Nwɛr a Luk 23 - Abanyom LP New Testament Portions

Jisɔs ayema na libri Payilet

¹ Batoramfam atum ayema atab Jisɔs aji naji Payilet.

² Akuma wɛ nlagɛ arɛ: “Wur ɛbɔb nɛnom ɔfa naji atoba anɛ abe a nlɛ, atɔga abɔ arɛ adɛkpɛ kpe ataksi akarɛ Sisa afɛnga ayɔra nyɔ arɛ wɛ yɔ arenɔ Krayis ntol.”

³ Payilet abib Jisɔs arɛ, “Wɔ yɔ ɔrenɔ ntol a Ju ɛ?” Jisɔs afanga arɛ, “Wɔ yɔ ɔbongɔ anɔ.”

⁴ Fɔyɔ Payilet abong atɔg atol a balemanjɔm na ɛbɔngɛ anɛ arɛ, “Mɛ nkayɛnam ɛjom ji alɔ lem ji mɛ nɛ lam.”

⁵ Abɔ atɛn arɛ, “Nteba ɛyɛ abaga na ɛfegayɔ na Judiya kpakpa. Abɔm na Galili batig agba rir fa.”

Jisɔs na libri Hɛrɔd

⁶ Naji Payilet ayogɔnɔ abib arɛ, “Nɛnom ɔfa ajog Galili ɛ?”

⁷ Naji akunɔ arɛ Jisɔs ajog nkɛr yi Hɛrɔd arenɔ ntol, atomɛ atu Hɛrɔd, yɔ ajɔlɔ na Jɛrusɛlɛm na ngara yifɔ.

⁸ Naji Hɛrɔd ayɛnɔ Jisɔs, abɛl ntakpa ɛyɛba litem ateba arɛ na ndaba mba ajɔl sɛb arɛ ayɛnɛ. Ateb nsɔl yi alɔ yog abangɛ wɛ, ajɔl kɛrɛ arɛ ayɛn Jisɔs alema akpɔga ɛsi.

⁹ Hɛrɔd abib Jisɔs agbem abiba, Jisɔs ategam afanga.

¹⁰ Atol a balemanjɔm na bateba ajing ya Mosis ayema fɔ, ajɔ kem akem alagɛ wɛ nkorenkore.

¹¹ Hɛrɔd na ɔsɔja ɛbɛ akuma Jisɔs nsiba, akili wɛ amin. Ayɔbɛ wɛ ɛteng ndaba ɛwuri, atore atomɛ atu Payilet.

¹² Na ɔfo bi fɔ Hɛrɔd na Payilet atore ajɔl ɔtɛm, ateb arɛ abɔ ajɔl na ɔjing.

Abong arɛ akom Jisɔs na krɔs

¹³ Payilet akog atol a balemanjɔm, batoramfam na anɛ atu mfom yirang,

¹⁴ abong atɔg abɔ arɛ, “Wun ɔkɔl nɛnom ɔfa ɔbakam arɛ wɛ nsɛba afɛm. Batig mɛ ngbalɛ lam na libri ɛlina nkayɛnam ɛbe ɛjom ɔbangɛ akem ya wun ɔlɔ kem ɔlagɛ wɛ.

¹⁵ Ɛjɔl Hɛrɔd, ayɛnam ɛbe ɛjom na biji ɛbɛ yiyi alɔ wɛ tom atu wur. Mɔng wun ɔlɔ yɛn nɛnom ɔfa aka lemam ɛbe ɛjom ji ɛkerɔ ala kpɔ.

¹⁶ Fɔ yɔ ɛla ker mɛ nkarɛ ɛkɔ adu wɛ ada wɛ abɔ asɔng.”

¹⁷ Na likag li aseng asa Payilet ajɔga ayege nɛnom wurang na ngbakɔbɔ adabɔ akarɛ abɔ.

¹⁸ Ɛbɔngɛ anɛ akuma nkɔna gbogbo abonga, “Yolɛ! wɔ yege Barabas ɔkarɛ wur!”

¹⁹ Barabas arɔr wɛ akak na ngbakɔbɔ ateb asɛb akpadɛ na ɛjiba afɛng ayol anɛ.

²⁰ Payilet ajɔl sɛb arɛ ada Jisɔs abɔ akpɛ bong atɔg abɔ.

²¹ Abɔ atore ajɔ kpɛ kɔn, “Komɛ na krɔs! Komɛ na krɔs!”

²² Payilet abong atɔg abɔ na nkpɛlɛ ɛra, “Ba ɛbe ɛjom ji wɛ alɔ lem? Nkayɛnam ɛjom ji wɛ alɔ lem ji ɛlaker wɛ akpɔ! Mɛ nɛ du nɔngɛ wɛ asɔng.”

²³ Abɔ fɛb atore ajɔ kɔn na nyura lilom arɛ akom Jisɔs, na nkukura akɔn akɔn abɔ ɛlem ɛkarɛ abɔ.

²⁴ Fɔyɔ Payilet atamɔ ji abɔ ajɔl bib.

²⁵ Ayege nɛnom yɔ arɔrɔ wɛ akag na ngbakɔbɔ ateb asɛb akpadɛ na ɛjiba afɛng ayol anɛ, nɛ yɔ abɔ ajɔl bib. Adal Jisɔs abɔ akarɛ abɔ, arɛ aji lem ji ɛkɔrɔ abɔ.

Akom Jisɔs na krɔs

²⁶ Naji ɔsɔja ɛtabɔ wɛ ɛjɛn, abɔb Sayimɔn yɔ Syrɛn yɔ ajogɔ aba nyɛla na ɛjiba, atab krɔs asi wɛ alemɛ asima, atɔna Jisɔs na njim.

²⁷ Ntakpa ɛbɔngɛ anɛ ajɔl wɛ tɔna, na abakal ba ajɔl wɛ lul ateba ndɔn.

²⁸ Jisɔs anwek abri abɔ abong arɛ, “Abakal ba Jɛrusɛlɛm, wun ɔdɛ mam kpɛ rer, ba rer ɛlina na abɔn abina.

²⁹ Ngara ayɔbak yi wun ɔla bong arɛ, ‘Lifola ɛjɔl na ngom, ala ya adɛdɛ gbɛl na abɛl ya adɛdɛ yab!’

³⁰ Anɛ ala bong atɔg ɛwɔng, ‘Gbɔ bole wur!’ Atɔg ɛkporogon, ‘Bole wur.’

³¹ Anɛ alɔ lem nsɔl yi fa naji akpaba nte akpenɔ re mbernber ɛla jɔl nan naji nkon ɛlɔ yom?”

³² Abalom abal bangɔ ajɔl awaju, atɔb atab abɔ arɛ aji ayol na Jisɔs.

³³ Naji arirɔ na mfom yi ajɔl kog arɛ ɛkpaga ɛsi nɛ, fɔyɔ akomɔ Jisɔs na awaju yafɔ na krɔs, nɛ yɔngɔ na ɔbɔ bilom, yɔngɔ na ɔbɔ bikal.

³⁴ Jisɔs abong arɛ, “Nsɔjama tum karɛ abɔ anyim ji abɔ alema.” Abanga abɔma ayɛ atob lifanga.

³⁵ Anɛ ayema fɔ abri. Atobɛsi ba Ju ajɔ yɔlɛ abonga arɛ “Anyangɛ anɛ; nɔng anyangɛ ɛlɛ ɛlɔjɔl arɛ wɛ Krayis yɔ, yɔ Ɔsɔwɔ alɔ yege!”

³⁶ Ɔsɔja titi atɔb ajɔ yɔlɛ. abɔ ajɛn aji karɛ aka amum,

³⁷ abong atɔgɛ arɛ, “Nyangɛ ɛla ɛlɔjɔ arɛ wɔ ntol a Ju.”

³⁸ Ayɛlɛ arɛ, “FA NTOL A JU.” alagɛ na ɛsi ɛjɛ

³⁹ Nwaju yirang yɔ atɔb akomɛ na krɔs akuma wɛ ntoga: “Ndɛ wɔ arɛ wɔ Krayis yɔ? Nyangɛ ɛla wɔ ɔtɔb ɔnyangɛ wur!”

⁴⁰ Nwaju yingɔ atobɛ ɛgan, abong arɛ, “Wɔ ɔnim bɛga Ɔsɔwɔ ɛ? Wur ɛyɛna ɛriga jangjang?

⁴¹ Ɛfofoma arɛ wur ɛkpɔ na abeɔfɛm ayira ateb arɛ wur ɛlelem. Wɛ jisɔk alemam.”

⁴² Abong atɔg Jisɔs arɛ, “Gbɔ mam nter wɔ ɔlɔ ba na ɛjiba ɔtol ɛba!”

⁴³ Jisɔs afanga wɛ arɛ, “Mɛ ntɔga wa ɛtete ndɛ ɛlɛl wɔ ɔla jɔl nanama na paradayis.”

Liku li Jisɔs

⁴⁴ Ɛjɔl mɔng nkaranka woba ɛbal yi ɛfente, ɛjingi ɛbole nde tɛtɛ ɛrir nkaranka ɛra yi ligoligo,

⁴⁵ Njol ajɔlam kpɛ ya, Mbɔma bi njo Ɔsɔwɔ ɛyar ɛja bibal.

⁴⁶ Jisɔs akog na nyura lilom arɛ, “Nsɔjama, na abɔ aya ntab ɛtugi ɛjama nkara!” Naji alɔ bong anɔ akur yɔ nkukura liyɔ arida.

⁴⁷ Ntakpa nɛ nsɔja yɔ ayɛnɔ ji ɛlemɔ, ajege Ɔsɔwɔ, abong arɛ, “Ɛtete ji arɛ nɛnom ɔfa ajɔl ɛteng nɛ!”

⁴⁸ Naji anɛ kpakpa ba agbalɔ fɔ ayɛna, ayɛn akpɔga ɛsi ya alɔ lem awula abɔ afɛngɛ njim akuri ndɔn ndɔn.

⁴⁹ Anɛ kpakpa ba anyinɔ Jisɔs kpɛlɛ na abakal ba atɔnɔ wɛ na Galili ayema dagdagɛ abri ji ɛlɔ lem.

Akak Jisɔs

⁵⁰ Ɛbɛl nɛnom wurang yɔ ajɔl wɛ kog arɛ Josɛf yɔ ayɔma lirɔng batoramfam, ajɔl ɛteng nɛ afɛnga alema nsɔl ɛyɛ ntɔrantɔra.

⁵¹ Wɛ ategam atamɛ atu ɔtɔga na nema yi abɔ ajɔl lem. Ajog na ɛjiba Judiya ji Arimatiya wɛ nfɔnɛ ajɔl seg Ɔtol Ɔsɔwɔ.

⁵² Ajil naji Payilet aji bib ɛku Jisɔs.

⁵³ Atabɛ abudi na nde, akɔ mbara mbɔma afuwɛ, atabɛ akag na ɔlim bi arimɔ na atal, bi adɛdɛ kag nɛ awiawi.

⁵⁴ Ɛjɔl ɔfo bi anɛ ajɔl tore biji naji ɔfo bi Ɛrɛdɛkɛr ɛlagɔ bɔm.

⁵⁵ Abakal ba ajogɔ Galili na Jisɔs atɔna Jɔsɛf aji yɛn ɔlim na ngara yi abomɔ ɛku Jisɔs.

⁵⁶ Abɔ afɛngɛ njim akuri aji tore nsɔl yi ɛkpenɔ ɛteng ɛlu na aku ya biji. Na ɔfo ɛrɛdɛkɛr abɔ arɛdɛkɛr mɔng ajing abongɔ.