Nwɛr a Luk 20 - Abanyom LP New Testament Portions

Anɛ abib abangɛ ɛkɔ ji Jisɔs

¹ Ɔfo brang naji Jisɔs ajɔl teb na Njo Ɔsɔwɔ afɛngɛ ajɔ bong ɛteng ɔteb, atol a balemanjɔm na ba teba ajing a Mosis, kpɛlɛ na abakol abal ba ajɔlɔ na lirɔng.

² “Tɔg wur, Ba ɛkɔ ji wɔ ɔkɔga ɔlema nsɔl yi fa? Ba nɛ yɔ akarɔ wa ɛkɔ ji fɔ?”

³ Jisɔs afanga, “Mɛ nag tɔb mbib wun mbiba. Batɔgam,

⁴ ɛwura alib ji Jɔn ɛjog na libo, afi ɛru na ji nɛ?”

⁵ Akuma mbonga na atɛm, “Ɛlɔ bong arɛ, ‘Ɛjog na libo,’ ala wur, ‘Bib arɛ bɛjom ji ɛkerɔ wur ɛdɛnɔ tamɛ ɛtu Jɔn?’

⁶ Ɛlɔ fɛngɛ ɛbong arɛ, ‘Ɛru naji anɛ,’ anɛ bafa ala wur tobe atal, ateb abɔ anyinyi arɛ Jɔn nyɛna amir yɔ.”

⁷ Fɔyɔ abɔ alagɔ fanga arɛ, “Wur ɛnyim mfom yi ɛjogɔ ɛba.”

⁸ Jisɔs abong atɔg abɔ arɛ, “Mɛ wun nim ma tɔg ɛkɔ ji mɛ nkɔga nema nsɔl yi fa.”

Ligan li nɛ yɔ ayɛgɔ ɛgbɛ ɛjɛ

⁹ Jisɔs atob anɛ ligan lifa: “Nɛnom wurang abim ɛgbɛ akabante atab ayɛgɛ ba mbima bigbɛ atum na ɛjiba ji ndɛga aji kar mba arab.

¹⁰ Ngara mfuga atom ndɔga litom ɔwɛ arɛ aji kɔ mbanga ɛyɛ naji mbima ɛgbɛ. Ba mbima bigbɛ bafɔ adu ndɔgalitom yɔfɔ akamɛ akuri abɔ abɔ.

¹¹ Akpɛ tom ndɔgalitom yɔndɛga, akpɛ wɛ du akagɛ na ndɔn akamɛ akuri abɔ abɔ.

¹² Akpɛ tom ndɔgalitom yɔngɔ na anɛ ara atere bilɛm atabɛ arɔ na ɛtegla.

¹³ “Nfɔnɛ ɛgbɛ abong arɛ, ‘Mɛ na lem nan? Na tom nkɔrakɔr a mɔn ɔma; Ateg akponi wɛ.’

¹⁴ “Naji alɔ wɛ yɛn, akuma mbonga atɔga atɛm, ‘Fa niga liku ɔwɛ nɔng wur ɛyolɛ ɛli liku ɛlɛ.’

¹⁵ Fɔyɔ ayege wɛ na ɛgbɛ arɔ na ɛtegla ayolɛ. “Wun ɔkɛrɛ arɛ nfɔnɛ ɛgbɛ ala lem anɛ ba fɔ nan? Jisɔs abib.

¹⁶ Ala ba aba yol anɛ ba fɔ atab ɛgbɛ ji fɔ akarɛ anɛ bandɛga.” Naji anɛ ayogɔ ligan lifa, abɔ abong arɛ, “Ɛnim teg ɛjɔla anɔ!”

¹⁷ Jisɔs abri abɔ nig abib, “Nsɔl yi fa yi ayɛlɔ na nwɛr Ɔsɔwɔ ɛjog nan: “Lital li nsigɛ ɛtɛk atɛnɔ lili ɛlɔ ɛjɔl lital li nub ɛtɛk.

¹⁸ “Nɛ awiawi yɔ agbɔlɔ na lital lifɔ ala gbɔ akibi akpede, nɛ awiawi yɔ lital lifɔ ɛla gbɔ ɛnyɛdɛ wɛ lital lifɔ ɛla jɔjɔdɛ.”

Ɛkpega taksi ɔkarɛ Sisa

¹⁹ Bateba ajing na atol a balemanjɔm ajɔl sɛb mba yi ala bɔb Jisɔs fɔtutu, ateb arɛ abɔ anyinyi arɛ Jisɔs atob ligan lifa alagɛ abɔ, ateb abɔ ajɔl bɛ anɛ bafɔ.

²⁰ Ajɔl wɛ babɛ ɛnɔbnɔbɛ, atom anɛ arɛ ajɔ bri wɛ alema mɔng abɔ ateng anɛ ba, asɛba mba arɛ afele wɛ na ɛjom jirang ji ala bong nig ada wɛ abɔ akarɛ ntobɛsi a Rom.

²¹ Anɛ ba ajɔl wɛ babɛ abong atɔgɛ arɛ, “Nteteba, wur ɛnyinyi arɛ wɔ ɔteba ɔfɛngɛ ɔbonga ji ɛrenɔ na nsɛrɛ, wɔ ɔnim jɔga ɔteba ɛkomanjim, ɔjɔga ɔteba mba yi Ɔsɔwɔ yi arenɔ ɛtete.

²² Ɛnɔnɔb arɛ wur ɛkpe taksi ɛkarɛ Sisa afi ɛdɛ kpe?”

²³ Jisɔs ayɛn ɔwak abɔ abong atɔg abɔ,

²⁴ “Tebam akpuga yaya. Libri na mbeng a banɛ yi arenɔ na akpuga yafa?” Abɔ afanga, “Sisa.”

²⁵ Abong atɔg abɔ, “Ba karɛ Sisa ji ɛreanɔ ji Sisa, wun ɔkarɛ Ɔsɔwɔ ji ɛreanɔ ji Ɔsɔwɔ.”

²⁶ Wɛ amalam akpɛ bɔb ateb alom ya abongɔ na ɛwerang, nfanga ɛyɛ akpɔl abɔ ɛsi abole anyɔ.

Ɛnyimi na liku na libal

²⁷ Asi anɛ ba Sadusi, ba adɛgɔ jɔ atamɛ na ɛnyimi na liku, abal na ji Jisɔs na mbiba.

²⁸ Abɔ abong arɛ “Nteteba” Mosis ayɛlɛ arɛ nɛnom alɔ kpɔ atum nkal ɔwɛ asa adɛ gbɛl mɔng mɔnyɛn ɔwɛ ala wɛ kɔ, agbɛl abɔn akarɛ mɔnyɛn yɔ alɔ kpɔ.

²⁹ Batig abɛl abɔnyɛn arima. Ngbɔgamba akɔl nɛnkal akpɔ, mɔn agbɛlam.

³⁰ Ɛtɔna akɔ nkal a mɔnyɛn, akpɔ mɔn agbɛlam.

³¹ Na anɛ ara akpɛ wɛ kɔ, titi anɛ arima fɛb akpɔ abɔn agbɛlam.

³² Na nkukura nɛnkal yɔfɔ atɔb akpɔ.

³³ Na ɔfo bi ɛnyimi na liku ala jɔl nkala banɛ? Naji abɔ anɛ arima fɛb akɔl wɛ.

³⁴ Jisɔs afanga, “Anɛ ba ɛyeng ji fa akɔga mbal.

³⁵ Na ɛyeng ji ɛbaga anɛ ba mbara ba ala nyimi na liku anim kpɛ kɔ mbal.

³⁶ Abɔ anim teg akpɔ, ala jɔl mɔng barɔgantom Ɔsɔwɔ. abɔ ba arenɔ abɔn Ɔsɔwɔ, abɔ arenɔ abɔn ba ɛnyimi na liku.

³⁷ Mosis ateb arɛ anɛ ba alɔ kpɔ ala nyimi na liku. Na alom Ɔsɔwɔ abangɛ ɛkɛbɛ ji ɛkolgbɛ ɛjɔlɔ lol, akog Tata, ‘Ɔsɔwɔ Ɛbram, Ɔsɔwɔ Asik, na Ɔsɔwɔ bi Jɛkɔb.’

³⁸ Are Ɔsɔwɔ bi anɛ ba arenɔ mber, aream Ɔsɔwɔ bi anɛ ba alɔ kpɔ, na libri Ɔsɔwɔ anɛ kpakpa are na likpen.”

³⁹ Asi anɛ ba ateba ajing afanga, “Nteteba, ɔgba fanga na nsɛrɛ!”

⁴⁰ Nɛ san yɔ akpɛlɔ sib abibɛ mbiba.

Mɔn a banɛ yɔ arenɔ Krayis?

⁴¹ Jisɔs abong atɔg abɔ, “Nan yɔ ɛkerɔ abong arɛ Krayis mɔn a Defid yɔ?

⁴² Na Nwɛra Bisɛ, Defid nfɔnɛ abobong arɛ: “Tata Ɔsɔwɔ abong atɔg Tata ɛjama arɛ, ‘Jɔl na ɔbɔ bilom ɛbama

⁴³ tɛtɛ mɛ na lem anɛ ba ɔjing aba agbɔ wa na ata.’

⁴⁴ “Defid alɔ kog Krayis arɛ ‘Tata,’ ɛla lem nan, wɛ ajɔl mɔn ɔwɛ?”

⁴⁵ Naji Ɛbɔngɛ anɛ ɛjɔl yonge atong abong atɔg batɔnanjim abɛ arɛ.

⁴⁶ “Ba kone ɛkpo na ba teba ajing. Ba asɛba arɛ ajɔ jɛn atoba asibi na araba buwuri. Asɛba arɛ ajɔ kag abɔ nyɔ na ɔkponi na mfom arɛ, titi asɛba arɛ ajɔl na mfom yi ɔkponi na ɛkpasega na mfom likag.

⁴⁷ Abɔ abri abakal ba alom abɔ alɔ kpɔ na ɛdanga amir atabɛ abɔ bitɛk, ateba liabɔ mɔng ateng anɛ akaga araba ɔrɔ. Ligan anɛ bafa ala yɛn nkore ɔrɛm.”