Nwɛr a Luk 22 - Abanyom LP New Testament Portions

Judas atamɛ agore Jisɔs

¹ Naji likag li brɛd bi ɛdɛlɔ bɛl yeast, li ajɔl kog arɛ Aseng Asa ɛlɔ kped.

² Atol a balemanjɔm na ba teba ajing ya Mosis ajɔl sɛb mba yi ala yol Jisɔs, amalam ayolɛ ateb ajɔl bɛ amir anɛ.

³ Fɔyɔ nim ayɛlɔ na litem li Judas yɔ ajɔl wɛ kog arɛ Isikariyɔt nɛ wurang na batɔnanjim abɛ woba na abal.

⁴ Judas ajil aji ntol a balemanjɔm na atobɛsi ɛsi ba ababɛ Njo Ɔsɔwɔ aji bong na abɔ ngara mɔng wɛ ala gore abɔ Jisɔs.

⁵ Abɔ abɛl ɛyɛba litem afɛngɛ atamɛ arɛ ala wɛ karɛ akpuga.

⁶ Judas atamɛ ajɔ fɛngɛ asɛb mba yi ala tab Jisɔs akarɛ abɔ na ngara yi anɛ adɛlɔ jɔl.

Jisɔs Akru li Nsɔl na Batɔnanjim abɛ

⁷ Naji Likag li, ɛliga Brɛd bi ɛdɛlɔ bɛl Yeast ɛrirɔ, na likag lifɔ ajɔga ayola njɔra yi Aseng Asa

⁸ Jisɔs atom Pita na Jɔn, abong atɔg abɔ arɛ, “Ba sɔng wun ɔji tore nsɔl lili yi aseng asa wur ɛli.”

⁹ Abɔ abibɛ, “Wɔ ɔsɛba arɛ wur ɛji lam nsɔl lili yiyi ngan?”

¹⁰ Wɛ afanga arɛ. “Ɔla gɔ yɛl na ɛjiba nɛnom wurang yɔ asima ndɛl alib ala wun kɔn. Tɔna wɛ sɔng na ɛtɛk ji ala yɛl,

¹¹ ɔbong ɔtɔg nfɔn ɛtɛk, ‘Nteteba arɛ wur ɛbiba, njo ajɛn anɛ arengan yi amal li likag li ɛlɔ seng na batɔnanjim abɛ?’

¹² Ala wun teb ntakpa njo na libo, yi alɔ tore, ba tore mfom yifɔ.”

¹³ Abɔ atum ajɛng aji yɛn nsɔl ngara yi mɔng Jisɔs atɔgɔ abɔ. Aji tore likag li alɔ Seng Asa.

¹⁴ Naji ngara arirɔ Jisɔs na arɔb ayɛ ajɔl na ɛkpokoro.

¹⁵ Abong atɔg abɔ arɛ, “Mɛ njɔl nsɛb ndɛ mɛ ni likag li ɛlɔ seng na nina nig mɛ nyɛn ɛriga.

¹⁶ Mɛ ntɔga wun, Mɛ nim kpɛ teg ni ndɛg nkanter ɛyɛ ali bɛl ribi na Ɔtol Ɔsɔwɔ.”

¹⁷ Fɔyɔ atabɔ mig akag Ɔsɔwɔ sam abong arɛ, “Bakɔ wun ɔbak ɔkarɛ ɛlina.

¹⁸ Mɛ ntɔga wun mɛ nim kpɛ teg nwɔ amum ya akaba nte tɛtɛ Ɔtol Ɔsɔwɔ ɛba.”

¹⁹ Atab brɛd, akag Ɔsɔwɔ sam, abɛg atab akarɛ abɔ abong arɛ, “Fa ngoabiji ɛma yi mɛ nkarɛ wun. Ba lem anɔ wun ɔgbɔ mam nter.”

²⁰ Na mba yifɔ titi, naji nsɔl lili ɛlɔ mal, atab mig abong arɛ, “Mig yifa nfɛ a ɛnwɔngɛ yi along ama, ala fa akarɛ wun.

²¹ Ɔbɔ nɛ yɔ alam gore ajig fa na ɛkpokoro na nama.

²² Mɔn a nɛnom ala kpɔ mɔng Ɔsɔwɔ abongɔ, ligbo ɛla jɔl na nɛ yɔ ala wɛ gore.”

²³ Batɔnanjim abɛ akuma atɛm mbiba ba nɛ yɔna ɛbɔngɛ ɛjira yɔ ala lem ligan ɛjom ji fa.

Nfab abangɛ nɛ yɔ agalɔ jɔg

²⁴ Nfab ajog na ɛbɔngɛ batɔnanjim abɛ abangɛ nɛ yɔ agalɔ jɔg na ɛbɔngɛ abɔ.

²⁵ Jisɔs abong atɔg abɔ, “Atol a anɛ ba ɛyeng jifa alema batɔnanjim abɔ atamɛ atuga abɔ; anɛ ba akpenɔ ɛkɔ aseng anɛ bangɔ, asɛba arɛ ajɔ kog abɔ arɛ atɛm anɛ.

²⁶ Wun ɔtɔb jɔl anɔ, nɔngɛ nɛ yɔ agalɔ jɔg na ɛbɔngɛ ɛjina ajɔl mɔng mɔnsɛ, nɛ yɔ arenɔ ntobɛsi ajɔl mɔng ndɔgalitom.

²⁷ Ba nɛ yɔ agalɔ jɔg nɛ yɔ akonɔ na ɛkpokoro aliga nsɔl afi nɛ yɔ arɔgɛ litom? Nɛ yɔ akonɔ na ɛkpokoro arig ɛ? Mɛ nde na ɛbongɛ ɛjina mɔng ndɔgalitom.

²⁸ Wun ɔjɔl anɛ ba ɔyemɔ na nama na ngara ɛfegayɔ.

²⁹ Mɛ ngba wun karɛ ɛkɔ ndɛ wun ɔlem ɔtol mɔng nsɔjama akarɔ mam.

³⁰ Na ngara yi wun ɔmal ɔli ɔfɛnɡɛ ɔwɔ na ɛkpokoro ɛjama na ɛjiba Ɔtol ɔjɔl na nji ɔtol ɛbama nub woba ɛbal ji Isrɛl.

Jisɔs abong arɛ Pita alɛ tɛn

³¹ “Jisɔs abong atɔg Sayimɔn Pita arɛ, Sayimɔn, Sayimɔn nim agba gɔrɛ Ɔsɔwɔ arɛ akarɛ nsim wɛ afɛb wun mɔng nsang.

³² Mɛ ngba kag ɔrɔ nkara, Samiyɔn, ndɛ ntamɛ ɛya adɛ gbɔ. Naji ɔlɔ fɛngɛ njim ɔba, lem abɔnyɛn aba akore ba atɔna mam.”

³³ Pita afanga arɛ, “Tata, mɛ ngba tore biji ndɛ mɛ ntɔna wa nji na ngbakɔbɔ, nfɛng nkpɔ nana.”

³⁴ Jisɔs afanga arɛ, “Mɛ ntɔga wa, Pita, nig nkɔk akog ɛlɛl, wɔ ɔlam tɛn nkpɛlɛ ɛra arɛ wɔ mam ɔnyim.”

³⁵ Jisɔs abib batɔnanjim abɛ arɛ, “Naji mɛ ntomɔ wun na ngara yifɔ, nsusuga ɛbam na akpagata wun ɔfelam wun ɔkiking ɛjom ɛ?” Abɔ afanga, “ii.”

³⁶ Abong atɔg abɔ, “Batig ɔlɔ bɛl ɛbam tab, ɔlɔ bɛl nsusuga ɛbam tab, ɔdɛgɔ fɛngɛ ɔbɛl ɔkankang, gore ɛlimi ɛja wɔ ɔgona brang.

³⁷ Agba yɛlɛ na Nwɛr Ɔsɔwɔ: ‘Afal wɛ akpɛlɛ na ba lema abeɔfɛm.’ Mɛ ntɔga wun ɛtete ndɛ jifa ɛla ɛteg ɛjɔl anɔ na biji ɛbama, nsɔl yi ayɛlɔ abangɛ mam ɛlag ba njɔla ɛtete.”

³⁸ Batɔnanjim abɛ abong arɛ, “Tata, yɛn, wur ɛkpe ɔkankang abal.” Wɛ afanga arɛ, “Ɛli fang!”

Jisɔs akak ɔrɔ na Ɛwɔng Ɔlif

³⁹ Jisɔs atum aji na ɛwɔng ɔlif ngara mɔng yi ajɔga jiga batɔnanjim abɛ atɔna wɛ.

⁴⁰ Naji arirɔ ngɔ, abong atɔg abɔ arɛ, “Ba kag ɔrɔ naji wun ɔdɛ gbɔ ɔyɛl na ligara.”

⁴¹ Fɔyɔ ajɛnɔ aji na ɔsi sed mɔng nɛ amal arɔ lital ɛrir, aji jumi ndung akak ɔrɔ.

⁴² “Nsɔjama, ɛlɔ kɔra tabɛ mam mig ɛriga yifa; lem mɔng ɛkɔrɔ wa ɛkɔ ɛjama arig nɔng nter ɛya alem.”

⁴³ Nteb ɔteb na libo abudi aba karɛ ɛkɔ.

⁴⁴ Na ntakpa liyama akak ɔrɔ na ɛkora biji; liyobe ɛlɛ ɛjɔl mɔng along ya ajɔl tɔng awuri na nde.

⁴⁵ Naji alɔ tum na ɔrɔ, afɛngɛ njim naji batɔnanjim abɛ, aji yɛn abɔ naji alɔlal, agba kɛr ateb agbɔl awuma.

⁴⁶ Jisɔs abib abɔ arɛ, “Bejom ji wun ɔlala? Ba tum ba yema wun ɔkag ɔrɔ na ngara yi wun ɔdɛ gbɔ ɔyɛl na ligara.”

Abɔb Jisɔs

⁴⁷ Naji Jisɔs akpenɔre abonga ɛbɔngɛ anɛ ɛba na nɛnom yɔ ajɔl wɛ kog arɛ Judas nɛ wurang na anɛ woba abal na ɛbɔngɛ batɔnanjim abɛ. Judas ajɔl teb abɔ mba, ajɛn aba kug Jisɔs nyɔ.

⁴⁸ Jisɔs abibɛ arɛ, “Judas, nyɔ kukug bi ɔlagɔ kɔ ɔgore Mɔn a Nɛnom?”

⁴⁹ Naji batɔnanjim a Jisɔs ayɛnɔ ji ɛlagɔ nɔ lem, abɔ abib, “Tata Ɛyege ɔkankang ɛbra ɛnɔgɛ?”

⁵⁰ Nɛ wurang akem ɔtong ɔbɔ bilom bi njo a ndɔgalitom yɔ ntakpa nemanjɔm.

⁵¹ Jisɔs abong arɛ, “Ɛgba fang!” Alag nɛnom ɔfɔ na ɔtong atore alemɛ anɔb.

⁵² Jisɔs abong atɔg atol a balemanjɔm na atakpa anɛ ba ababɛ Njo Ɔsɔwɔ na abakol, ba abalɔ wɛ mbɔba, “Bɛjom ji wun ɔbaga na ɔkankang na akpɔra nte mɔng ndenɔ nwaju?

⁵³ Kpakpa afo Mɛ njɔl na nina na Njo Ɔsɔwɔ, wun ɔtegam ɔgara arɛ ɔlaga mam abɔ. Fa ngara ɛyinayi yi, naji ɛkɔ ɛjingi ɛlema nsim.”

Pita atɛn Jisɔs

⁵⁴ Abɔb Jisɔs atabɛ aji na ɛtɛk ntakpa nemanjɔm Ɔsɔwɔ, Pita atɔna na ɛkɛbɛ.

⁵⁵ Naji akɔrɛ ngon na lika ɛtɛk, Pita atɔb aji jɔl na anɛ ba ajɔlɔ atob ngon asibi.

⁵⁶ Naji ndɔgalitom a nɛnkal ayɛnɔ wɛ ajigɔ na nkɛ a ngon, abri wɛ ɛnɔbnɔbɛ abong arɛ, “Nɛnom ɔfa ajɔl na nɛ!”

⁵⁷ Pita atɛn abong arɛ, “Nɛnkal, mɛ wɛ nyim!”

⁵⁸ Naji ɛlɔ lɛna sed nɛ yɔndɛga akpɛ wɛ yɛn abong arɛ, “Wɔ titi nɛ ɔwɛ yɔ!” Pita afanga arɛ, “Nɛnom mɛ arig!”

⁵⁹ Naji ɛlɔ rir ngbɛga yirang, nɛnom yɔndɛga akpɛ bong arɛ, “Na ɛtete nɛnom ɔfa ajɔl na nɛ, ateb wɛ nɛ a Galili yɔ.”

⁶⁰ Pita afanga arɛ, “Nɛnom, mɛ nyim ji wɔ ɔbonga ɔbangɛ!” Naji akpenɔre abonga nkɔk akog.

⁶¹ Tata Jisɔs anwek abri Pita jangjang. Fɔ tutu Pita agbɔ nter ji Tata abongɔ atɔgɛ, “Nig nkɔk akog ɛlɛl wɔ ɔlam tɛn nkpɛlɛ ɛra”

⁶² Pita ajog na ɛtagla aji lul nkorenkore.

Ayɔl Jisɔs afɛngɛ adu wɛ

⁶³ Abalom ba ajɔl babɛ Jisɔs ajɔl wɛ du afɛngɛ ayɔla wɛ.

⁶⁴ Abɔ abole wɛ amir abibɛ arɛ, “Gaba! Ba nɛ yɔ aromɔ wa?”

⁶⁵ Abɔ atol wɛ ɛgbem ɛgbem.

Jisɔs ayema na libri Batoramfam

⁶⁶ Naji ɔforanfo ɛlɔ kparɛ abakol na atol a balemanjɔm na ba teba ajing ya Mosis akɔn mfom yirang. Akɔ Jisɔs aba na libri batoramfam.

⁶⁷ Abɔ abong arɛ, “Ɛlɔ jɔl arɛ wɔyɔ ɔrenɔ Krayis, tɔg wur.” Jisɔs afanga arɛ, “Mɛ nɔ tɔg wun, wun ɔnim tamɛ ɔtu mam.

⁶⁸ Mɛ nɔ bib wun mbiba wun ɔnim ma fanga.

⁶⁹ Bɔm batig sɔng, Mɔn a Nɛnom ala jɔl na ɔbɔ bilom bi Ɔsɔwɔ bi ɛgalɔ yura.”

⁷⁰ Abɔ fɛb abong arɛ, “Fɔ yɔ Ɛjogɔ arɛ wɔ yɔ ɔrenɔ Mɔn Ɔsɔwɔ?” Wɛ afanga arɛ, “Wun ba ɔlɔ bong anɔ.”

⁷¹ Abɔ abong arɛ, “Jɛnji ɛkpɛ sɛb ntiansɛ yindɛga! Wur ɛgba yog na nyɔ ɛbɛ!”