Nwɛr a Luk 24 - Abanyom LP New Testament Portions

Jisɔs ayimi na liku

¹ Na ngbɔgamba ɔfo na ɛrida, Ɔforanfo bribri abakal ajil na ɔlim, afele nsɔl yi ɛlu ya abɔ alemɔ.

² Abɔ asɛb akun arɛ agba bingi lital na nyɔbo ɔlim,

³ naji abɔ ayɛlɔ ayɛnam ɛku Tata Jisɔs.

⁴ Naji abɔ ajɔlɔ kɛrɛ abangɛ,fɔ tutu abalom abal ba ayɔbɔ abɔma ya ajɔl ya mɔng nwangdo aba yema abɔ na nkɛ.

⁵ Na ɛkokob, abakal bafɔ akug mbri na nde, abalom bafɔ abonɡ atɔg abɔ arɛ, “Bɛjom ji wun ɔsɛba likpen na ɛbɔngɛ akuanɛ?

⁶ Wɛ fa san, wɛ agba nyimi! Gbɔ nter ji atɔgɔ wun naji akpenɔ re nanina na Galili:

⁷ ‘Ala dabɔ Mɔn a Nɛnom akarɛ anɛ ba abeɔfɛm, alɛ yol na mfo ɛra anyimi na liku.’ ”

⁸ Abɔ agbɔ nter alom ayɛ.

⁹ Naji akurɔ na ɔlim abal atɔg batɔnanjim woba wurang na anɛ bangɔ nsɔl yi ɛlɔ lem.

¹⁰ Abakal bafɔ ajɔl Meri Magdalen, Jowana, Meri nyɛn Jemsi na abakal ba ngɔ, ba atɔgɔ Arɔb ayɛ.

¹¹ Arɔb ayɛ ategam atamɛ ji abakal bafɔ ajɔl bong, ateb alom abɔ ajogam ɛsi na mba.

¹² Pita atum ayima abɛna aji na ɔlim; akuma ayɛn aja abɔma anɔngɔ ntinga ntinga, afɛngɛ ajɛn akɛrɛ ji ɛlɔ lem.

Na mba yi Ɛmayus

¹³ Na ɔfo bi fɔ, batɔnanjim abal ba Jisɔs ajɔl ji na ɛkpa ɛgbɛ ji ajɔl kog arɛ Ɛmayus, ajɔl mal arima bɔm na Jɛrusɛlɛm.

¹⁴ Abɔ ajɔl bong na atɛm abangɛ kpakpa nsɔl yi ɛlɔ lem.

¹⁵ Naji abɔ ajɔl bong afɛngɛ atoba ɛka abangɛ nsɔl yi ɛlɔ lem na atɛm, Jisɔs wɛ nfɔnɛ aba kuma njɛna na abɔ.

¹⁶ Ɔsɔwɔ alem arɛ adɛ wɛ renge.

¹⁷ Jisɔs abib abɔ, “Bɛjom ji wun ɔbonga na atɛm, na ji wun ɔjɛna?” Abɔ ayema, na nbri ndɔn ndɔn.

¹⁸ Nɛ wurang na ɛbɔngɛ abɔ yɔ anyina arɛ Klopas, abibɛ, “Wɔ nanting ɔrenɔ njɛna nɛ na Jɛrusɛlɛm yɔ ɔdɛdɛ yog nsɔl yi ɛlema na abɔn afo fa?”

¹⁹ Wɛ abib arɛ, “Ba nsɔl yi?” Abɔ afanga arɛ, “Nsɔl yi ɛlemɔ Jisɔs yɔ Nasarɛt. Ajɔl nyɛna amir abɛl ɛkɔ na alom na nema na libri Ɔsɔwɔ na anɛ kpakpa.

²⁰ Atol a balemanjɔm na atobɛ ɛsi ayira adal wɛ abɔ akarɛ akem ɛlam arɛ akpɔ, akomɛ na krɔs.

²¹ Wur ɛjɔl kɛrɛ arɛ wɛ yɔ ala jɔl nɛ yɔ ala nyangɛ Isrɛl. Seng fɔ sa, ɛlɛl mfo ɛra bɔm naji ɛlemɔ.

²² Kpɛlɛ fɔ, ɛrik abakal abra akpɔl wur ɛsi, ajil na ɔlim ɛlɛl ɔforanfo bribri

²³ abɔ ɛku ɛjɛ ayɛnam. abɔ afɛngɛ njim aba tɔg wur arɛ abɔ agba yɛn amir ya bateb ɔteb ba atɔgɔ abɔ arɛ wɛ are na likpen.

²⁴ Ɛrik anɛ na ɛbɔngɛ ɛjira ajil na ɔlim, naji arirɔ ngɔ ayɛn jangjang mɔng abakal bafɔ abongɔ, abɔ wɛ ayɛnam.”

²⁵ Jisɔs abong atɔg abɔ arɛ. “Fa ba lidabɛ li na ɛdɛg tamɛ nsɔl yi nyɛna amir abongɔ!

²⁶ Wun ɔnyim arɛ Krayis ayɛn ɔrem na nsɔl yifa nig ayɛl na liloba ɛlɛ?”

²⁷ Bɔm na anwɛr ya Mosis ayɛlɔ na bayɛn amir kpakpa, aribi atɔg abɔ ji abongɔ na alom Ɔsɔwɔ abangɛ ɛlɛ.

²⁸ Naji ajɛnɔ alagɛ ɛkpa ɛgbɛ ji abɔ ajɔlɔ ji, Jisɔs alem mɔng ala kpɛ sɔra asi.

²⁹ Abɔ agɔrɛ wɛ na ɛkora biji arɛ, “Jɔl na nira ɔfo ɛlag mal alagtu ayɔbak.” Fɔ yɔ atumɔ ayɛl na ɛtɛk aji jɔl na abɔ.

³⁰ Naji Ajɔlɔ na ɛkpokoro arɛ ali nsɔl na abɔ, atab brɛd, akag Ɔsɔwɔ sam, akem atab akarɛ abɔ.

³¹ Fɔ tutu amir abɔ aribi, abɔ arenge wɛ, nig atarɛ na nbri abɔ.

³² Abɔ abib atɛm, “Ntem ɛyira na ɔnwɔlɛ ɛroram na ɛyɛbalitem naji ajɔl bong na nira afɛngɛ aribi alom Ɔsɔwɔ atɔga wur na mba ɛ?”

³³ Abɔ atum ayema afɛngɛ njim na Jɛrusɛlɛm. Aji yɛn batɔnanjim abɛ woba wurang alɔ gba mfom yirang na anɛ bangɔ.

³⁴ Batɔnanjim abɛ na anɛ bangɔ abong arɛ, “Ɛtete ji Tata agba nyimi aji ateb ɛlɛ naji Sayimɔn Pita.”

³⁵ Abɔ anɛ abal atɔg abɔ ji ɛlemɔ na mba, mɔng abɔ alɔ renge Jisɔs ngara yi akemɔ brɛd.

Jisɔs ajil ateb ɛlɛ na ji batɔnanjim abɛ

³⁶ Naji anɛ bafɔ ajɔl tɔg abɔ ji ɛlemɔ, Jisɔs nfɔnɛ abal ayema na ɛbɔngɛ abɔ abong atɔg abɔ arɛ, “Likɔna ɛjɔl na nina.”

³⁷ Ɛkokob ɛbɔb abɔ, ajɔ kɛrɛ arɛ agba yɛn ɛtugi nkuanɛ.

³⁸ Abong atɔg abɔ arɛ, “Bɛjom ji wun ɔbɛga, bɛjom ji ɛkerɔ nfab alɔ wun ror na ntem?

³⁹ Bri abɔ ama na ata ama. Mɛ nfɔnɛ yɔ! lagam wɔ ɔyɛn; ɛtugi anim jɔga abɛla biji na akub mɔng wun ɔlam yɛn nkpenɔ.”

⁴⁰ Naji alɔ bong fɛb ateb abɔ, abɔ ayɛ na ata.

⁴¹ Abɔ ategam atamɛ, ateb abɛl ɛyɛbalitem na akpɔga ɛsi. Jisɔs abib abɔ arɛ, “Wun ɔkpekpe ɛjom ji wun ɔla li ɛ?”

⁴² Abɔ akarɛ ɛja nkɔbɛ ji alɔ lam,

⁴³ Atabɛ ali na nbri abɔ.

⁴⁴ Abong atɔg abɔ arɛ, “Fa ɛjom ji mɛ ntɔgɔ wun naji nkpenɔ re na nina. Nsɔl kpakpa yi ayɛlɔ abangɛ mam na ajing ya Mosis ba Yɛna Amir na Bisɛ Ntiga ɛla jɔl ɛtete.”

⁴⁵ Fɔ yɔ aribɔ ntem abɔ naji alom Ɔsɔwɔ ala sar abɔ.

⁴⁶ Abong atɔg abɔ arɛ, “Fa ɛjom ji ayɛlɔ na Nwɛr a Ɔsɔwɔ: Krayis ala yɛn ɔrɛm ala nyimi na liku na mfo ɛra,

⁴⁷ na mbeng ɛma, ɔteb abangɛ ɛgbɔga ndɔn na ɔtum ɔkarɛ na abeɔfɛm ala bong na ɛyeng kpakpa bɔm na Jɛrusɛlɛm.

⁴⁸ Wun ɔre ntiansɛ na nsɔl yi fɔ.

⁴⁹ Mɛ na tom ɛjom ji nsɔjama abongɔ nɔ ntu wun. Bajɔl na ɛjiba Jɛrusɛlɛm tɛtɛ ɛkɔ ji ɛgalɔ yura ɛbudi ɛbole wun.”

Atab Jisɔs ajɛn na libonta

⁵⁰ Jisɔs atul batɔnanjim abɛ ajog na ɛjiba Jɛrusɛlɛm arir Bɛtani, fɔyɔ atabɔ abɔ ayɛ akarɛ abɔ lifola.

⁵¹ Naji ajɔl fola abɔ, atum abɔ asa atabɛ atum na libonta.

⁵² Abɔ ajege wɛ afɛngɛ njim na Jɛrusɛlɛm, na ntakpa ɛyɛbalitem.

⁵³ Abɔ ajɔl na Njo ɔsɔwɔ ngara kpakpa akaga Ɔsɔwɔ sam.