɛbe ɔte ɛkab ateng akab.

⁴⁴ Ɔte abiabi ɔrenge na akab ayɛ, ɔnim ma bɔng akab ɔjuju na ɔte ajɔnga, ɔnim ma bɔng amuruku na ɔtenyam akoma.

⁴⁵ Ɛteng nɛ abaga na ateng a nsɔl ya ayɔbɔ wɛ na litem, ɛbe nɛ titi abaga na abe nsɔl ya ayɔbɔ wɛ na litem, nyɔ bi ɛbonga nsɔl yi ɛlɔ ror na litem.

Ɛdadab na nwak a nsiga ɛtɛk

⁴⁶ “Bɛjom ji wun ɔkoga mam, ‘Tata, Tata’ ɔdɛg lem ji mɛ ntɔga wun?

⁴⁷ Nɛ awiawi yɔ abalɔ na agama ayog alom ama alem anɔ mɔng nbongɔ, mɛ na teb mɔng wɛ arenɔ.

⁴⁸ Are mɔng nɛ yɔ arimɔ alub atana adul asil ɛtɛk ɛjɛ akone na atal, nyɛl alɔ ba akud abole ɛtɛk ji fɔ ɛnim teg ɛnyɛngɛ ateba arɛ asil na nsɛrɛ.

⁴⁹ Yɔ nɛ awiawi yɔ ayogɔ alom ama adɛ kɔ akag na nema, are mɔng nɛ yɔ asilɔ ɛtɛk adɛ rim aluba atana adul, nyɛl alɔ ba akud ɛtɛk ji fɔ ɛgbɔgbɔ ɛrungi fɛb.”