Nwɛr a Luk 2 - Abanyom LP New Testament Portions

Ɔgbɛl bi Jisɔs

¹ Na ngara yi fɔ ntakpa ntol a Rom Ɔgɔstus akarɛ ɛjigi arɛ afal anɛ na bijiba Rom.

² Fɔ yɔ ajɔlɔ ngbɔgamba ɛfala anɛ bɔm na ji Kwiriniyus ajɔlɔ ntol a Siriya.

³ Anɛ kpakpa atum aji na bijiba abɔ arɛ aji kag abeng.

⁴ Fɔ yɔ Josɛf atumɔ lijɛn na Nasarɛt ji Galili, arir Bɛtlɛm ji Judiya, ɛjiba ntola Defid, ateb arɛ wɛ Josɛf aru ɔgu bifɔ bi Defid.

⁵ Ajil fɔ na Mɛri, arɛ aji kag mbeng yɔ wɛ akɔlɔ mɔng nkal, Meri ɔla ɛgba kol ɛrir na ngbɛla.

⁶ Aji abɔ ajɔlɔ fɔ, ngara ɔgbɛl arir.

⁷ Mɛri agbɛl mgbɔga mba mɔn yɔ ɔlom. Akɔ abɔma afu wɛ atabɛ akak na ɛkpagnte ɛliga nsɔl ɔjɔra, ateb ɛyaga ɛjɔlam na ɛtɛk ajɛna nɛ.

Ba babɛ ɔjɔra na ba teb ɔteb Ɔsɔwɔ

⁸ Alagtu afɔ, ba babɛ ɔjɔra ajɔl na ɛmɛ alagɛ Bɛtlɛm ababɛ ɔjɔra abɔ.

⁹ Nteb ɔteb a Tata ajil ajog naji abɔ, liloba li Tata ɛbole abɔ, ɛkokob ɛbɔb abɔ.

¹⁰ Nteb ɔteb Ɔsɔwɔ abong atɔg abɔ, “Wun ɔtɔb kpɛ bɛ! Mbal na ɛteng ɔteb nkarɛ bi ɛla karɛ anɛ kpakpa ntakpa ɛyɛbalitem.

¹¹ Ɛlɛl na ɛjiba Defid aligbɛl nyanyangɛ akarɛ wun, wɛ yɔ arɛ nɔ Krayis Tata.

¹² Wun ɔla yɛn ndenge yi fa: Ɔla yɛn mɔn na ji alɔ wɛ fu abɔma abomɛ na ɛkpagnte ji ɔjɔra ɛliga nsɔl.”

¹³ Fɔ tutu ɛbɔngɛ ba tebe ɔteb Ɔsɔwɔ, abal akpa na nteb ɔteb yɔnga ajege Ɔsɔwɔ abonga,

¹⁴ “Lijega ɛjɔl na Ɔsɔwɔ na libonta, likɔna ɛjɔl na anɛ ba nde ba linɔba ɛlɛ ɛrenɔ ɛkarɛ abɔ.”

¹⁵ Na ji bateb ɔteb Ɔsɔwɔ alɔ tum abɔ asa afɛngɛ njim ajɛn na libonta, ba babe ɔjɔra akuma mbonga atɔga atɛm, “Ɛjɛn na Bɛtlɛm ɛji yɛn nsɔl yi ɛlɔ lem ji Tata alɔ wur tɔg.”

¹⁶ Abɔ asubi ajɛn aji yɛn Josɛf na Meri na mɔn, anɔngɔ na ɛkpagnte ji ɔjɔra ɛliga nsɔl.

¹⁷ Na ji ba babɛ ɔjɔra alɔ wɛ yɛn, atɔg abɔ ji nteb ɔteb Ɔsɔwɔ atɔgɔ abɔ abangɛ mɔn.

¹⁸ kpakpa anɛ ba ayogɔ ɔtɔga bifa bi ba babe ɔjɔra ɛkpɔl abɔ ɛsi.

¹⁹ Meri akak ɔtɔga bifɔ na litem afɛngɛ abɛl nkanter abangɛ.

²⁰ Ba babɛ ɔjɔra afɛngɛ akuri, ajege, atiga Ɔsɔwɔ ateb ji abɔ ayogɔ afɛngɛ ayɛn na amir. Kpakpa nsɔl ɛjɔla anɔ mɔng ba tebe ɔteb Ɔsɔwɔ abongɔ.

Ateb Jisɔs na Njo Ɔsɔwɔ

²¹ Na mfo ɛnigni, alem wɛ ɔjangkon, agore wɛ mbeng a Jisɔs yi nteb ɔteb Ɔsɔwɔ akarɔ wɛ nig ayibi ɔla ɛbɛ.

²² Na ji ngara alɔ lome yi Josɛf na Meri alagɔnɔ lem ligbɛna li aroga li abɔ mɔng ajing a Mosis abongɔ, abɔ atab Jisɔs aji na Jɛrusɛlɛm na Njo Ɔsɔwɔ arɛ aji karɛ Tata.

²³ mɔng ayɛlɔ na Ajing ya Tata, “Arɛ ngbɔgamba mɔn yɔ lom ajɔga ajɔla akarɛ Tata.”

²⁴ Josɛf na Meri akarɛ ɛyarɛ mɔng Ajing a Tata abongɔ: “ɔdɛnɔ bɛl ɛmɛb bibal ɔkɔ ɛblagom bibal ɔlem ɛyarɛ ji fɔ.”

²⁵ Ngara yi fɔ ɛbɛl nɛnom wurang na Jɛrusɛlɛm, akoga wɛ arɛ Simiyɔn, ajɔl ɛteng nɛ abɛga Ɔsɔwɔ. Ajɔl seg arɛ ayɛn nyanyangɛ Isrɛl. Ɛtugi Ɔsɔwɔ ɛjɔl na nɛ.

²⁶ Ɛtugi Ɔsɔwɔ ɛtɔg wɛ arɛ anim teg akpɔ tɛtɛ wɛ ayɛn Krayis yɔ Tata asigɔ nyɔ.

²⁷ Na ji Josɛf na Meri atabɔ Jisɔs arɛ aba lem mɔng ajing abongɔ, Ɛtugi Ɔsɔwɔ ɛtabɛ ɛji na Njo Ɔsɔwɔ.

²⁸ Sayimɔn atab mɔn na abɔ ayɛ ajege Ɔsɔwɔ abonga,

²⁹ Tata, ndɔgalitom ɔwa amal akpɔ batig na likɔna, ateb arɛ wɔ ɔgba lem ji ɔbongɔ.

³⁰ Amir ama agba yɛn ɔnyangɛ ɛba,

³¹ Anɛ kpakpa ala yɛn.

³² Ɛla jɔl Liro ɛkarɛ anɛ ba Jɛntal,na liloba li anɛ aba Isrɛl.

³³ Ndɛ na nyɛn mɔn ɛkpɔla bɔ ɛsi abangɛ ji abongɔ abangɛ wɛ.

³⁴ Simiyɔn akarɛ abɔ lifola abong atɔg Meri ji nyɛn, “Ɔsɔwɔ agba rang mɔn ɔfa akarɛ ndungi na ɔnyangɛ ɛkarɛ agbem anɛ na Isrɛl. Ɛla jɔl ndenge yi Ɛgbem anɛ na Isrɛl ala bong abangɛ.

³⁵ naji nkanter ɛgbem anɛ ala ribi. Wɔ Mɛri, ɔkankang ɛla yara litem.”

³⁶ Ana nyɛn amir, atɔb ajɔl na Njo Ɔsɔwɔ. Ajɔl mɔn ɔkal yɔ Fanuwɛl, yɔ ajogɔ ɔgu bi Asa. Ajɔl ɛkpa kola nɛ,agba jɔl na libal na nya arima.

³⁷ Ajɔl akpɔ asa na nya atila ani na ɛni, ɛfente na alagtu ajɔl kponi Ɔsɔwɔ na Njo Ɔsɔwɔ akaga ɔrɔ afɛngɛ ajɔla njal.

³⁸ Ana titi abal akag Ɔsɔwɔ sam, abong abangɛ mɔn atɔg anɛ kpakpa ba ajɔlɔ seg Ɔsɔwɔ arɛ aba nyangɛ Jɛrusɛlɛm.

Afɛngɛ na Nasarɛt

³⁹ Josɛf na Meri alem ji Ajing a Tata abongɔ, afɛngɛ njim na Nasarɛt ɛjiba abɔ na Galili.

⁴⁰ Jisɔs abenga afɛngɛ akore, abɛl ɛkukuna, lifola Ɔsɔwɔ ɛjɔl na nɛ.

Jisɔs na Njo Ɔsɔwɔ

⁴¹ Liya aliali nyɛn na ndɛ Jisɔs ajiga na Jɛrusɛlɛm na Likag li Aseng Asa.

⁴² Na ji Jisɔs alɔ rir nya woba na ɛbal, abɔ atɔna aji Likag mɔng ligbɛna ɛbongɔ.

⁴³ Na ji Likag ɛlɔ mal, ndɛ na nyɛn atum akuri,mɔn ji Jisɔs asal na njim na Jɛrusɛlɛm abɔ akunam.

⁴⁴ Abɔ akɛrɛ arɛ agba tɔna ɛbɔngɛ anɛ ba lijɛn akuri, ajɛn ɔfo kpukpul. Nig aji kuma wɛ nsɛba na ɛbɔngɛ abɔnyɛn na atɛm.

⁴⁵ Na ji adɛnɔ wɛ yɛn, afɛngɛ njim na Jɛrusɛlɛm aji kuma wɛ nsɛba.

⁴⁶ Naji ɛlɔ seng mfo ɛra ajil ayɛn nɛ na Njo Ɔsɔwɔ, na ji ajigɔ na ba teteba, ayonge atong afɛnga abiba abɔ abiba.

⁴⁷ Anɛ kpakpa ba ayogɔ wɛ ɛkpɔl abɔ ɛsi na ɛkukuna ɛjɛ na nfanga ɛyɛ.

⁴⁸ Naji ndɛ na nyɛn ayɛnɔ nɔ wɛ, ɛkpɔl abɔ ɛsi. Nyɛn abong atɔgɛ, “Mɔn, bɛjom ji ɛkerɔ ɔlem wur ana? Mɛ na nsɔja ɛgba wur fɛgayɔ ɛsɛba wa.”

⁴⁹ Jisɔs afanga abɔ, “Bɛjom ji wun ɔsɛba mam? Wun ɔnyim arɛ mɛ nteg njɔl na ɛtɛk nsɔjama ɛ?”

⁵⁰ Abɔ ɛsaram ji wɛ abongɔ.

⁵¹ Jisɔs afɛngɛ na Nasarɛt na ndɛ na nyɛn. Wɛ ayoga abɔ. Nyɛn atore nsɔl yi ɛlɔ lɛm na Litem.

⁵² Jisɔs abenga na biji na ɛkukuna. Ɔsɔwɔ abɛl ɛyɛbalitem na nɛ anɛ atɔb abɛl ɛyɛbalitem na nɛ.